ជាង២ទសវត្សរ៍ក្នុងអំណាច លោក ពូទីន នឹងនៅតែបន្តឈរឈ្មោះបោះឆ្នោតឆ្នាំក្រោយ
មូស្គូ៖ទីភ្នាក់ងារសារព័ត៌មានរ៉យទ័របានរាយការណ៍ផ្ដាច់មុខកាលពីថ្ងៃអង្គារទី៧ ខែវិច្ឆិកា ដោយស្រង់សម្ដីប្រភព៦នាក់ថា មេដឹកនាំរុស្ស៊ី លោក វ្ល៉ាឌីមៀរ ពូទីន បានសម្រេចចិត្តថា នឹងបន្តឈរឈ្មោះក្នុងការបោះឆ្នោតប្រធានាធិបតីនៅខែមីនាឆ្នាំក្រោយ ដែលជាជំហាននយោបាយអាចឱ្យលោកបន្តកាន់អំណាចរហូតដល់ឆ្នាំ ២០៣០។
ប្រភពមិនបញ្ចេញឈ្មោះម្នាក់ ដែលបានដឹងពីគម្រោងរបស់លោក ពូទីន បានប្រាប់រ៉យទ័រថា ៖ «មានការសម្រេចចិត្តរួចហើយ ថាលោកនឹងឈរឈ្មោះ»។
ជាមួយគ្នានោះ ប្រភពមិនបញ្ចេញឈ្មោះមួយរូបទៀត ដែលដឹងព័ត៌មានចេញពីវិមានក្រឹមឡាំង បានបញ្ជាក់ថា ការសម្រេចចិត្តត្រូវបានធ្វើឡើង ហើយទីប្រឹក្សារបស់លោក ពូទីន កំពុងរៀបចំដំណើរការនេះ។ ប្រភព៣នាក់ផ្សេងទៀត ដែលមិនបញ្ចេញឈ្មោះដូចគ្នាដោយសារតែបញ្ហារសើបផ្នែកនយោបាយ ក៏បានបញ្ជាក់ពីការណ៍នេះដែរ។
បើតាមរ៉យទ័រ ទោះបីជាអ្នកការទូត អ្នកចារកិច្ច និងមន្ត្រីរុស្ស៊ីជាច្រើនរូបទៀតរំពឹងថា លោក ពូទីន នឹងបន្តកាន់អំណាចអស់មួយជីវិតក៏ដោយ ក៏រហូតមកទល់ពេលនេះ មិនទាន់មានការបញ្ជាក់ជាក់លាក់ណាមួយជាផ្លូវការ អំពីផែនការរបស់លោក ពូទីន ក្នុងការឈរឈ្មោះសម្រាប់ការបោះឆ្នោតឡើងវិញនោះដែរ។
ចំណែកឯ អ្នកនាំពាក្យវិមានក្រឹមឡាំង លោក ឌ្មីទ្រី ប៉េស្កូវ បាននិយាយថា លោក ពូទីន មិនទាន់បានថ្លែងអ្វីលើបញ្ហានេះទេ ដោយបន្ថែមថា យុទ្ធនាការការឈរឈ្មោះបោះឆ្នោត មិនទាន់ត្រូវបានប្រកាសជាផ្លូវការនៅឡើយ។
គួរបញ្ជាក់ថា លោក ពូទីន ដែលមានអាយុ ៧១ ឆ្នាំ បានឡើងកាន់តំណែងជាប្រធានាធិបតីបន្ទាប់បីលោក បូរីស យែលស៊ីន(Boris Yeltsin) នៅឆ្នាំ ១៩៩៩ ដោយលោកកាន់តំណែងជាប្រធានាធិបតីយូរជាងមេដឹកនាំរុស្ស៊ីណាៗទាំងអស់។
ក្រុមអ្នកការទូតនិយាយថា គ្មានគូប្រជែងខ្លាំងៗណាអាចគំរាមកំហែងឱកាសរបស់លោក ពូទីន ក្នុងការបោះឆ្នោតខាងមុខបានទេ ប្រសិនបើលោកឈរឈ្មោះម្ដងទៀត។ អតីតចារកម្ម KGB រូបនេះ ទទួលបានអត្រាចូលចិត្តពីអ្នកគាំទ្ររហូតដល់ទៅ ៨០ ភាគរយ បូកបញ្ជូលទាំងការគាំទ្រពីរដ្ឋ និងប្រព័ន្ធផ្សព្វផ្សាយរដ្ឋផ្សេងៗទៀត។ គេមើលឃើញថា នាពេលនេះ ស្ទើរតែគ្មានការប្រឆាំងជាសាធារណៈចំពោះការគ្រប់គ្រងបន្តរបស់លោក។
