ថៃ៖រដ្ឋាភិបាលថៃនឹងកោះប្រជុំនៅថ្ងៃសុក្រក្នុងសប្ដាហ៍នេះ ដើម្បីដោះស្រាយបញ្ហានយោបាយ ក៏ដូចជាពិភាក្សាអំពីវិសោ​ធនកម្មរដ្ឋធម្មនុញ្ញ ដែលបានស្នើឡើង រួមទាំងពិនិត្យមើលទៅលើគោលការណ៍ «ភាគច្រើនទ្វេដង» (Double-Majority) ដែលមានន័យថា ការធ្វើវិសោធនកម្មរដ្ឋធម្មនុញ្ញអាចស្នើទៅបានដោយត្រូវមានសំឡេងគាំទ្រភាគច្រើនពីចំនួនអ្នកបោះឆ្នោតសរុបដែលបានចុះឈ្មោះបោះឆ្នោត និងសំឡេងភាគច្រើននៃអ្នកដែលបានទៅបោះឆ្នោតជាក់ស្ដែង។ គោលការណ៍នេះត្រូវបានគេមើលឃើញថា ជាឧបសគ្គរារាំងការស្នើវិសោធនកម្មរដ្ឋធម្មនុញ្ញ។​

ឧបនាយករដ្ឋមន្ត្រី លោក ភូមិថាំ វិឆាយ៉ាឆៃ (Phumtham Wechayachai) ដែលដឹកនាំគណៈកម្មាធិការរដ្ឋាភិបាលបានលើកឡើងកាលពីថ្ងៃចន្ទថា ខ្លួននឹងកោះប្រជុំសមាជិករដ្ឋាភិបាលនៅថ្ងៃសុក្រ ដើម្បីពិនិត្យឡើងវិញនូវមតិយោបល់ស្ដីពីអនុគណៈកម្មាធិការដែលគ្រប់គ្រងដោយលោក នីកន ចាំណង (Nikorn Chamnong) និងដែលកំពុងធ្វើការវា​យ​តម្លៃលើដំណើរការបោះឆ្នោតប្រជាមតិ។​

កិច្ចប្រជុំនេះនឹងត្រូវធ្វើឡើងដើម្បីពិភាក្សាអំពីព័ត៌មានលម្អិតដូចជា ការបោះឆ្នោតប្រជាមតិនាពេលខាងមុខ ការធ្វើវិសោធនកម្មរដ្ឋធម្មនុញ្ញជាក់លាក់ណាមួយ ចំនួននៃប្រជាមតិដែលត្រូវការដើម្បីវិសោធកម្មស្របច្បាប់ និងថវិកាសម្រា​ប់រៀបចំចំណាយទៅលើការធ្វើប្រជាមតិនេះ។​

លោកឧបនាយករដ្ឋមន្ត្រី​បាន​បដិសេធមិនធ្វើការព្យាករអំពីលទ្ធផល​នៃ​កិច្ចប្រជុំ​ដែលនឹងធ្វើឡើងនៅថ្ងៃសុក្រខាងមុខនេះ​នោះទេ​។ យ៉ាង​ណា​ក៏​ដោយ លោក​បាន​បង្ហាញ​ទំនុក​ចិត្ត​ថា បញ្ហាសំខាន់ៗ​ខាងលើ​នឹង​ត្រូវ​បាន​ដោះ​ស្រាយ​ឱ្យបានមុន​ដំណាច់​ឆ្នាំ ហើយ​បង្ហាញ​ទៅ​គណៈរដ្ឋមន្ត្រី​ដើម្បី​ត្រួតពិនិត្យ​នៅ​ត្រីមាស​ដំបូង​នៃ​ឆ្នាំ​២០២៤។​

លោក​បាន​លើក​ឡើង​ដោយ​សុទិដ្ឋិនិយម​ថា​ ៖ «​ខ្ញុំសង្ឃឹមថា យើងនឹងអាច​បញ្ចប់​រឿង​នេះ​នៅ​ខែមករា ឆ្នាំ​ក្រោយ​»។ ដោ​យឡែក លោក នីកន បានលើកឡើងពីការព្រួយបារម្ភ អំពីផលប៉ះពាល់នៃច្បាប់ប្រជាមតិលើដំណើរការវិសោធនកម្ម ជាពិសេសត្រង់ផ្នែកទី១៣ ដែលបានចែងអំពីលក្ខខណ្ឌជាក់លាក់ចំនួនពីរដែលត្រូវតែបំពេញ មុនពេលលទ្ធផលប្រជាមតិអាចចាត់ទុកថាមានប្រសិទ្ធភាពបាន។​

