ប្រមុខកងទ័ពឥណ្ឌា និងអាមេរិក អំពាវនាវឱ្យមានសេរីភាព និងស្ថិរភាពនៅឥណ្ឌូ-ប៉ាស៊ីហ្វិក
ញូវដែលី៖ ប្រមុខកងទ័ពឥណ្ឌាបាននិយាយកាលពីថ្ងៃអង្គារទី ២៦ ខែកញ្ញាថា ឥណ្ឌាបានប្តេជ្ញារក្សាឥណ្ឌូ-ប៉ាស៊ីហ្វិកឱ្យមានសេរីភាព និងប្រកបដោយស្ថិរភាព ដែលអធិបតេយ្យភាព និងបូរណភាពទឹកដីនៃប្រទេសទាំងអស់ ត្រូវបានគោរព ខណៈការព្រួយបារម្ភជាសកលអំពីការកើនឡើងនៃឥទ្ធិពលរបស់ចិនក្នុងតំបន់កើនឡើង។ នេះបើតាមការចុះផ្សាយរបស់ទីភ្នាក់ងារសារព័ត៌មាន AP។
ប្រមុខកងទ័ពឥណ្ឌាលោក Manoj Pande បានថ្លែងបែបនេះក្នុងសន្និសីទប្រធានកងទ័ពឥណ្ឌូ-ប៉ាស៊ីហ្វិក ដែលរៀបចំដោយឥណ្ឌា និងសហរដ្ឋអាមេរិក ហើយផ្តោតលើការជំរុញការទូត និងកិច្ចសហប្រតិបត្តិការយោធា ក៏ដូចជាការលើកកម្ពស់សន្តិភាព និងស្ថិរភាពនៅក្នុងតំបន់ឥណ្ឌូ-ប៉ាស៊ីហ្វិក។ ប្រមុខកងទ័ព និងគណៈប្រតិភូមកពីប្រទេសចំនួន ៣០ កំពុងចូលរួមជំនួបរយៈពេលពីរថ្ងៃ ដែលត្រូវបញ្ចប់នៅថ្ងៃពុធនេះ។
ទាំងលោក Pande និងប្រមុខកងទ័ពអាមេរិក លោក Randy George មិនបាននិយាយអំពីប្រទេសចិនឱ្យចំៗនៅក្នុងសុន្ទរកថារបស់ពួកគេនោះទេ។
ពេលសួរអំពីការពង្រីកឥទ្ធិពលរបស់ចិន លោក George បាននិយាយថា តំបន់ឥណ្ឌូ ប៉ាស៊ីហ្វិក គឺជាអាទិភាពដ៏សំខាន់សម្រាប់សហរដ្ឋអាមេរិក ។នេះជាមូលហេតុដែលមានវត្តមានអាមេរិកក្នុងតំបន់ ហើយឧស្សាហ៍ធ្វើសមយុទ្ធយោធាជាងផ្នែកណាៗទាំងអស់នៅប៉ាស៊ីហ្វិក។
ចំណែកឯលោក Pande បាននិយាយថា ទស្សនៈវិស័យរបស់ប្រទេសឥណ្ឌា គឺផ្តោតលើការដោះស្រាយជម្លោះដោយសន្តិវិធី ជៀសវាងការបង្ខំ និងការប្រកាន់ខ្ជាប់នូវច្បាប់អន្តរជាតិ។ លោកបានបន្ថែមថា បន្ថែមពីលើបញ្ហាប្រឈមក្នុងសន្តិសុខដែនសមុទ្រ តំបន់ឥណ្ឌូប៉ាស៊ីហ្វិកក៏ប្រឈមមុខនឹងបញ្ហាសន្តិសុខ និងបញ្ហាមនុស្សធម៌លើដីគោក រួមទាំងជម្លោះដែនដី និងលើកោះសិប្បនិមិត្ត ដែលមានមូលដ្ឋានទ័ព។ ត្រង់ចំណុចនេះ លោកចង់សំដៅលើការធ្វើយោធាកម្មលើកោះផ្សេងៗរបស់ប្រទេសចិន ចាពិសេសនៅសមុទ្រចិនខាងត្បូង។
គួរបញ្ជាក់ថា ការទាមទារទឹកដីរបស់ចិននៅសមុទ្រចិនខាងកើត និងសមុទ្រចិនខាងត្បូង បានធ្វើឲ្យប្រទេសជិតខាងតូចៗរបស់ទីក្រុងប៉េកាំងនៅអាស៊ីអាគ្នេយ៍ ក៏ដូចជាប្រទេសជប៉ុន មានការព្រួយបារម្ភ។ ទន្ទឹមនឹងនេះ ទំនាក់ទំនងរវាងទីក្រុងញូវដេលី និងក្រុងប៉េកាំង បានធ្លាក់ចុះចាប់តាំងពីឆ្នាំ ២០២០ នៅពេលដែលទាហានឥណ្ឌា និងចិនបានប៉ះទង្គិចគ្នានៅតាមព្រំដែនចម្រូងចម្រាស់របស់ភាគីទាំង២នៅតំបន់ Himalayan Ladakh ដែលបណ្តាលឱ្យទាហានឥណ្ឌា ២០ នាក់ និងចិន៤ នាក់ បានស្លាប់៕
ប្រភព៖ India and US army chiefs call for free and stable Indo-Pacific as Chinese influence grows
