(ភ្នំពេញ)៖ ក្រុមការងារជំនាញ អន្តរាគមន៍បង្ក្រាបបទល្មើសចលនា សត្វ នៃអគ្គនាយកដ្ឋានសុខភាពសត្វ និងផលិតកម្មសត្វ បានសហការ ជាមួយការិយាល័យផលិតកម្ម និងបសុព្យាបាលនៃមន្ទីរ កសិកម្មរាជធានីភ្នំពេញ កាលពីវេលាម៉ោង៩ និង១០នាទី នាថ្ងៃទី ៣១ ខែតុលា ឆ្នាំ២០២៣ ម្សិលមិញ បានចុះឃាត់ចាប់ រថយន្ត ២គ្រឿង ដែលដឹកពងក្រួចចំនួន ២០ម៉ឺនគ្រាប់ នាំចេញពីវៀតណាម បម្រុងចែកចាយនៅភ្នំពេញដោយពុំមានច្បាប់ត្រឹមត្រូវ ដែលស្ថិត ក្នុងសង្កាត់ក្បាលកោះ ខណ្ឌច្បារអំពៅ រាជធានីភ្នំពេញ ។

រថយន្តទី១ ម៉ាកSSANGYONG ISTANA ជាប្រភេទរថយន្តដឹក អ្នកដំណើ១៥កៅអី ស្លាកលេខភ្នំពេញ ២AG -9783 ពណ៌ស ដឹកស៊ុតសត្វក្រួចចំនួន១០០,០០០ គ្រាប់(ដប់ម៉ឺន)គ្រាប់ ចេញពីប្រទេសវៀតណាមតាមច្រកកោះរកា ស្រុកពាមជរ ខេត្តព្រៃវែង រួចមកលក់ចែកចាយនៅរាជធានីភ្នំពេញ ដោយពុំមានលិខិតអាជ្ញាតអ្វីទាំងអស់ ។

ចំណែក រថយន្តទី២ពាក់ស្លាកលេខភ្នំពេញ២BA-0453 ពណ៍សម្បក ឪឡឹក ដឹកស៊ុតសត្វក្រួចចំនួន១០០,០០០ គ្រាប់ (ដប់ម៉ឺន)គ្រាប់ និងស៊ុតសត្វមាន់ ៣០០០គ្រាប់(បីពាន់) គ្រាប់ ដឹកចេញពីប្រទេសវៀតណាមតាមច្រកកោះរកាស្រុកពាមជរខេត្តព្រៃវែងរួចយកទៅចែកចាយក្នុងរាជធានីភ្នំពេញដោយពុំមានលិខិតអនុញ្ញាតអ្វីទាំងអស់ដូចគ្នា (នេះតាមការឆ្លើយបញ្ជាក់ពីម្ចាស់ដឹកស៊ុត ក្រួចនិងស៊ុតមាន់) ក្រុមការងារបានឃាត់ចាប់នៅសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។

បច្ចុប្បន្នក្រុមការងារបាននាំយកវត្ថុតាងនិងបទល្មើសទាំង២ខាងលើនេះ ទៅរក្សាទុកនៅទីតាំងចត្តាឡីស័កសត្វរបស់អគ្គនាយកដ្ឋាន សុខភាពសត្វ និងផលិតកម្មសត្វ ដើម្បីអនុវត្តតាមនីតិវិធី៕

ដោយ ៖ ភារ៉ា និង ប៊ុនធី