អាជ្ញាធរខេត្តកែប ដាំកូនកោងកាងចំនួន ៦,០០០ដើម នៅឆ្នេរសហគមន៍នេសាទភូមិថ្មី
កែប៖អាជ្ញាធរខេត្តកែបបានដាំដើមកូនកោងកាងចំនួន ៦ ០០០ ដើម នៅឆ្នេរសហគមន៍នេសាទភូមិថ្មី ស្ថិតនៅក្រុងកែប ដើម្បីអបអរសាទរទិវាអនាម័យបរិស្ថានជាតិ២៣ វិច្ឆិកា ឆ្នាំ២០២៣ ក្រោមប្រធានបទ «ភូមិឋានស្អាត បរិស្ថានស្អាត សង្គមសន្តិភាព សេដ្ឋកិច្ចរីកចម្រើន» និងការការពារជីវៈចម្រុះ និងការពារប្រព័ន្ធអេកូឡូស៊ី។
ឯកឧត្តម សោម ពិសិដ្ឋ អភិបាលខេត្តកែបបានប្រាប់ឱ្យដឹងនៅថ្ងៃទី១ ខែវិច្ឆិកាថា ការដាំកូនកោងកាងចំនួន ៦ ០០០ដើមនេះ គឺជាការដាំបន្ថែមនៅតាមបណ្តោយមាត់សមុទ្រនៃសហគមន៍នេសាទភូមិថ្មី តាមរយៈមន្ទីរបរិស្ថានខេត្ត ហើយនេះគឺជាការដាំលើកទី៤ របស់មន្ទីរ ក្នុងការបន្ថែមជម្រកបៃតងនៅសហគមន៍អេកូទេសចរណ៍មួយនេះ។
ឯកឧត្តមបានថ្លែងថា ព្រៃកោងកាងបានដើរតួនាទីយ៉ាងសំខាន់ក្នុងការរក្សាតុល្យភាពប្រព័ន្ធអេកូឡូស៊ីតំបន់ឆ្នេរ ដោយស្រូបយកនូវឧស្ម័នកាបូនិច និងជាតិពុលផ្សេងៗ ជួយការពារខ្យល់ព្យុះ ការពារភាពសឹករិចរិល ទប់ស្កាត់ការហូរច្រោះបាក់ដីច្រាំងសមុទ្រ និងផ្តល់ជម្រកយ៉ាងរឹងមាំដល់ពពួកមច្ឆសមុទ្របន្តពូជ។
លោកបានសម្តែងការព្រួយបារម្ភថា ការបាត់បង់នូវធនធានទាំងនេះនឹងនាំមកនូវការបាត់បង់ទីជម្រកសត្វពង ប្រភពអាហារសមុទ្រ ដែលធ្វើឱ្យថយចុះទិន្នផលនេសាទ និងរុក្ខជាតិសមុទ្រ និងធ្វើឱ្យប៉ះពាល់ខ្លាំងដល់សុខុមាលរបស់មនុស្ស និងសេដ្ឋកិច្ចជាតិ។ការដាំកូនកោងកាងនេះ ក៏ជាការពញ្ញាក់ស្មារតីប្រជាពលរដ្ឋឱ្យចូលរួមថែរក្សាបរិស្ថាន និងជីវៈចម្រុះ នៅតំបន់សមុទ្រ ឱ្យមានភាពស្រស់បំព្រងសម្រាប់ធ្វើការទាក់ទាញភ្ញៀវទេសចរ ឱ្យមកកម្សាន្ត ។
ប្រភពហ្វេសប៊ុកមន្ទីរបរិស្ថានខេត្តកែបក្នុងឱកាសនៃការដំាកូនកោងកាង កាលពីថ្ងៃទី ៣១ ខែតុលា លោក អ៊ិន សៅ ប្រធានមន្ទីរបរិស្ថានខេត្តកែប បានឱ្យដឹងថា កន្លងមកមន្ទីរបរិស្ថាន ក្រោមការដឹកនាំរបស់អភិបាលខេត្ត បានធ្វើយុទ្ធនាការដាំកូនកោងកាងចំនួន៣លើកមកហើយក្នុងឆ្នាំ២០២២ ដែលមានកូនកោងកាងសរុបដែលបានដាំចំនួន ១២ ០០០ដើម នៅសហគមន៍នេសាទភូមិថ្មីនេះ។
លោកលើកឡើង ដោយឡែកក្នុងឆ្នាំ២០២៣នេះ មន្ទីរបរិស្ថានបានផ្ដល់កូនឈើប្រណិត ដល់សាលារៀន វត្តអារាម មន្ទីរអង្គភាពចំណុះរដ្ឋបាលខេត្ត និងសហគមន៍ចំនួន ១ ៥០០ដើម និងបានសហការជាមួយរដ្ឋបាលក្រុងកែប ក្រុមហ៊ុនដៃគូបានដាំកូនឈើប្រណិត និងឈើហូបផ្លែចំនួន ៥៥០ ដើម នៅទីលានទុកដាក់សំរាម និងកំពុងបន្តរៀបចំថ្នាលបណ្តុះកូនឈើបន្ថែមទៀត។
សូមជម្រាបថា ក្រសួងបរិស្ថាន បានដាក់ចេញនូវយុទ្ធនាការថ្មីមួយទៀតគឺ យុទ្ធនាការដាំដើមឈើឱ្យបានយ៉ាងតិច ១ លានដើមជារៀងរាល់ឆ្នាំចាប់ពីថ្ងៃទី១០ខែតុលាឆ្នាំ២០២៣តទៅ។តាមរយៈយុទ្ធនាការនេះដែរ រដ្ឋមន្រ្តីក្រសួងបរិស្ថានឯកឧត្តមបណ្ឌិត អ៊ាង សុផល្លែត បានជំរុញឱ្យមន្ទីរបរិស្ថានរាជធានីខេត្តចូលរួមបណ្តុះកូនឈើ ហើយចែកជូនដល់ប្រជាសហគមន៍យ៉ាងហោចណាស់ឱ្យបាន១០ម៉ឺនដើមក្នុងមួយឆ្នាំដើម្បីចូលរួមក្នុងយុទ្ធនាការដាំដើមឈើនេះ។
ឯកឧត្តមរដ្ឋមន្រ្តី ក៏បានជំរុញឱ្យប្រជាពលរដ្ឋ ចូលរួមដាំដើមឈើ ស្តារព្រៃឈើ និងចូលរួមការពារអភិរក្សព្រៃឈើ និងបរិស្ថានធម្មជាតិ ដើម្បីបង្កើនគម្របព្រៃ និងអាចលក់កាបូន ដើម្បីអាចបង្កើនប្រាក់ចំណូលនៅក្នុងសហគមន៍៕
ដោយ៖គឹម យុត្ថារ៉ូ
