រថភ្លើងអណ្តែតទឹកនៅប្រទេសថៃ កំពុងទាក់ទាញភ្ញៀវទេសចរ
ថៃ៖ អ្នកជិះទូកម្នាក់កំពុងតែឈប់មើលរថភ្លើងដែលពោរពេញទៅដោយភ្ញៀវទេសចរ ឈប់នៅលើស្ពានដែលហាក់ដូចជាកំពុងអណ្ដែតលើផ្ទៃទឹកក្នុងខេត្តឡូបបូរី (Lopburi)។ អ្នកទេសចរជាច្រើនបានថតរូបលេងកម្សាន្ត និងរីករាយជាមួយទិដ្ឋភាពជុំវិញដែលពោរពេញទៅដោយផ្ទៃទឹកដ៏ស្រស់ស្អាត។
គួរដឹងដែរថា ដំណើរផ្សងព្រេងផ្លូវដែកកាន់តែមានប្រជាប្រិយភាពនៅក្នុងប្រទេសថៃ ដោយសារអ្នកទេសចរហាក់កំពុងតែចង់ស្វែងរកបទពិសោធធ្វើដំណើរប្លែកៗ ក្រៅពីប្រាសាទ និងឆ្នេរដែលមានមនុស្សច្រើនកុះករ។
កាលពីថ្ងៃសៅរ៍ទី៤ ខែវិច្ឆិកា ផ្លូវដែករដ្ឋរបស់ប្រទេសថៃបានចាប់ផ្តើមបើកដំណើរការជាលើកដំបូង ដោយរត់ចាប់ពីទីក្រុងបាងកកទៅកាន់ទំនប់ប៉ាសាក់ចូឡាសិទ្ធ (Pasak Jolasid) ដើម្បីជាការអបអរដល់ការបញ្ចប់រដូវវស្សា។ គ្រាន់តែដល់ថ្ងៃបើកដំណើរការដំបូង អ្នកដំណើររាប់រយនាក់បានងើបពីព្រឹកព្រលឹមដើម្បីបានឡើងរថភ្លើងនៅស្ថានីយហួឡាំផូង (Hua Lamphong) នៅទីក្រុងបាងកក ដែលជាស្ថានីយមានអាយុកាលជាងមួយរយឆ្នាំមកហើយ។
ជាការកត់សម្គាល់ ភ្ញៀវទេសចរនៅថ្នាក់ទីបីនៃរថភ្លើងបានងើបចេញតាមបង្អួច ដើម្បីថតរូបស្រះឈូក ព្រៃឈើ ប្រាសាទ និងវាលស្រែយ៉ាងស្រស់ស្អាត។ ពួកគេទំនងជាកំពុងរីករាយនឹងទេសភាពស្រស់ស្រាយបែបធម្មជាតិ ហើយអ្នកខ្លះអង្គុយមើលជនជាតិថៃដែលតែងខ្លួនមានសក់ពណ៌ប្រផេះ កំពុងឡើងរថភ្លើងនៅឯទីក្រុងអយុធ្យា ដើម្បីលក់អំបោះទេពអប្សរ និងម្ហូបអាហារដូចជាឆាមួយប្រភេទដែលល្បីល្បាញនៅប្រទេសថៃ។
បីម៉ោងកន្លះបន្ទាប់ពីចាកចេញពីទីក្រុងបាងកក រថភ្លើងមួយនេះបានឆ្លងកាត់អាងស្តុកទឹកលើស្ពានជាបន្តបន្ទាប់ ហើយបានឈប់រយៈពេល ២០ នាទីដើម្បីឱ្យអ្នកដំណើរអាចថតផ្ដិតយករូបភាពទេសភាពយ៉ាងស្រស់ស្អាត។ ជាទូទៅ គេអាចមើលឃើញគោក្របីស៊ីស្មៅក្រោមស្ពាន ប៉ុន្តែចាប់ពីខែតុលាដល់ខែមករា កម្រិតទឹកបាននឹងកំពុងឡើងខ្ពស់ធ្វើឱ្យមើលទៅដូចរថភ្លើងកំពុងអណ្តែតនៅលើផ្ទៃទឹក។
