ហ្គាហ្សា៖ ប្រជាជនរស់នៅតំបន់ហ្គាហ្សា ដែលកំពុងរងការវាយប្រហារពីសំណាក់អ៊ីស្រាអែល បាននាំគ្នាជួសជុលកង់ចាស់ៗ ដើម្បីយកមកប្រើប្រាស់ ចំពេលខ្វះខាតប្រេងឥន្ទនៈ។

ប្រជាជនប៉ាឡេស្ទីន ដែលរស់នៅទីក្រុង Rafah ភាគខាងត្បូងតំបន់ ហ្គាហ្សា ត្រូវបានគេឃើញ កំពុងជួសជុលកង់ចាស់ៗរបស់ពួកគេ ដើម្បីធ្វើជាមធ្យោបាយដឹកជញ្ជូន។

ការធ្វើបែបនេះ ស្របពេលដែលមានកង្វះខាតប្រេងឥន្ធនៈ សម្រាប់ម៉ូតូ និងរថយន្ត ជាដើម ព្រោះតែការឡោមព័ទ្ធតំបន់ហ្គាហ្សាពីយោធាអ៊ីស្រាអែល ហើយក៏ចំពេលដែលសង្រ្គាម រវាងអ៊ីស្រាអែល និងក្រុមហាម៉ាស នៅតែបន្តកើនឡើង។

យ៉ាងណាមិញ កាលពីចុងសប្តាហ៍ ការបញ្ជូនឥន្ធនៈលើកដំបូងបានចូលទៅកាន់តំបន់ហ្គាហ្សា បន្ទាប់ពីការអន្តរាគមន៍ខ្លាំង ពីសហរដ្ឋអាមេរិកលើអ៊ីស្រាអែល ដែលអនុញ្ញាតឱ្យទំនាក់ទំនងឡើងវិញ នៅក្នុងទឹកដីហ្គាហ្សា។

មន្ត្រីអាមេរិកបាននិយាយថា តាមកិច្ចព្រមព្រៀង ប្រេងឥន្ធនៈ ៣៧០០០លីត្រត្រូវបានអនុញ្ញាតឲ្យចូល ក្នុងរយៈពេល ៤៨ម៉ោង ដែលក្នុងនោះ ២០០០០ លីត្រ នឹងត្រូវបានផ្តល់ជូនសម្រាប់ម៉ាស៊ីនភ្លើង ដើម្បីស្តារបណ្តាញទូរស័ព្ទឡើងវិញ៕

ប្រភពពី AFP ប្រែសម្រួល៖ សារ៉ាត