ប្រធានាធិបតីចិនប្រាប់ប្រធានាធិបតីបារាំងថា ចិនចង់បានការវិនិយោគបន្ថែមទៀតពីក្រុមហ៊ុនបារាំង
ប៉េកាំង៖លោក ស៊ី ជិនភីង (Xi Jinping) ប្រធានាធិបតីចិន កាលពីថ្ងៃទី២០ ខែវិច្ឆិកា ឆ្នាំ២០២៣បាននិយាយថា ប្រទេសចិនចង់ឱ្យក្រុមហ៊ុនបារាំងកាន់តែច្រើនមកបណ្តាក់ទុនរកស៊ីនៅក្នុងប្រទេសចិន ហើយសង្ឃឹមថា ប្រទេសបារាំងនឹងផ្តល់នូវបរិយាកាសធុរកិច្ចប្រកបដោយយុត្តិធម៌ និងមិនរើសអើងបណ្តាលក្រុមហ៊ុនចិន។
បើតាមសេចក្តីរាយការណ៍របស់ទូរទស្សន៍រដ្ឋចិន លោក ស៊ី បានធ្វើការអត្ថាធិប្បាយនៅក្នុងការសន្ទនាតាមទូរសព្ទជាមួយប្រធានាធិបតីបារាំង លោក អេមម៉ានូអែល ម៉ាក្រុង(Emmanuel Macron) ដោយផ្តោតលើការពង្រឹងទំនាក់ទំនងជាមួយដៃគូពាណិជ្ជកម្មអឺរ៉ុបរបស់ខ្លួន។ក៏ប៉ុន្តែបញ្ហាពេលបច្ចុប្បន្ននេះស្ថិតត្រង់ ប្រទេសចិនកំពុងប្រឈមនឹងការស៊ើបអង្កេតលើរថយន្តអគ្គិសនីរបស់ខ្លួនពីសំណាក់សហភាពអឺរ៉ុប និងការស៊ើបអង្កេតលើក្រុមហ៊ុនផលិតដែក។ ទន្ទឹមនឹងនោះ ប្រទេសអឺរ៉ុបមួយចំនួនបានត្អូញត្អែរអំពីច្បាប់ និងច្បាប់ស្រអាប់របស់ចិនទាក់ទងនឹងក្រុមហ៊ុនបរទេសរកស៊ីនៅក្នុងប្រទេសនេះ។
ក្នុងកិច្ចសន្ទនាដដែលនេះ លោក ស៊ី បានបញ្ជាក់ថា ប្រទេសចិនមានឆន្ទៈបង្កើនការផ្តោះប្តូរកម្រិតខ្ពស់ជាមួយភាគីបារាំង និងបានបន្ថែមទៀតថាលោកស្វាគមន៍ផលិតផលបារាំងកាន់តែច្រើនដែលចូលមកក្នុងទីផ្សារប្រទេសចិន។លោកក៏បាននិយាយផងដែរថា ប្រទេសចិនមានឆន្ទៈក្នុងការពង្រឹងកិច្ចសហប្រតិបត្តិការជាមួយប្រទេសបារាំងនៅអង្គការសហប្រជាជាតិ និងស្ថាប័នពហុភាគីផ្សេងទៀត។ ខណៈ ប្រទេសចិនបានចូលកាន់តំណែងជាប្រធានក្រុមប្រឹក្សាសន្តិសុខអង្គការសហប្រជាជាតិ (UNSC) ក្នុងខែនេះ។
មេដឹកនាំនៃមហាអំណាចសេដ្ឋកិច្ចទីពីររបស់ពិភពលោកក៏បានអំពាវនាវឱ្យប្រទេសបារាំងជួយដើរតួនាទីស្ថាបនាជំរុញការអភិវឌ្ឍន៍ជាវិជ្ជមាននៃទំនាក់ទំនងចិន-សហភាពអឺរ៉ុប ស្របពេលដែលទំនាក់ទំនងនៃភាគីទាំងពីរនេះកំពុងជាប់តានតឹងលើបញ្ហាជាច្រើនចាប់តាំងពីការជំរុញរបស់អឺរ៉ុបដើម្បីកាត់បន្ថយការពឹងផ្អែកលើខ្សែសង្វាក់ផ្គត់ផ្គង់ពីសំណាក់ប្រទេសចិនចំពោះសង្គ្រាមនៅអ៊ុយក្រែនជាដើម។
លោក ស៊ី បានអំពាវនាវថា ប្រទេសចិន និងសហភាពអឺរ៉ុបគួរតែនៅតែជាដៃគូសម្រាប់កិច្ចសហប្រតិបត្តិការដែលមានផលប្រយោជន៍ទៅវិញទៅមក។
ក្រៅពីសេដ្ឋកិច្ច ទូរទស្សន៍រដ្ឋបានរាយការណ៍ថាមេដឹកនាំទាំងពីរក៏បានផ្លាស់ប្តូរទស្សនៈស្តីពីជម្លោះនៅហ្គាហ្សា ហើយបានព្រមព្រៀងគ្នាថាចាំបាច់ត្រូវតែជៀសវាងស្ថានភាពកាន់តែយ៉ាប់យ៉ឺនបន្ថែមទៀត ជាពិសេសវិបត្តិមនុស្សធម៌ធ្ងន់ធ្ងរ៕
ដោយ៖ស្រ៊ុន សិរីវឌ្ឍនៈ
ប្រភព៖ China wants more investment from French firms, Xi tells Macron
