មនុស្សជាង ១០ នាក់ ស្លាប់ក្នុងឧបទ្ទវហេតុនៅអណ្តូងរ៉ែធ្យូងថ្មរបស់រដ្ឋនៅចិន
ប៉េកំាង៖អាជ្ញាធរក្នុងតំបន់បានប្រកាសកាលពីល្ងាចថ្ងៃអាទិត្យថា ភ្លើងបានឆាបឆេះដោយសម្លាប់កម្មករអណ្តូងរ៉ែធ្យូងថ្មយ៉ាងហោចណាស់ ១៦ នាក់ ក្នុងទីក្រុង Panzhou នៃខេត្ត Guizhou របស់ប្រទេសចិន។ នេះបើតាមការចុះផ្សាយរបស់កាសែតចិន Global Times។
យោងតាមសេចក្តីថ្លែងការណ៍ពីនាយកដ្ឋានសាធារណៈនៃទីក្រុង Panzhou ឧបទ្ទវហេតុនេះ បានកើតឡើងប្រហែលម៉ោង ៨ ព្រឹក ថ្ងៃអាទិត្យ នៅអណ្តូងរ៉ែធ្យូងថ្ម Shanjiaoshu របស់ក្រុមហ៊ុនរដ្ឋ Guizhou Panjiang Refined Coal Co ដោយមានមនុស្ស ១៦ នាក់ ដែលបានស្លាប់ បានជាប់នៅទីនោះ។
ការស៊ើបអង្កេតបឋមបានបង្ហាញថា ការឆាបឆេះបានរាលដាល បន្ទាប់ពីប្រអប់ដឹកជញ្ជូនក្នុងអណ្ដូងរ៉ែបានឆេះ។ គិតត្រឹមល្ងាចថ្ងៃអាទិត្យ ក្រុមជួយសង្គ្រោះបានពន្លត់ភ្លើងរួចរាល់ ហើយសភាពការស្ថិតនៅក្រោមការគ្រប់គ្រងបានឡើងវិញ។
ទោះយ៉ាងណាក៏ដោយ បើតាមការរាយការណ៍របស់ទីភ្នាក់ងារសារព័ត៌មានរ៉យទ័រ ក្រុមហ៊ុនប្រឹក្សាទំនិញដែលមានមូលដ្ឋាននៅទីក្រុងសៀងហៃ Mysteel បានឱ្យដឹងថា អណ្តូងរ៉ែធ្យូងថ្មទាំងអស់នៅក្នុងទីក្រុង Panzhou បានផ្អាកការផលិតរយៈពេលមួយថ្ងៃ។
បន្ថែមពីនេះ ក្រុមហ៊ុន Guizhou Panjiang Refined Coal Co បានបញ្ជាឱ្យមានការត្រួតពិនិត្យសុវត្ថិភាពនៅគ្រប់អណ្តូងរ៉ែរបស់ខ្លួន ហើយបានចាត់វិធានការ ដើម្បីធានាដល់ការផលិតប្រកបដោយសុវត្ថិភាព។
គួរបញ្ជាក់ថា ឧបទ្ទវហេតុចុងក្រោយនេះកើតឡើងបន្ទាប់ពីការរអិលបាក់ដីនៅអណ្តូងរ៉ែធ្យូងថ្មនៅក្នុងតំបន់ម៉ុងហ្គោលីខាងក្នុង កាលពីខែកុម្ភៈ ដែលសម្លាប់មនុស្សចំនួន ៥៣ នាក់។
កន្លងមក អាជ្ញាធរចិន បានប្រកាសវិធានការកែលម្អសុវត្ថិភាពក្នុងវិស័យនេះ រួមទាំងការរឹតបន្តឹងលើការជីកយករ៉ែលក្ខណៈតូចៗ និងផែនការបង្កើនល្បឿននៃការប្រើប្រាស់ស្វ័យប្រវត្តិកម្មក្រោមដី៕
ប្រែសម្រួល៖ហួន ឌីណា
ប្រភព៖ Sixteen killed in accident at state-owned coal mine in China’s Guizhou province
