ប្រធានក្រុមអ្នកកាសែតហុងកុងត្រូវកាត់ទោសឱ្យជាប់ពន្ធនាគារពីបទរារាំងប៉ូលិស
ហុងកុង៖កាលពីថ្ងៃចន្ទ ម្សិលមិញ ប្រធានក្រុមអ្នកកាសែតឈានមុខគេនៅទីក្រុងហុងកុងត្រូវបានកាត់ទោសឱ្យជាប់ពន្ធនាគាររយៈពេល ៥ ថ្ងៃពីបទរារាំងមន្រ្តីប៉ូលិសកាលពីខែកញ្ញា ឆ្នាំមុន។ករណីនេះត្រូវបានអ្នករិះគន់មួយចំនួនមើលឃើញថាវាគឺជាការដាក់សម្ពាធបន្ថែមទៀតទៅលើសេរីភាពសារព័ត៌មាននៅទីក្រុងហុងកុងដែលជាទីក្រុងនៃមជ្ឈមណ្ឌលហិរញ្ញវត្ថុដ៏សំខាន់មួយនៅលើពិភពលោក។
លោក រ៉នសុន ចាន់ (Ronson Chan) ប្រធានសមាគមអ្នកកាសែតហុងកុង ត្រូវបានមន្ត្រីស្លៀកពាក់ស៊ីវិលពីរនាក់ចាប់ខ្លួន និងដាក់ខ្នោះដៃខណៈពេលដែលលោកកំពុងរាយការណ៍ព័ត៌មានមួយ។ ការចាប់ខ្លួននេះធ្វើឡើងបន្ទាប់លោកមិនបានផ្តល់អត្តសញ្ញាណប័ណ្ណទៅកាន់មន្ត្រីស្លៀកពាក់ស៊ីវិលទាំងពីរនាក់នោះ។
លោក ចាន់ បាននិយាយថា លោកមិនបានធ្វើអ្វីខុសនោះទេ ហើយលោកបានពន្យល់នៅក្នុងតុលាការថា លោកបានស្នើសុំឱ្យប៉ូលិសទាំងពីរនាក់នោះបង្ហាញកាតប៉ូលិសផ្លូវការរបស់ពួកគេ មុនពេលដែលលោកផ្តល់ឱ្យពួកគេនូវឯកសារផ្ទាល់ខ្លួនរបស់លោក។ គួរដឹងដែរថា តាមច្បាប់ហុងកុង ពលរដ្ឋហុងកុងទាំងអស់ត្រូវតែកាន់នូវឯកសារសម្គាល់ខ្លួន ពោលគឺអត្តសញ្ញាណប័ណ្ណជាប់ខ្លួនជានិច្ច។
អ្នកស្រីចៅក្រម លឿង កាកី (Leung Ka-kie) បានកាត់ក្ដីឱ្យលោក ចាន់ មានពិរុទ្ធភាព ដោយត្រូវបង់ផាកពិន័យជំនួសឱ្យការជាប់ពន្ធនាគារ ប៉ុន្តែលោកស្រីថា ការផាកពិន័យនេះមិនទាន់អាចបង្ហាញថាបទល្មើសនេះធ្ងន់ធ្ងរនោះទេ។ លោកស្រីក៏បានច្រានចោលជម្រើសដែលត្រូវឱ្យលោក ចាន់ ចូលបម្រើសេវាសហគមន៍ ដោយសារលោកស្រីគិតថា លោក ចាន់ មិនបានបង្ហាញពីវិប្បដិសារីណាមួយនោះឡើយ។
លោកស្រី លឿង បានអនុញ្ញាតឱ្យលោក ចាន់ បង់ប្រាក់ផាកពិន័យចំនួនជិត ៤ ពាន់ដុល្លារអាមេរិកដើម្បីអាចនៅក្រៅឃុំបាន ដោយសារតែមេធាវីរបស់លោកបាននិយាយថា លោកគ្រោងនឹងប្តឹងឧទ្ធរណ៍។ យ៉ាងណាក៏ដោយ លោក ចាន់ មិនអាចចាកចេញពីទីក្រុងហុងកុងបាននោះទេ ដោយលោកត្រូវប្រគល់ឯកសារធ្វើដំណើរចេញក្រៅប្រទេសទៅកាន់តុលាការទាំងអស់។
បន្ទាប់ពីសវនាការរួច លោក ចាន់ បានថ្លែងថា លោកមិនភ្ញាក់ផ្អើលចំពោះការកាត់ទោសឃុំខ្លួនលោកនោះទេ។ លោកបានបន្តថា ៖ «អ្នករាល់គ្នាបានមើលឃើញហើយថាតើតុលាការមានទស្សនៈយ៉ាងណាចំពោះករណីនេះ។ ខ្ញុំគិតថាយុត្តិធម៌គឺស្ថិតនៅក្នុងបេះដូងរបស់យើង»។ គួរបញ្ជាក់ថា កាលបរិច្ឆេទសម្រាប់បណ្តឹងឧទ្ធរណ៍មិនទាន់បានសម្រេចនៅឡើយទេ។
សមាគមអ្នកកាសែតហុងកុង គឺជាក្រុមអ្នកសារព័ត៌មានវិជ្ជាជីវៈដ៏សំខាន់ចុងក្រោយបង្អស់ប្រចាំនៅទីក្រុងហុងកុង ដែលតែងតែបានតស៊ូមតិលើសិទ្ធិជាមូលដ្ឋាន និងសេរីភាពសារព័ត៌មាន ជាពិសេសបន្ទាប់ពីមានការអនុម័តច្បាប់សន្តិសុខជាតិដោយអាជ្ញាធរចិន កាលពីខែមិថុនា ឆ្នាំ២០២០។
រដ្ឋាភិបាលរបស់បណ្ដាប្រទេសលោកខាងលិចមួយចំនួនបានលើកឡើងថា ច្បាប់នេះមានភាពតឹងរ៉ឹង និងបានគាបសង្កត់សិទ្ធិសេរីភាពរបស់ពលរដ្ឋហុងកុង។ ក្រុមប្រទេសទាំងនោះបានធ្វើការកត់សម្គាល់ថា បន្ទាប់ពីទីក្រុងហុងកុងត្រូវបានអង់គ្លេសផ្ដល់សិទ្ធិគ្រប់គ្រងត្រឡប់ទៅឱ្យប្រទេសចិនវិញក្នុងឆ្នាំ១៩៩៧ ទីក្រុងមួយនេះគួរតែជាទីក្រុងដែលមានស្វ័យភាព និងសេរីភាពពេញលេញ។
យ៉ាងណាមិញ ក្រុមមន្ត្រីទីក្រុងប៉េកាំង និងហុងកុងបាននិយាយថា ច្បាប់នេះគឺចាំបាច់ណាស់ដើម្បីនាំមកនូវស្ថិរភាព បន្ទាប់ពីទីក្រុងមួយនេះត្រូវបានរង្គោះរង្គើដោយការចេញធ្វើបាតុកម្មរបស់ពលរដ្ឋហុងកុងអស់រយៈពេលជាច្រើនខែ ដើម្បីទាមទារឱ្យមានលទ្ធិប្រជាធិបតេយ្យកាលពីឆ្នាំ២០១៩៕
ប្រែសម្រួល៖ធា សុណា
ប្រភពព័ត៌មាន៖ Channel NewsAsia Head of Hong Kong journalists’ group sentenced to jail for obstructing police
