ភ្នំពេញ៖ រដ្ឋមន្ត្រីក្រសួងអធិការកិច្ច និងភាគីចិនបង្ហាញការប្ដេជ្ញាចិត្តក្នុងការពង្រឹង​បន្ថែមទៀត​នូវក្របខ័ណ្ឌ “កិច្ចសហប្រតិបត្តិការត្បូងពេជ្រ” និងធ្វើឱ្យស៊ីជម្រៅនូវការកសាង​សហគមន៍វាសនា​រួមកម្ពុជា-ចិន ក្នុងយុគសម័យថ្មី។ ដោយក្នុងនោះ ឯកឧត្តម ហួត ហាក់ រដ្ឋមន្ត្រីក្រសួងអធិការកិច្ច បានគូសបញ្ជាក់អំពីកិច្ចសហប្រតិបត្តិការរវាងកម្ពុជា និងចិន លើគ្រប់វិស័យមានជាអាទិ៍ ការទូត ពាណិជ្ជកម្ម កសិកម្ម សុខាភិបាល សន្តិសុខ ហេដ្ឋារចនា​សម្ព័ន្ធ និងអប់រំ ជាពិសេសជំនួយរបស់ភាគីចិននៅក្នុងអំឡុងពេលវិបត្តិន ជំងឺកូវីដ ១៩។

ក្នុងជំនួបពិភាក្សាការងារជាមួយ លោក កាវ ជាន ប្រធានក្រុមប្រឹក្សាភិបាលសមាគមកម្ពុជា-ចិន និងសហការី នារសៀលថ្ងៃទី១៤ ខែវិច្ឆកា ឆ្នាំ២០២៣ ឯកឧត្តម ហួត ហាក់ បានលើកឡើង​ពីស្ថាន​ភាពនយោបាយដែលមានសភាពល្អប្រសើរលើគ្រប់ទិដ្ឋភាព រួមមាន៖ នយោបាយ សង្គម សេដ្ឋកិច្ច ព្រមទាំងបេសកកម្ម ផែនការការងារ និងរចនាសម្ព័ន្ធរបស់ក្រសួង ព្រមទាំង​បាន​ជម្រាបជូន លោកប្រធានក្រុមប្រឹក្សាភិបាល អំពីភាពចាំបាច់ក្នុងការប្ដូរឈ្មោះពី « ក្រសួងទំនាក់ទំនង ជាមួយរដ្ឋសភា-ព្រឹទ្ធសភា និងអធិការកិច្ច » ទៅជា « ក្រសួងអធិការកិច្ច ” ក្នុងគោលដៅឆ្លើយតប និងស្របទៅតាមកម្មវិធី នយោបាយរបស់​រាជរដ្ឋាភិបាលនីតិកាល​ទី៧នៃរដ្ឋសភា និងយុទ្ធសាស្ត្របញ្ចកោណ-ដំណាក់កាលទី១ ដែលបាន ដាក់ចេញដោយ​រាជរដ្ឋាភិបាល​ក្រោមការដឹកនាំដ៏ឈ្លាសវៃរបស់ សម្ដេចមហាបវរធិបតី ហ៊ុន ម៉ាណ នាយករដ្ឋមន្ត្រី នៃព្រះរាជាណាចក្រកម្ពុជា។ ជាពិសេស ឯកឧត្តម អបអរសាទរខួបអនុស្សាវរីយ៍​លើកទី៦៥ នៃទំនាក់ទំនងការទូត និងឆ្នាំមិត្តភាពកម្ពុជា-ចិន ដែលភាគីទាំងពីរ។

ឯកឧត្តមរដ្ឋមន្ត្រី បានសំណូមពរ លោកប្រធានក្រុមប្រឹក្សាភិបាល បន្តជួយគាំទ្រសម្ភារៈ មួយចំនួនដែលសមាគមបានជួយនាពេលកន្លងមក និងស្នើសុំពិនិត្យលទ្ធភាពចុះអនុស្សរណៈ​នៃការយោគយល់គ្ន រវាងក្រសួងអធិការកិច្ច និងសមាគមកម្ពុជា ចិន ដើម្បីផ្លាស់ប្ដូរការអប់រំ ដែលផ្តោតជាអាទិ៍លើ អាហារូបករណ៍ វគ្គបណ្តុះបណ្តាល និងជំនួយសម្ភារៈបច្ចេកវិទ្យាផ្សេងៗ។

ជាការឆ្លើយតប លោក កាវ ជាន បានបង្ហាញពីគោលបំណង សកម្មភាព ដៃគូសហការរបស់​សមាគម និងការផ្តល់អាហារូបករណ៍ផ្សេងៗដល់កម្ពុជា កម្រិតមធ្យមសិក្សា២កន្លែង ឧត្តមសិក្សា​២៥០កន្លែង និងគាំទ្រជំនួយអប់រំ (Smart Classroom) ចំនួន៦៥សាលា ជាសាលា​មិត្តភាព​កម្ពុជា-ចិន សម្រាប់ខួបទំនាក់ទំនង៦៥ឆ្នារវាងកម្ពុជា-ចិន។ លោកប្រធានក្រុម​ប្រឹក្សាភិបាល រីករាយស្វាគមន៍ទទួល យកសំណើខាងលើ៕ ដោយ ថេត វិចិត្រ+ហេង សម្បត្តិ