ប្រមុខការទូតសហរដ្ឋអាមេរិកប្លីនកេនបានទៅកាន់ប្រទេសអ៊ីស្រាអែលដើម្បីបញ្ជូនសារការពារសង្រ្គាម
អាមេរិក៖រដ្ឋមន្ត្រីការបរទេសអាមេរិក លោក អានតូនី ប្លីនកេន(Antony Blinken) បានធ្វើដំណើរទៅកាន់ប្រទេសអ៊ីស្រាអែល ក្នុងបេសកកម្មនៅមជ្ឈិមបូព៌ា កាលថ្ងៃពុធកន្លងទៅថ្មីៗនេះ ក្នុងគោលដៅបញ្ជូនសារដើម្បីការពារកុំឱ្យសង្គ្រាមកាន់តែរីកធំឡើង បន្ទាប់ពីការវាយប្រហារ ការចាប់ចំណាប់ខ្មាំងពីសំណាក់ក្រុមសកម្មប្រយុទ្ធហាម៉ាសប៉ាឡេស្ទីន និងការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សា។
នេះជាការបង្ហាញពីសាមគ្គីភាពជាមួយសម្ព័ន្ធមិត្តដ៏ជិតស្និទ្ធបំផុតរបស់ខ្លួន។ ទីក្រុងវ៉ាស៊ីនតោនតាមរយៈ Blinken គ្រោងនឹងជួបមន្ត្រីជាន់ខ្ពស់អ៊ីស្រាអែល រួមទាំងនាយករដ្ឋមន្ត្រី បេនចាមីន ណេតានយ៉ាហូ(Benjamin Netanyahu )ដើម្បីពិភាក្សាអំពីការជំរុញការគាំទ្រផ្នែកយោធាបន្ថែមទៀត។
មុននឹងឡើងយន្តហោះទៅកាន់ប្រទេសអ៊ីស្រាអែល លោក Blinken បានប្រាប់ក្រុមអ្នកយកព័ត៌មានថា៖ «ខ្ញុំទៅអ៊ីស្រាអែលគឺមានតែសារដ៏សាមញ្ញ និងច្បាស់លាស់មួយប៉ុណ្ណោះ គឺ សហរដ្ឋអាមេរិកនឹងឈរនៅពីក្រោយអ៊ីស្រាអែលជានិច្ច»។
ក្នុងបេសកកម្មនៅមជ្ឈិមបូព៌ាលើកនេះ Blinken នឹងធ្វើការជាមួយសម្ព័ន្ធមិត្តអាមេរិកក្នុងតំបន់ ដើម្បីព្យាយាមធានាឱ្យបាននូវការការដោះលែងចំណាត់ខ្មាំងជាង ១០០នាក់ ដែលអ៊ីស្រាអែលនិយាយថា ក្រុមហាម៉ាស់ចាប់ជាឈ្លើយសឹក ហើយក្នុងនោះក៏មានខ្លះជាពលរដ្ឋអាមេរិកផងដែរ។ មន្ត្រីជាន់ខ្ពស់ក្រសួងការបរទេសអាមេរិកមួយរូបទៀតក៏បានឱ្យដឹងដែរថា បន្ទាប់ពីឈប់នៅអ៊ីស្រាអែល និងហ្ស៊កដានីលោក ប្លីនកេន នឹងធ្វើដំណើរទស្សនកិច្ចទៅកាន់ប្រទេសមួយចំនួនផ្សេងទៀតក្នុងតំបន់។
គួរឱ្យដឹងដែរថា ខ្មាន់កាំភ្លើងក្រុមហាម៉ាស់បានវាយលុកពេញទីក្រុងអ៊ីស្រាអែលកាលពីចុងសប្តាហ៍កន្លងទៅ ដោយមកទល់ពេលនេះមានមនុស្សស្លាប់ចំនួនប្រមាណជាងមួយពាន់ និង ចាប់ចំណាប់ខ្មាំងជាច្រើននាក់ផ្សេងទៀតយកទៅកាន់តំបន់ហ្គាហ្សា។
យ៉ាងណា ជាការសងសឹកអ៊ីស្រាអែលក៏បាន វាយប្រហារតាមអាកាសដែលបានសម្លាប់មនុស្សជាងមួយពាន់នាក់ដូចគ្នា។នេះបើយោងតាមក្រសួងសុខាភិបាលរបស់ហ្គាហ្សា។ យោធាអ៊ីស្រាអែលបាននិយាយថា កងទ័ពរបស់ខ្លួនបានសម្លាប់ខ្មាន់កាំភ្លើងប៉ាឡេស្ទីនយ៉ាងហោចណាស់មួយពាន់នាក់ ដែលបានជ្រៀតចូលពីតំបន់ហ្គាហ្សា។
បើតាមលោក ប្លីនកេន ក្នុងចំណោមជនរងគ្រោះទាំងអស់ យ៉ាងហោចណាស់ជនជាតិអាមេរិក ២២ នាក់ត្រូវបានសម្លាប់ក្នុងអំឡុងពេលការវាយប្រហារនេះ។
ជារួមមក អាទិភាពកំពូលសម្រាប់លោក ប្លីនកេន ទៅអ៊ីស្រាអែល គឺត្រូវបញ្ជូនសារដើម្បី រារាំង ដែលទំនងជាសំដៅលើអ៊ីរ៉ង់ និងក្រុមដែលគាំទ្រដោយអ៊ីរ៉ង់ ដូចជាក្រុមហេសបូឡា របស់ប្រទេសលីបង់ ដើម្បីបញ្ឈប់សង្គ្រាមកុំឱ្យកាន់តែធំឡើង៕
ប្រែសម្រួល៖ ស្រ៊ុន សិរីវឌ្ឍនៈ
ប្រពព៖ https://www.reuters.com/world/middle-east/blinken-headed-israel-show-us-solidarity-seek-deterrence-2023-10-11/
