ព្រុចសែល៖ ប្រធានគោលនយោបាយការបរទេសរបស់សហភាពអឺរ៉ុប លោក Josep Borrell បាននិយាយថា អឺរ៉ុបបានផ្តល់ជំនួយយោធាដោយផ្ទាល់ ដល់អ៊ុយក្រែន ក្នុងទំហំទឹកប្រាក់ ២៧ពាន់លានអឺរ៉ូ ស្មើនឹងជិត២៩ពាន់លានដុល្លារអាមេរិក ចាប់តាំងពីឆ្នាំមុនមក។ លោកបានអះអាងថា នេះគឺជាទំហំជំនួយខ្ពស់បំផុត មិនធ្លាប់មាន។

ថ្លែងទៅកាន់អ្នកសារព័ត៌មាន នៅមុនកិច្ចប្រជុំរបស់សហភាពអឺរ៉ុប (EU) នៅទីក្រុងព្រុចសែល ប្រទេសបែលហ្ស៊ិក កាលពីថ្ងៃចន្ទ ដើមសប្តាហ៍នេះ លោក Borrell បានគូសបញ្ជាក់សង្កត់ធ្ងន់ថា ទោះបីជាមានអំពើហិង្សាកើតឡើងជាថ្មី នៅមជ្ឈិមបូព៌ាក៏ដោយ ក៏បណ្តារដ្ឋជាសមាជិករបស់សហភាពអឺរ៉ុបមិនគួរ «ភ្លេចអំពីអ៊ុយក្រែនទេ» ។

លោក Borrell បានបន្តថា «ការគាំទ្ររបស់យើងកំពុងកើនឡើង ..ខ្ញុំអាចប្រាប់អ្នកទាំងអស់គ្នាថា វាបានឈានដល់កម្រិត ២៧ ពាន់លានអឺរ៉ូ នៃការគាំទ្រផ្នែកយោធា»

លោកបានបន្ថែមទៀតថា «វាគឺជាតួលេខខ្ពស់បំផុតដែលមិនធ្លាប់មាន..យើងបន្តបណ្តុះបណ្តាលទាហានអ៊ុយក្រែន ហើយ យើងបន្តនៅពីក្រោយអ៊ុយក្រែន» ។

យ៉ាងណាមិញ ខណៈពេលសហភាពអឺរ៉ុប គ្រោងនឹងពិភាក្សាអំពីជំនួយបន្ថែមដល់អ៊ុយក្រែន ក៏មាន ប្រទេសជាសមាជិកមួយចំនួនត្រូវបានគេរាយការណ៍ថា បានជំទាស់នឹងផែនការនេះ៕ ប្រភពពី RT ប្រែសម្រួល៖ លន់ សារ៉ាត