ក្រុមហ៊ុនចិនកែច្នៃប្រេងឆាប្រើរួច ទៅជាប្រេងឥន្ធនៈយន្តហោះ
ប៉េកាំង៖ នៅក្នុងភោជនីយដ្ឋានទំនើបមួយ ក្នុងទីក្រុងឆឹងទូ ប្រទេសចិន អ្នកចូលចិត្តពិសារអាហារក្តៅៗ បានជ្រលក់សាច់ និងបន្លែ ចូលទៅក្នុងឆ្នាំងស៊ុប ដែលមានខ្លាញ់ និងរសជាតិហិល ភាគច្រើនមិនដឹងថា របស់ដែលនៅសេសសល់ពីពួកគេ នឹងត្រូវយកធ្វើជាប្រេងឥន្ធនៈយន្តហោះនោះទេ។
ស្របពេលដែលភោជនីយដ្ឋានក្នុងទីក្រុងឆឹងទូ បោះចោលប្រេងឆាប្រើរួចប្រមាណ ១៥០,០០០តោនជារៀងរាល់ឆ្នាំនោះ ក្រុមហ៊ុនធុរកិច្ចក្នុងស្រុកមួយឈ្មោះថា Sichuan Jinshang Environmental Protection បានរកឃើញទីផ្សារពិសេសមួយ ដើម្បីកែច្នៃកាកសំណល់ជាតិខ្លាញ់ ហើយនាំចេញវាទៅធ្វើជាប្រេងឥន្ធនៈបម្រើដល់វិស័យអាកាសចរណ៍។
![](https://asset.ams.com.kh/central/media/2023/11/photo_2023-11-21_14-47-52-1024x681.jpg)
លោក Ye Bin ដែលជាអ្នកគ្រប់គ្រងទូទៅរបស់ក្រុមហ៊ុននេះ បាននិយាយថា ក្រុមហ៊ុនរបស់លោក ដែលបានបើកដំណើរការក្នុងឆ្នាំ ២០១៧ ឥឡូវនេះកំពុងផលិតប្រេងថ្នាក់ឧស្សាហកម្មរហូតដល់ ១៥០,០០០តោនក្នុងមួយឆ្នាំ ពីការរួមសហការគ្នាជាមួយភោជនីយដ្ឋាន Hotpot និងភោជនីយដ្ឋានផ្សេងទៀតទូទាំងទីក្រុងឆឹងទូ រួមទាំងហាង KFC ផងដែរ។
ប្រេងឆាដែលឆ្លងកាត់ដំណើរការចម្រាញ់រួច ត្រូវបាននាំចេញទៅកាន់អតិថិជនមានមូលដ្ឋានជាចម្បងនៅអឺរ៉ុប, សហរដ្ឋអាមេរិក និងសិង្ហបុរី ដែលជាប្រទេសកែច្នៃវាបន្ថែមទៀត ដើម្បីបង្កើតនូវអ្វីដែលអ្នកនៅក្នុងឧស្សាហកម្មហៅថា “ឥន្ធនៈអាកាសចរណ៍ប្រកបដោយនិរន្តរភាព” (SAF)។ SAFs មានសារសំខាន់ ក្នុងការកំចាត់កាបូនឌីអុកស៊ីត (CO2) ពីវិស័យអាកាសចរណ៍ ដែលរ៉ាប់រងការបំភាយឧស្ម័ន CO2 ទាក់ទងនឹងថាមពលសកលចំនួន ២ភាគរយក្នុងឆ្នាំ ២០២២ នេះបើយោងតាមទីភ្នាក់ងារថាមពលអន្តរជាតិ។
សម្រាប់ពេលអនាគត ក្រុមហ៊ុនធុរកិច្ច Jinshang មានគម្រោងពង្រីកទីតាំងផលិត “ឥន្ធនៈអាកាសចរណ៍ប្រកបដោយនិរន្តរភាព” (SAF) របស់ខ្លួនក្នុងពេលឆាប់ៗនេះ ដោយប្រើប្រាស់ឧបករណ៍របស់ក្រុមហ៊ុនអាមេរិក Honeywell ដើម្បីផលិតប្រេងឥន្ធនៈ ៣០០,០០០តោនក្នុងមួយឆ្នាំ៕
![](https://asset.ams.com.kh/central/media/2023/11/photo_2023-11-21_14-47-57-1024x682.jpg)
![](https://asset.ams.com.kh/central/media/2023/11/photo_2023-11-21_14-47-54-2-1024x681.jpg)
![](https://asset.ams.com.kh/central/media/2023/11/photo_2023-11-21_14-47-54-1024x681.jpg)
![](https://asset.ams.com.kh/central/media/2023/11/photo_2023-11-21_14-47-55-2-1024x681.jpg)
![](https://asset.ams.com.kh/central/media/2023/11/photo_2023-11-21_14-47-55-1024x681.jpg)
![](https://asset.ams.com.kh/central/media/2023/11/photo_2023-11-21_14-47-56-1024x682.jpg)
ប្រភព៖ AFP ប្រែសម្រួលដោយ៖ ឈឹម ទីណា