អ៊ីស្រាអែលប្រកាសឡោមព័ទ្ធទីក្រុងហ្គាហ្សាទាំងស្រុង ខណៈសហរដ្ឋអាមេរិកជំរុញឱ្យការពារអាយុជីវិតជនស៊ីវិល
ហ៊្សេរុយសាឡឹម៖ កងទ័ពជើងគោកអ៊ីស្រាអែលឡោមព័ទ្ធទីក្រុងហ្គាហ្សា ដ៏រឹងមាំរបស់ក្រុមហាម៉ាសបានទាំងស្រុងហើយ នៅក្នុងថ្ងៃសុក្រសប្តាហ៍នេះ បន្ទាប់ពីសម្ព័ន្ធមិត្តជិតស្និទ្ធរបស់ខ្លួន គឺសហរដ្ឋអាមេរិកជំរុញឱ្យចាត់វិធានជាក់ស្តែង ដើម្បីកាត់បន្ថយចំនួនជនស៊ីវិលបាត់បង់ជីវិត។
មុនដំណើរទស្សនកិច្ចរបស់រដ្ឋមន្រ្តីការបរទេសអាមេរិក លោក អាន់ថូនី ប្លីងគែន មកកាន់ប្រទេសអ៊ីស្រាអែល យោធារបស់ប្រទេសនេះបានបញ្ជាក់ថា ខ្លួនបាន “បញ្ចប់ការឡោមព័ទ្ធ” ទីក្រុងហ្គាហ្សាទាំងស្រុង ដែលនេះជាសញ្ញានៃដំណាក់កាលថ្មីមួយ នៅក្នុងសង្គ្រាមរយៈពេលមួយខែ ប្រឆាំងនឹងក្រុមហាម៉ាស។
![](https://asset.ams.com.kh/central/media/2023/11/photo_2023-11-03_13-16-06-1024x682.jpg)
ជាមួយគ្នានេះ នាយករដ្ឋមន្ត្រីអ៊ីស្រាអែល លោក ប៊ិនចាមីន ណឺតាន់យ៉ាហ៊ូ នៅថ្ងៃព្រហស្បតិ៍សប្តាហ៍នេះ បានសាទរចំពោះជ័យជម្នះកន្លងមក ដោយប្រាប់ក្រុមទាហានឥស្សរជនថា កងកម្លាំងអ៊ីស្រាអែលកំពុងរីកចម្រើននៅលើសមរភូមិ ទោះបីជាមានការលះបង់ដ៏ឈឺចាប់ក៏ដោយ។
ឆ្លើយតបនឹងការប្រកាសរបស់អ៊ីស្រាអែលខាងលើនេះ កងពលតូចអាល់កាសឹម (Al-Qassam) របស់ក្រុមហាម៉ាស ក៏បានព្រមានដែរថា ទាហានឈ្លានពានអ៊ីស្រាអែលនឹងត្រូវត្រឡប់ទៅផ្ទះវិញ ដោយត្រូវច្រកនៅក្នុងថង់ដាក់សព។ បើតាមអ្នកនាំពាក្យក្រុមហាម៉ាស ហ្គាហ្សានឹងក្លាយជាទីតាំងបណ្តាសាប្រវត្តិសាស្រ្តសម្រាប់អ៊ីស្រាអែល។
![](https://asset.ams.com.kh/central/media/2023/11/photo_2023-11-03_13-16-10-1024x682.jpg)
ចំណែកយោធាអ៊ីស្រាអែលវិញ បានពណ៌នាទីក្រុងហ្គាហ្សាថា ជា «មជ្ឈមណ្ឌលនៃអង្គការភេរវកម្មហាម៉ាស»។ ប៉ុន្តែវាក៏ជាផ្ទះរបស់ប្រជាជនប៉ាឡេស្ទីនប្រហែលកន្លះលាននាក់ ដែលបានស៊ូទ្រាំរស់នៅជាមួយការទម្លាក់គ្រាប់បែកពីលើអាកាសជាច្រើនសប្តាហ៍, ការផ្គត់ផ្គង់ជំនួយមនុស្សធម៌ថយចុះ និងការសម្លាប់រង្គាលប្រចាំថ្ងៃ៕
![](https://asset.ams.com.kh/central/media/2023/11/photo_2023-11-03_13-16-11-1024x682.jpg)
![](https://asset.ams.com.kh/central/media/2023/11/photo_2023-11-03_13-16-11-2-1024x682.jpg)
ប្រភព៖ AFP ប្រែសម្រួលដោយ៖ ឈឹម ទីណា