ថៃ៖កាលពីថ្ងៃទី២៥ ខែកញ្ញាឆ្នាំ២០២៣ម្សិលមិញ ភ្ញៀវទេសចរចិនដែលបានធ្វើការចុះចតនៅទីក្រុងបាងកក ត្រូវបានទទួលការស្វា​គមន៍ជាពិសេស ដោយមានលោកនាយករដ្ឋមន្ត្រី ស្រេថា ថាវីស៊ីន ជាអ្នកជួបស្វាគមន៍ដោយផ្ទាល់ ដោយសារតែពួកគេជា​ភ្ញៀវទេសចរនៃជើងហោះហើរដំបូងដែលបានទៅដល់ប្រទេសថៃបន្ទាប់ថៃបានសម្រេចមិនទាមទារទិដ្ឋាការចំពោះជ​នជាតិចិន ក្នុងគោលបំណងដើម្បីធ្វើឱ្យឧស្សាហកម្មទេសចរណ៍ថៃកាន់តែប្រសើរឡើង។​

អំឡុងពេលដែលភ្ញៀវទេសចរទាំងនោះបានចុះទៅដល់ព្រលានយន្តហោះភ្លាម គេសង្កេតឃើញមានអ្នក​រាំរបាំ​ក្នុង​ឈុត​ប្រពៃណីថៃ និង​អ្នក​សម្ដែងបានធ្វើការប្រគុំតន្ដ្រីស្វាគមន៍​ភ្ញៀវទាំងអស់នោះ ដែល​បាន​ធ្វើដំណើរ​ក្នុង​ជើង​ហោះហើរមក​ពី​ទីក្រុង​សៀងហៃ។ បន្ថែមលើនេះ មនុស្សម្នាជាច្រើនក៏បានធ្វើការសុំថតរូបជាមួយលោកនាយករដ្ឋមន្ត្រី ស្រេថា ផងដែរ។​

វិស័យទេសចរណ៍គឺជាកត្តាជំរុញដ៏សំខាន់របស់ប្រទេសថៃដែលជាប្រទេសសេដ្ឋកិច្ចធំទី២នៅអាស៊ីអាគ្នេយ៍ និងដែលត្រូ​វបានគេស្គាល់ថាជាប្រទេសដែលមានឆ្នេរដ៏ស្រស់ស្អាត និងជីវិតពេលរាត្រីដ៏រស់រវើក។ ការស្តារឡើងវិញនូវឧស្សាហក​ម្មទេសចរណ៍ដែលរងផលប៉ះពាល់យ៉ាងធ្ងន់ធ្ងរដោយជំងឺរាតត្បាតកូវីដ១៩ គឺជាអាទិភាពមួយក្នុងចំណោមអាទិភាពផ្សេ​ងៗទៀត របស់លោក ស្រេថា ដែលទើបនឹងជាប់ឆ្នោតជានាយករដ្ឋមន្ត្រីថ្មីរបស់ថៃ។​

យ៉ាងណាក៏ដោយ វិបត្តិសេដ្ឋកិច្ចនៅប្រទេសចិនបន្ទាប់ពីវិបត្តិកូវីដ១៩ បាននាំឱ្យមានការធ្លាក់ចុះនៃភ្ញៀវទេសចរចិនដែលធ្លាប់ធ្វើដំណើរកម្សាន្តនៅប្រទេសថៃ ដូច្នេះហើយ លោក ស្រេថា សង្ឃឹមថា ការលើកលែងមិនទាមទារយកទិដ្ឋា​ការពីជនជាតិចិន អាចជួយដោះស្រាយបញ្ហានេះបាន។​

លោកនាយករដ្ឋមន្ត្រីថៃរូបនេះបានប្រាប់ទៅកាន់អ្នកសារព័ត៌មាននៅអាកាសយានដ្ឋានសុវណ្ណភូមិថា ៖ «យើងមានទំនុ​ក​ចិត្តថា គោលនយោបាយនេះនឹងជំរុញសេដ្ឋកិច្ចថៃឱ្យកាន់តែរីកចម្រើន»។ លោកក៏បានបន្ថែមថា «សុវត្ថិភាពភ្ញៀវទេ​សចរគឺជាអាទិភាពដែលយើងត្រូវយកចិត្តទុកដាក់»។​

