សម្តេចធិបតី បានអំពាវនាវពលរដ្ឋរួមគ្នាគោរពច្បាប់ចរាចរណ៍ ខណៈការស្លាប់ និងរបួសដោយគ្រោះថ្នាក់តាមដងផ្លូវនេះ មានមនុស្សស្លាប់ និងរបួសជារៀងរាល់ថ្ងៃ។ ប្រសាសន៍អំពាវនាវនេះ បានធ្វើឡើងក្នុងពិធីសម្ពោធដាក់ប្រើប្រាស់កំណាត់ផ្លូវជាតិលេខ៥ ដែលជាផ្លូវមានសេចក្តីរាយការណ៍ជារឿយៗ អំពីគ្រោះថ្នាក់ចរាចរណ៍។

គ្រោះថ្នាក់ចរាចរណ៍ គឺជាគ្រោះថ្នាក់កើតឡើងជាប្រចាំរៀងរាល់ថ្ងៃ និងគ្មានថ្ងៃណាមួយ ដែលកម្ពុជាមិនមានគ្រោះថ្នាក់តាមដងផ្លូវនោះទេ។ យោងតាមអគ្គស្នងការដ្ឋាននគរបាលជាតិ ក្នុងរយៈពេល៦ខែដើមឆ្នាំ២០២៣ គ្រោះថ្នាក់តាមដងផ្លូវបានសម្លាប់មនុស្ស ៧៥៦នាក់ និងមានអ្នករបួស ២ពាន់ ៧២នាក់។