អ្នកដំណើរម្នាក់ឈ្មោះថា លោក បារ៉ូ បាននិយាយថា ៖ «ខ្ញុំបានធ្វើដំណើរកម្សាន្ដបែបនេះច្រើនដងមកហើយ ហើយខ្ញុំមានគម្រោងនឹងធ្វើដំណើរបីដងទៀតក្នុងរដូវកាលនេះ»។ លោកបានសម្តែងការខកចិត្តដែលដំណើរកម្សាន្តនេះត្រូវបានផ្សព្វផ្សាយតែជាភាសាថៃ ដោយមិនមែនជាភាសាអង់គ្លេស ដូច្នេះហើយបានជាមិនសូវមានជនជាតិបរទេសច្រើនទេដែលបានដឹងពីបទពិសោធដ៏ពិសេសមួយនេះ។ លោកបានពិពណ៌នាថា វាគឺជាឱកាសដំណើរកម្សាន្តដ៏អស្ចារ្យមួយដែលមនុស្សភាគច្រើនបានខកខានមិនបានមកលេង។
ក្មេងស្រីវ័យ ១១ ឆ្នាំម្នាក់ឈ្មោះថា លីលី ភិរ៉ាតឆាគិត (Lily Piratchakit) បានចែករំលែកនូវការយល់ឃើញរបស់នាងថា នាងសប្បាយចិត្តណាស់ដែលអាចមានពេលវេលាល្អៗក្នុងការធ្វើដំណើរប្រចាំថ្ងៃជាមួយម្តាយរបស់នាង ហើយបានឃើញថាទិដ្ឋភាពទឹកគឺស្រស់ស្អាតណាស់ ហើយមើលទៅគឺដាច់កន្ទុយភ្នែកតែម្ដង។ នាងបានប្រាប់ទៅកាន់សារព័ត៌មាន AFP ថា «វាពិតជាអស្ចារ្យណាស់ ហើយក៏ជារឿងមួយដែលល្អក្នុងការដែលយើងអាចធ្វើដំណើរចេញក្រៅខ្លះ ដើម្បីទទួលបានខ្យល់អាកាសបរិសុទ្ធ»។
កញ្ញា វៃ វូ (Wei Wu) អាយុ ២១ ឆ្នាំដែលជានិស្សិផ្លាស់ប្ដូរកម្មវិធីសិក្សាមកពីតៃវ៉ាន់ បានសម្តែងការរំភើបចំពោះការថតរូបនៅលើផ្លូវរថភ្លើង។ នាងបាននិយាយទៅកាន់សារព័ត៌មាន AFP ថា «វាពិតជាឡូយណាស់។ វាជាលើកដំបូងរបស់ខ្ញុំដែលបានជិះរថភ្លើងនៅក្នុងប្រទេសថៃ។អ្នកទេសចរភាគច្រើនបានឃើញតែទិដ្ឋភាពធម្មតាៗរបស់ប្រទេសថៃប៉ុណ្ណោះ»។
បន្ទាប់មក អ្នកដំណើរមួយចំនួនបានទៅលេងនៅទំនប់ប៉ាសាក់ចូឡាសិទ្ធ និងទទួលទានអាហារនៅទីនោះ។ គួរបញ្ជាក់ថា ទំនប់នេះត្រូវបានសាងសង់ឡើងក្នុងគោលបំណងបម្រើដល់វិស័យកសិកម្ម និងការការពារទឹកជំនន់ ហើយវាកំពុងក្លាយជាកន្លែងទាក់ទាញភ្ញៀវទេសចរដ៏ពេញនិយម។ ជាទូទៅ ការធ្វើដំណើរតាមផ្លូវដែកទៅកាន់ទំនប់ទឹកនេះ មានការពេញនិយមជាពិសេសចាប់ពីខែវិច្ឆិកាដល់ខែមករា។
សម្រាប់កញ្ញា ម៉ែល ដែលមានអាយុ ២៨ឆ្នាំ និងមិត្តប្រុសរបស់នាង បានយល់ឃើញថា រថភ្លើងអណ្តែតទឹកបែបនេះ ធ្វើឱ្យមនុស្សគ្រប់គ្នាអាចសប្បាយរីករាយនឹងទេសភាពផ្ទៃទឹកដោយមិនចាំបាច់ទៅសមុទ្រនោះទេ។ នាងបាននិយាយបែបកំប្លែងថា «ខ្ញុំមិនចូលចិត្តសមុទ្រទេ ប៉ុន្តែមិត្តប្រុសរបស់ខ្ញុំចូលចិត្តវា ។ដូច្នេះហើយបានជាយើងមកទីនេះ»៕
ប្រែសម្រួល៖ធា សុណា
ប្រភពព័ត៌មាន៖ Channel NewsAsia All aboard Thailand’s ‘floating train’