គួរបញ្ជាក់ថា គោលនយោបាយលើកលែងទិដ្ឋាការនេះ បានចាប់ផ្តើមអនុវត្តចាប់ពីថ្ងៃទី២៥ ខែកញ្ញា រហូតដល់ខែកុម្ភៈ ឆ្នាំ​២០២៤ ខាងមុខនេះ។ រដ្ឋាភិបាលថៃរំពឹងថានឹងទទួលបានភ្ញៀវទេសចរចិនចំនួន ២,៨៨ លាននាក់ក្នុងអំឡុងពេ​ល ៥ ខែនៃការលើកលែងទិដ្ឋការនេះ ពោលគឺខ្ពស់ជាងបន្តិចនូវចំនួនជនជាតិចិនដែលបានទៅទស្សនានៅប្រទេសថៃនៅឆ្នាំនេះ ដែលមានចំនួន ២,៣៤ លាននាក់។​

អ្នកទេសចរចិន លោក ហ្គូ ស៊ីយី (Gu Siyi) អាយុ ២៥ ឆ្នាំដែលកំពុងធ្វើដំណើរទៅកាន់ប្រទេសថៃជាលើកដំបូងជា​មួ​យមិត្តភក្តិរបស់លោកបាននិយាយថា «ការលើកលែងទិដ្ឋាការនេះបាននឹងកំពុងជួយទាក់ទាញភ្ញៀវទេសចរថ្មី ដោយសា​រតែវាមានភាពងាយស្រួលក្នុងការចេញចូល»។ លោក​បាន​បន្ត​ថា ៖ «​ភ្ញៀវ​ទេសចរ​ចិន​កាន់​តែ​ច្រើន​នឹងមក​លេងនៅ​ប្រទេស​ថៃក្នុង​ថ្ងៃ​ឈប់​សម្រាករបស់ពួកគេ ​ព្រោះ​វា​ពិត​ជា​មាន​ភាព​ងាយ​ស្រួល​ណាស់»។

គួររំឭកថា មុនពេលវិបត្តិកូវីដ១៩ ប្រទេសចិនគឺជាប្រភពនៃអ្នកទេសចរដ៏ធំបំផុតសម្រាប់ប្រទេសថៃ។ ជាក់ស្ដែងក្នុងឆ្នាំ២០១៩ មានអ្នកទេសចរជិត ៤០ លាននាក់បានទៅលេងប្រទេសថៃ ហើយក្នុងនោះ ១១ លាននាក់មកពីប្រទេសចិន។ គួរបញ្ជាក់ថា ភ្ញៀវទេសចរចិនចំនួន ១១ លាននាក់នោះបានចំណាយប្រាក់ក្នុងដំណើរកម្សាន្តរបស់ពួកគេអស់សរុបចំនួន ៥៣ ប៊ីលានដុល្លារអាមេរិកនៅក្នុងប្រទេសថៃ។​

អ្នកទេសចរចិនភាគច្រើននិយាយថា ពួកគេចង់ធ្វើដំណើរកម្សាន្តទៅកាន់ប្រទេសថៃ ដោយសារតែប្រទេសនេះមានឆ្នេរស្អាតៗជាច្រើន និងមានអាហារឆ្ងាញ់ៗ។ លោក​ យ៉ឺ វៃហឺ (Ye Weihe) អាយុ ៥៣ ឆ្នាំបាននិយាយថា «ផ្លែឈើនៅទីនេះគឺអស្ចារ្យណាស់ ជាពិសេសផ្លែទុរេន»។ គួរដឹងដែរថា គិតមក​ទល់​ពេល​នេះ ប្រទេសថៃ​ទទួល​បាន​ភ្ញៀវ​ទេសចរ​ចំនួន ១៩​ លាន​នាក់ហើយ៕​

ប្រែសម្រួល៖ធា សុណា

ប្រភពព័ត៌មាន៖ Reuters Chinese tourists get VIP welcome as Thai visa waiver programme begins