លក្ខខណ្ឌដែលមានចែងក្នុងផ្នែកទី១៣ រួមមានទិដ្ឋភាពសំខាន់ៗចំនួនពីរ៖ ទីមួយ ប្រជាពលរដ្ឋដែលមានសិទ្ធិបោះឆ្នោតលើសពី ៥០% ត្រូវតែចូលរួមក្នុងការបោះឆ្នោតប្រជាមតិ និងទីពីរ សំឡេងភាគច្រើននៃអ្នកដែលបានបោះឆ្នោត ត្រូវតែជាសំឡេងគាំទ្រឱ្យធ្វើវិសោធនកម្ម។​

លោក នីកន បាន​បង្ហាញ​ពីកង្វល់ជុំវិញ​បញ្ហា​ប្រឈម​នៃ​ការ​បំពេញ​តម្រូវ​ការ​នៃគោលការណ៍ «​ភាគ​ច្រើនទ្វេដង» ​នេះ។ លោកបានពន្យល់បន្ថែមថា ក្រោមច្បាប់ភាគច្រើនសាមញ្ញ (Simple Majority) អ្នកបោះឆ្នោតដែលមានសិទ្ធិបោះឆ្នោ​តយ៉ាងតិច ២៦ លាននាក់ក្នុងចំណោមជាង ៥២ លាននាក់ត្រូវតែចូលរួមបោះឆ្នោត ដើម្បីទទួលបានលទ្ធផលប្រជាមតិមួយដែលអាចចាត់ទុកថាយកជាការបាន។

បន្ថែមលើនេះ នៅក្រោមគោលការណ៍ «ភាគច្រើនទ្វេដង»​ យ៉ាងហោចណាស់គេត្រូវការ ១៣ លានសំឡេងគាំទ្រក្នុងចំ​ណោម ២៦ លាននាក់ជាចាំបាច់ក្នុងការដែលអាចស្នើឱ្យធ្វើវិសោធនកម្ម ដើម្បីឱ្យមានភាពស្របច្បាប់។ លោក នីកន បា​នរំលេចថា លោកនឹងលើកឡើងអំពីបញ្ហាលក្ខខណ្ឌនេះ នៅ​ក្នុង​អំឡុង​ពេល​នៃ​កិច្ច​ប្រជុំ​ខាង​មុខ។​

ទន្ទឹមនឹងនេះ លោក ពង្សសាថន សនផេតណារិន (Pongsathorn Sornpetnarin) សមាជិកសភាខេត្តរ៉ាក់យ៉ង (Rayong) មកពីគណបក្សឈានទៅមុខ (Move Forward Party) ក៏បានលើកឡើងពីការព្រួយបារម្ភអំពីផ្នែកទី១៣ នៃច្បាប់ប្រជាមតិនេះផងដែរ។ លោក​បាន​គូសបញ្ជាក់​ពី​ភាព​មិន​ត្រឹមត្រូវ​នៃលក្ខខណ្ឌនេះថា ប្រសិនបើមានយុទ្ធនាការ​មួយ​ដែលលើកទឹកចិត្ត​អ្នក​បោះឆ្នោត​យ៉ាងតិច ៥០% ​មិនឱ្យទៅបោះឆ្នោតប្រជាមតិ នោះការ​ផ្តួចផ្តើម​ធ្វើ​ប្រជាមតិនេះ​នឹង​ត្រូវ​បរាជ័យជាក់ជាមិនខាន។​

លោក ពង្សសាថន ដែលមាន​តួនាទីជាអនុប្រធានគណៈកម្មាធិការសភាទទួលបន្ទុកការអភិវឌ្ឍនយោបាយ និងការចូលរួមពីសាធារណៈជន បានស្នើថា កម្រិតចំនួនសំឡេងត្រឹម ២៥% គួរតែគ្រប់គ្រាន់ហើយដើម្បីអនុម័តវិសោធនកម្មនេះ៕

ប្រែសម្រួល៖ធា សុណា

ប្រភពព័ត៌មាន៖ Bangkok Post

Thai charter change panel to meet Friday amid obstruction fears