ភ្នំពេញ៖ អាជ្ញាធរជាតិព្រះវិហារ ប្រកាសផ្អាកការ​ចូលទស្សនារមណីយដ្ឋានប្រា​សាទកោះកេរនៅថ្ងៃទី២៩ ខែកញ្ញា ចាប់ពីម៉ោង ៧ព្រឹកដល់ម៉ោង​ ១២ថ្ងៃត្រង់ថ្ងៃដដែល​ ដើម្បីរៀបចំពិធីបួងសួងកម្រិតថ្នាក់ជាតិ ក្នុងឱកាសនៃការចុះបញ្ជីរមណីយដ្ឋានប្រា​សាទកោះកេរ ជាសម្បត្តិ បេតិកភណ្ឌពិភពលោក។

ឯកឧត្តម គង់ ពុទ្ធិការ អគ្គនាយកនៃអាជ្ញាធរជាតិព្រះវិហារ បានប្រាប់ឱ្យដឹងនៅថ្ងៃទី​២៦ ខែកញ្ញាថា អាជ្ញាធរជាតិ​ព្រះវិហារ​ចេ​ញសេចក្តីជូនដំណឹងនេះ មិនមែនហាមមិនឱ្យភ្ញៀវទេសចរចូលទស្សនានោះទេ គឺគ្រាន់តែផ្អាកមួយរយៈពេលខ្លី ត្រឹមតែមួ​យ​ព្រឹក​នៅថ្ងៃទី ២៩ ខែកញ្ញា​ដែលជាថ្ងៃប្រារព្វកម្មវិធីបួងសួងប៉ុណ្ណោះ​។ កម្មវិធីបួងសួងនេះ ធ្វើឡើងក្នុងគោលបំណងរំលឹកគុណដល់បុព្វបុរស និង​ព្រះមហាក្សត្រដែល បានកសា​ងប្រាសាទនេះ ដើម្បីរក្សាទុកដល់កូនខ្មែរជំនាក់ក្រោយ រហូតដល់បានចុះបញ្ជីជាសម្បត្តិបេតិកភណ្ឌពិភពលោក ហើ​យ​​​កម្មវិធីបួងសួងនេះ ស្ថិតនៅក្នុងកម្រិតរាជរដ្ឋាភិបាល​ដោយមានការចូលរួមពីថ្នាក់ដឹកនាំកំពូលៗ របស់ប្រទេស ដែល​តា​ម​​ការគ្រោងទុកនឹងមានការអញ្ជើញចូលរួមជាអធិបតីពីសំណាក់សម្តេចកិតិ្តព្រឹទ្ធបណ្ឌិត ប៊ុន រ៉ានី ហ៊ុនសែន។

​លោក គង់ ពុទ្ធិការ បានថ្លែង​ឱ្យដឹងទៀតថា មុនពេលចុះបញ្ជីជាសម្បត្តិបេតិកភណ្ឌពិភពលោកនេះ​ ភ្ញៀវទេសចរជាតិ និងអ​ន្តរជាតិ ​ទៅទស្សនាជាហូរហែ ប៉ុន្តែនៅក្រោយពេលដែលត្រូវបានចុះបញ្ជី​ចាប់ពីថ្ងៃទី១៧ ខែកញ្ញា ឆ្នាំ២០២៣ រហូតមកទ​ល់បច្ចុប្បន្ននេះ ភ្ញៀវទេសចរជាតិ និងអន្តរជាតិបានចាប់អារម្មណ៍ និងមកទស្សនា មានចំនួនច្រើនគួរឱ្យកត់សម្គាល់។ ​

សូមរម្លឹកដែរថា ​​កាលពី​​ថ្ងៃទី២០ ខែកញ្ញា កន្លងទៅ អាជ្ញាធរជាតិព្រះវិហារ ប្រចាំរមណីយដ្ឋានប្រាសាទកោះកេរ និងប្រា​សា​ទព្រះវិហារ បាន​រៀបចំពិធីទូងស្គរ អបអរសាទរប្រាសាទកោះកេរ ត្រូវបានគណៈកម្មាធិការបេតិកភណ្ឌពិភពលោក នៃអ​ង្គការយូណេស្កូ។

ពិធីនេះ​ធ្វើឡើងនៅក្នុងបរិវេណប្រាសាទប្រាង្គ នៃរមណីយដ្ឋានប្រាសាទកោះកេរ ថ្នាក់ដឹកនាំអាជ្ញាធរជាតិព្រះវិហារ អភិ​បាលរង នៃគណៈអភិបាលខេត្តព្រះវិហារ អាជ្ញាធរស្រុកគូលែន មេឃុំ មេភូមិ កងកម្លាំងប្រដាប់អាវុធគ្រប់ប្រភេទ និងព្រះសង្ឃ ប្រជាពលរដ្ឋ លោកគ្រូ អ្នកគ្រូ សិស្សានុសិស្សមានចំនួន៦០០នាក់​ និង​​នៅរមណីយដ្ឋានប្រាសាទព្រះវិហារមាន​ប្រមា​ណជិត២០០នាក់។

សម្ដេចធិបតីនាយករដ្ឋមន្រ្តី ហ៊ុន ម៉ាណែត បានថ្លែង​កាលពី​ថ្ងៃទី​២០ ខែកញ្ញា នា​​ពិធីអបអរសាទរ «រមណីយដ្ឋានប្រាសាទកោះកេរ ត្រូវបានដាក់បញ្ចូល ជាសម្បត្តិបេតិកភណ្ឌពិភពលោក» ​ដោយបានអំពាវនាវ​ និង​​ជំរុញឱ្យបន្តថែរក្សាវប្បធម៌ខ្មែរ ដែលដូនតាជំនាន់មុន បានបន្សល់ទុកមក។​​

​​​សូមបញ្ជាក់ថា កាលពី​ថ្ងៃទី១៧ ខែកញ្ញា ឆ្នាំ​២០២៣ ​រមណីយដ្ឋាន​ប្រាសាទកោះកេរ ដែល​អតីតរាជធានីលិង្គបុរ ឬឆោកគគ្យ៍រ ត្រូវបានដាក់បញ្ចូលជាសម្បត្តិបេតិកភណ្ឌពិភពលោករូបិយនៃមនុស្សជាតិរបស់អង្គការយូណេស្កូ នាកិច្ចប្រជុំគណៈកម្មា​ធិការបេតិកភណ្ឌពិភពលោកលើកទី៤៥ ឆ្នាំ២០២៣ នៅទីក្រុងរីយ៉ាត ប្រទេសអារ៉ាប៊ីសាអូឌីត​៕

ដោយ៖គឹម យុត្ថារ៉ូ