ជាមួយគ្នានោះ ក្រោយពន្លត់ភ្លើងនៃការបះបោរប្រដាប់អាវុធដែលរៀបចំឡើងដោយមេដឹកនាំក្រុមទាហានស៊ីឈ្នួលវ៉ាក់ណែកាលពីខែមិថុនា លោក ពូទីន បានបញ្ចេញសកម្មភាពដើម្បីទាញការគាំទ្រដ៏រឹងមាំពីកងកម្លាំងសន្តិសុខ កងកម្លាំងប្រដាប់អាវុធ ក៏ដូចជាអ្នកបោះឆ្នោតមូលដ្ឋានដែលនៅខាងក្រៅទីក្រុងមូស្គូ។
វិស័យការពារជាតិ សព្វាវុធ និងការចំណាយថវិកាសរុបរបស់រុស្ស៊ីបានកើនឡើង ខណៈលោក ពូទីន បានបង្ហាញខ្លួនជាសាធារណៈជាច្រើនលើក រួមទាំងនៅក្នុងតំបន់ក្នុងរយៈពេលប៉ុន្មានខែថ្មីៗនេះ។
លោក ពូទីន ក៏នៅតែប្រឈមមុខនឹងបញ្ហាប្រឈមដ៏ធ្ងន់ធ្ងរបំផុតជាច្រើន។ សង្រ្គាមនៅអ៊ុយក្រែន បានបង្កឱ្យមានការប្រឈមមុខដាក់គ្នាដ៏ធំជាមួយលោកខាងលិច ចាប់តាំងពីវិបត្តិមីស៊ីលគុយបាឆ្នាំ១៩៦២ ហើយជាលទ្ធផល ទណ្ឌកម្មរបស់លោកខាងលិចបានធ្វើឱ្យសេដ្ឋកិច្ចរុស្ស៊ីទន់ខ្សោយ។
សេចក្តីព្រាងផែនការរបស់រដ្ឋាភិបាលរុស្ស៊ី បង្ហាញថា អតិផរណាបានកើនឡើង ខណៈប្រាក់រូប្លិ៍រុស្ស៊ី បានធ្លាក់ចុះចាប់តាំងពីសង្គ្រាមនៅអ៊ុយក្រែនផ្ទុះឡើង ហើយការចំណាយលើវិស័យការពារជាតិនឹងមានចំនួនជិត១/៣ នៃការចំណាយថវិកាសរុបរបស់រុស្ស៊ីក្នុងឆ្នាំ២០២៤។
លោកខាងលិច បានចាត់លោក ពូទីន ជាឧក្រិដ្ឋជនសង្គ្រាម និងជាជនផ្តាច់ការ ដែលបានដឹកនាំរុស្ស៊ីចូលទៅក្នុងការដណ្តើមយកទឹកដីតាមបែបចក្រពត្តិ ដែលបានធ្វើឱ្យរុស្ស៊ីចុះខ្សោយ ហើយបង្កើតភាពជារដ្ឋរបស់អ៊ុយក្រែន ខណៈបង្កការបង្រួបបង្រួមរបស់លោកខាងលិច និងធ្វើឱ្យអង្គការណាតូកាន់តែសកម្មជាងមុន។
ទោះជាយ៉ាងណាក៏ដោយ ប្រភពមួយបាននិយាយប្រាប់រ៉យទ័រ ថា រុស្ស៊ីកំពុងប្រឈមមុខនឹងកម្លាំងរួមរបស់លោកខាងលិច ដូច្នេះការផ្លាស់ប្តូរមេដឹកនាំដ៏ធំបែបនេះ នឹងមិនមែនជាការចាំបាច់នោះទេ ទោះបីជាមានការប្រឆាំងក្នុងស្រុក នឹងរដ្ឋាភិបាលលោក ពូទីន ជាពិសេសជុំវិញសង្រ្គាមនៅអ៊ុយក្រែនក៏ដោយ៕
ប្រែសម្រួល៖ហួន ឌីណា
ប្រភព៖ https://www.reuters.com/world/europe/russias-putin-stay-power-past-2024-sources-say-2023-11-06/
