ឥណ្ឌូណេស៊ីអំពាវនាវឱ្យបញ្ចប់ការប្រយុទ្ធគ្នារវាងអ៊ីស្រាអែល និងប៉ាឡេស្ទីន
ហ្សាការតា៖ ប្រទេសឥណ្ឌូណេស៊ី ជាប្រទេសដែលតែងតែគាំទ្រភាគីប៉ាឡេស្ទីនយូរមកហើយ ប៉ុន្តែកាលពីថ្ងៃអាទិត្យ ឥណ្ឌូណេស៊ីបានប្រកាសថា ខ្លួនមានការព្រួយបារម្ភយ៉ាងខ្លាំងអំពីការផ្ទុះឡើងនៃជម្លោះរវាងអ៊ីស្រាអែល និងប៉ាឡេស្ទីន ហើយថែមទាំងបានអំពាវនាវឱ្យភាគីទាំងពីរធ្វើយ៉ាងណាត្រូវបញ្ចប់ជម្លោះប្រដាប់អាវុធជាបន្ទាន់។
ក្រសួងការបរទេសឥណ្ឌូណេស៊ីបានលើកឡើងនៅក្នុងសេចក្តីថ្លែងការណ៍មួយថា «ឥណ្ឌូណេស៊ីមានការព្រួយបារម្ភយ៉ាងខ្លាំងចំពោះការកើតមានឡើងនូវជម្លោះបាញ់គ្នារវាងប៉ាឡេស្ទីន និងអ៊ីស្រាអែល។ ប្រទេសឥណ្ឌូនេស៊ីជំរុញឱ្យភាគីជម្លោះ បញ្ចប់ការប្រយុទ្ធគ្នាជាបន្ទាន់ ដើម្បីជៀសវាងការស្លាប់មនុស្សបន្ថែមទៀត»។
កន្លងមក ឥណ្ឌូណេស៊ីតែងតែបានបង្កាញពីគោលជំហរគាំទ្រចំពោះការតស៊ូរបស់ក្រុមប៉ាឡេស្ទីន ដើម្បីទទួលបានឯករាជ្យពីអ៊ីស្រាអែល។ សេចក្តីថ្លែងការណ៍បានបញ្ជាក់ថា ៖ «ឫសគល់នៃជម្លោះ គឺការកាន់កាប់ទឹកដីប៉ាឡេស្ទីនដោយអ៊ីស្រាអែល ហើយបញ្ហានេះត្រូវតែដោះស្រាយឱ្យស្របតាមសេចក្ដីសម្រេចដែលបានព្រមព្រៀងគ្នាដោយអង្គការសហប្រជាជាតិ»។
ប្រទេសដែលមានប្រជាជនកាន់សាសនាឥស្លាមច្រើនជាងគេបំផុតនៅលើពិភពលោកនេះ ក៏បានលើកឡើងផងដែរថា ខ្លួនមិនមានចំណាប់អារម្មណ៍ក្នុងការបើកទំនាក់ទំនងការទូតជាមួយអ៊ីស្រាអែលនោះទេ។
កាលពីខែមីនា សមាគមបាល់ទាត់អន្តរជាតិ FIFA បានដកហូតសិទ្ធិធ្វើជាម្ចាស់ផ្ទះរបស់ប្រទេសឥណ្ឌូនេស៊ីសម្រាប់ការប្រកួតបាល់ទាត់ពិភពលោកអាយុក្រោម ២០ ឆ្នាំ ដោយសារតែមេដឹកនាំនយោបាយឥណ្ឌូណេស៊ីមួយចំនួន បានតវ៉ាជាសាធារណៈប្រឆាំងនឹងការចូលរួមរបស់អ៊ីស្រាអែលនៅក្នុងការប្រកួតនោះ។
កាលពីថ្ងៃសៅរ៍ កងទ័ពអ៊ីស្រាអែលបាននិយាយថា ជនជាតិអ៊ីស្រាអែលជាង ២០០ នាក់ត្រូវបានសម្លាប់ នៅក្នុងការវាយប្រហារទ្រង់ទ្រាយធំដ៏គួរឱ្យភ្ញាក់ផ្អើលមួយដោយក្រុមសកម្មប្រយុទ្ធប៉ាឡេស្ទីន ដែលត្រូវបានគេហៅថា ក្រុមហាម៉ាស់ (Hamas)។
នាយករដ្ឋមន្ត្រីអ៊ីស្រាអែល លោក បិនចាមីន ណេតាន់យ៉ាហ៊ូ (Benjamin Netanyahu) ធ្លាប់បានសន្យាថា «អ៊ីស្រាអែលនឹងកម្ទេចកន្លែងលាក់ខ្លួនរបស់ក្រុមប្រដាប់អាវុធនៅតំបន់ហ្កាហ្សា ដោយប្រើការវាយប្រហារតាមអាកាស»។ ការធ្វើបែននេះបានបណ្តាលឱ្យប្រជាជនប៉ាឡេស្ទីនស្លាប់យ៉ាងហោចណាស់ ២៣២នាក់ នេះបើយោងតាមក្រុមមន្ត្រីនៅតំបន់ហ្កាហ្សា។
ការបើកការវាយប្រហាររបស់ក្រុមហាម៉ាស់លើកនេះ គឺជាព្រឹត្តិការណ៍ដ៏សាហាវបំផុតក្នុងជម្លោះរវាងភាគីទាំងពីរអស់រយៈពេលជាច្រើនទសវត្សរ៍មកនេះ។ យ៉ាងណាក៏ដោយ បណ្ដាប្រទេសលោកខាងលិចបានចេញមុខថ្កោលទោសការវាយប្រហារដោយក្រុមហាម៉ាស់ ពោលគឺជាក្រុមដែលប្រទេសអ៊ីស្រាអែល សហរដ្ឋអាមេរិក និងសហភាពអឺរ៉ុប តែងតែចាត់ទុកថាជាអង្គការភេរវករ៕
ប្រែសម្រួល៖ធា សុណា
ប្រភពព័ត៌មាន៖ Channel NewsAsia
Indonesia calls for the end of Israeli-Palestinian violence
https://www.channelnewsasia.com/asia/indonesia-calls-end-israeli-palestinian-violence-3829996
