ស្ថានភាពរស់នៅក្នុងតំបន់កាហ្សាកាន់តែអាប់អួ ខណៈការវាយលុករបស់អ៊ីស្រាអែលកាន់តែខ្លាំង
កាហ្សា៖ ប្រជាជនប៉ាឡេស្ទីនដែលរស់នៅតំបន់កាហ្សា កំពុងជ្រកកោនដោយការភ័យខ្លាច ពីការទម្លាក់គ្រាប់បែករបស់អ៊ីស្រាអែល។ការទម្លាក់គ្រាប់ដូចគេស្រោចនោះបានសម្លាប់ជីវិតមនុស្សអស់រាប់ពាន់នាក់ ។រីឯទឹកស្អាតក៏កំពុងអស់ជាបណ្ដើរៗ ដែលធ្វើឱ្យពួកគេប្រឈមមុខនឹងបញ្ហាសុខភាពកាន់តែខ្លាំងឡើង។
ទីក្រុង Khan Younis ដែលស្ថិតនៅភាគខាងត្បូនៃតំបន់តំបន់កាហ្សាឯណោះ ក្មេងស្រីម្នាក់ឈ្មោះ Rafif Abu Ziyada បាននិយាយថា នាងកំពុងមានអាការៈឈឺក្រពះ និងឈឺក្បាល ដោយសារតែផឹកទឹកកខ្វក់។នាងបាននិយាយថា៖ «យើងគ្មានហ្គាសសម្រាប់ចម្អិនអាហារនោះទេ គ្មានទាំងទឹកញុំាគ្រប់គ្រាន់ផង ហើយដោយសារតែការហូបចុកយើងមិនស្អាត ជុំវិញខ្លួនយើងហ៊ុមព័ទ្ធទៅដោយធូលី និងផ្សែង ធ្វើឱ្យពួកយើងចាប់ផ្ដើមធ្លាក់ខ្លួនឈឺគ្រប់គ្នា។»
បើទោះបីជាប្រជាជនស៊ីវិលប៉ាឡេស្ទីនបានចាកចេញពីភាគខាងជើង ទៅកាន់ភាគខាងត្បូងនៃតំបន់កាហ្សាតាមការជូនដំណឹងរបស់អ៊ីស្រាអែលក្ដីក៏ប៉ុន្តែការរស់នៅទីនោះហាក់កាន់តែអាក្រក់ឡើង ដោយសារតែការអត់អាហារ។
លោក Juliette Touma អ្នកនាំពាក្យរបស់ទីភ្នាក់ងារអង្គការសហប្រជាជាតិបាននិយាយថា៖ «ទឹកត្រូវបានប្រើប្រាស់ជាអាវុធនៃសង្រ្គាម ដោយមនុស្សជាច្រើនកំពុងងាកទៅរកប្រភពទឹកដែលមិនស្អាត ពីព្រោះថាទឹកស្អាតនៅក្នុងតំបន់កាហ្សាគឺមិនមាន ឬមានក្នុងបរិមាណតិចតួចបំផុត»។
កាលពីដំបូងឡើយ អ៊ីស្រាអែលបានផ្តាច់ការផ្គត់ផ្គង់ទឹកទាំងអស់ទៅកាន់តំបន់កាហ្សា បន្ទាប់ពីថ្ងៃទី ៧ ខែតុលា ប៉ុន្តែក៏បានអះអាងថាខ្លួនបានស្ដារវាឡើងវិញនៅតំបន់ភាគខាងត្បូង ដោយបើកឡើងវិញនូវបណ្តាញផ្គត់ផ្គង់ទឹក ២៨.៥ លានលីត្រក្នុងមួយថ្ងៃ។
មន្ត្រីយោធាអ៊ីស្រាអែលបានបញ្ជាក់បន្ថែមថា មានទឹកគ្រប់គ្រាន់ និងការផ្គត់ផ្គង់ផ្សេងទៀតសម្រាប់ប្រជាជនស៊ីវិលទាំងអស់ ហើយពួកគេកំពុងធ្វើការយ៉ាងជិតស្និទ្ធជាមួយភ្នាក់ងារអង្គការសហប្រជាជាតិទាំងអស់ដើម្បីតាមដានស្ថានភាពមនុស្សធម៌។
ប៉ុន្តែស្ថានភាពជាក់ស្ដែង គឺម៉ាស៊ីនបូមទឹកដើម្បីទាញយកទឹកពីក្រោមដី និងរោងចក្របំប្លែងទឹកប្រៃ ទៅជាទឹកសាបនោះ មិនអាចដំណើរការបានដោយសារតែមិនមានភ្លើងអគ្គិសនី។
មិនត្រឹមតែប៉ុណ្ណោះ បរិយាកាសក្នុងទីក្រុងបានប្រែទៅជាអាប់អួរ មានតែផ្សែងពុលដែលចេញពីការ ទម្លាក់គ្រាប់បែក និងក្លិនស្អុយពាសពេញទីក្រុង។ ប្រជាជនស្លូតត្រង់ទាំងនោះត្រូវរស់នៅក្នុងភាព ស្រវេស្រវា ដោយហូបអ្វីដែលអាចហូបបាន និងត្រូវផឹកទឹកកខ្វក់ដើម្បីអាចរស់បាន៕
ដោយ៖ កែវ បុស្បា
