ភ្នំពេញ៖ លោក Min Sungki ប្រធាន វិទ្យាស្ថានសិល្បៈភ្នំពេញអន្តរជាតិ សញ្ជាតិកូរ៉េខាងត្បូង វ័យ៧៨ឆ្នាំ បានបញ្ជាក់ក្នុងបទសម្ភាសជាមួយអ្នកសារព័ត៌មាន ក្រោយបញ្ចប់ការប្រកួតកីឡាវាយសីអាយុក្រោម ១៧ឆ្នាំថា លោក និងភរិយាគឺអ្នកស្រី Lee Chanhee ដែលជា អ្នកដឹកនាំ វិទ្យាស្ថានសិល្បៈភ្នំពេញអន្តរជាតិ នឹងរៀបចំការប្រកួតដណ្តើមពានរង្វាន់កីឡាវាយសីម្តងទៀត នៅឆ្នាំ២០២៤ បន្ទាប់ពីបញ្ចប់ការប្រកួតឆ្នាំ២០២៣ ទទួលបានលទ្ធផលជោគជ័យលើសការរំពឹងទុក។

«ការប្រកួតវាយសីឆ្នាំ២០២៣នេះពិតជាអស្ចារ្យណាស់សម្រាប់ខ្ញុំ ដែលបានឃើញសិស្សានុសិស្សមកពីជា២០សាលារៀនចូលរួមការប្រកួតប្រជែង»។ លោក Min Sungki និយាយដូច្នេះ ហើយលោកបានបន្តថាការចូលរួមរបស់សិស្សទាំងគឺមានសារៈសំខាន់ជួយឱ្យមានសុខភាពល្អ និងការគិតបានលូតលាស់លឿនផងដែរ។

លោក Sungki បានបន្ថែថាការលេងកីឡានេះមិនមានអ្វីប៉ះពាល់ដល់ការសិក្សារបស់សិស្សឡើយពោលគឺវាបានជួយពង្រឹងផ្នែកស្មារតី និងការគិតរបស់សិស្សបានលឿន។ «នៅក្នុងការលេងកីឡា និងការអប់រំសិស្សានុសិស្សគាត់ទទួលបានល្អពិសេសការសិក្សារបស់គាត់ទទួលបានលទ្ធផលល្អ»។

សម្រាប់ការបង្កើតព្រឹត្តិការណ៍ប្រកួតកីឡាវាយសី(Inter-School Badminton Tournament)នេះឡើងលោក Min Sungki បញ្ជាក់ថាគឺដើម្បីចងសម្ព័ន្ធភាពជាមួយសាលាផ្សេងទាំងរដ្ឋ និងឯកជនក្នុងប្រទេសកម្ពុជា ដើម្បីបណ្តុះនូវធនធានកីឡា និងការអប់រំ ដើម្បីឱ្យវិស័យទាំងពីរដើរទន្ទឹមគ្នាទៅមុខ។ មិនត្រឹមតែប៉ុណ្ណោះសម្រាប់គោលបំណងរបស់លោក Sungki និងភរិយា នឹងបង្កើតពានរង្វាន់ផ្សេងៗទៀតដូចជា តេន្នីស វាយកូណឃ្លីលើតុ ជាដើម ហើយក៏នឹងនាំយកនូវសិល្បៈបញ្ចូលផងដែរ។

ចំណែកអ្នកស្រី Lee Chanhee បានសម្តែងអារម្មណ៍សប្បាយរីករាយនូវពេលការបង្កើតព្រឹត្តិការណ៍ប្រកួតវាយលើកដំបូងមានការចូលរួមពីសិស្សានុសិស្សដ៏ច្រើន ហើយអ្នកស្រី Chanhee សន្យាថានឹងនាំព្រឹត្តិការណ៍នេះមកវិញម្តងទៀតនៅឆ្នាំ២០២៤ ហើយអ្នកស្រីក៏រំពឹងថាមានការចូលរួមពីសិស្សឱ្យបានច្រើនជាងការប្រកួតក្នុងឆ្នាំ២០២៣។

សូមបញ្ជាក់ថា ការប្រកួតកីឡាវាយសី (Inter-School Badminton Tournament) ឆ្នាំ២០២៣ មានសិស្សានុសិស្សចូលរួមសរុប ៥២នាក់ មកពី ២០សាលារដ្ឋ និង ឯកជន៕

រូបភាព អត្ថបទ ៖ ជាវ ចន្ធូ