៣ ខែ ក្រោយពីរាជរដ្ឋាភិបាលថ្មី ធ្វើការភ្លាម ធ្វើដោយសកម្ម ដោយឆន្ទៈមោះមុត និងប្រកបដោយចក្ខុវិស័យ ត្រឹមតែ ៣ខែ រាជរដ្ឋាភិបាលអាណត្តិទី ៧ សម្រេចបានលទ្ធផលធំធេងជូនជាតិ និងប្រជាពលរដ្ឋ
ភ្នំពេញ៖ ឯកឧត្តម ប៉ែន បូណា រដ្ឋមន្រ្តីប្រតិភូអមនាយករដ្ឋមន្រ្តី និងជាប្រធានអង្គភាពអ្នកនាំពាក្យរាជរដ្ឋាភិបាល បានមានប្រសាសន៍ថា៖ សមិទ្ធផលដែលសម្រេចបានគឺធំធេងហួសពីការស្មានពីព្រោះក្រោយពីរាជរដ្ឋាភិបាលកើតភ្លាម ធ្វើការភ្លាម ធ្វើដោយសកម្ម ដោយឆន្ទៈមោះមុត និងប្រកបដោយចក្ខុវិស័យ នៅក្រោយរៈពេល ៣ ខែនៃអាណត្តិ៥ ឆ្នាំ ដឹកនាំដោយសម្តេបវរមហាធិបតី ហ៊ុន ម៉ាណែត សម្រេចបានលទ្ធផលធំធេងជូនជាតិនិងប្រជាពលរដ្ឋ។
ឯកឧត្តម ប៉ែន បូណា គូសបញ្ជាក់ថាសមិទ្ធផលធំៗនោះរួមមាន ទី១៖ការរក្សាបាននូវសន្តិភាព ស្ថិរភាពសង្គមនយោបាយ សេដ្ឋកិច្ច និងដំណើរការជាប្រប្រតីនៃរដ្ឋបាលសាធារណៈ រួមទាំងការអភិវឌ្ឍ ។ រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត គឺធានាប្រប្រតីភាពគ្រប់យ៉ាង និងធានាការពារសមិទ្ធផលទាំងឡាយដែលរាជរដ្ឋាភិបាលសម្តេចតេជោកសាងឡើងមិនឱ្យបានត់បង់ ឬមិនមិនឱ្យសូម្បីតែការប្រែប្រួលជាអវិជ្ជមានណាមួយឡើយ។ នេះជាសមិទ្ធផលធំធេងដំបូងបង្អស់ ពីព្រោះប្រវត្តិសាស្ត្របានបង្ហាញហើយថា កម្ពុជាយើងពេលផ្លាស់ប្តូរអ្នកដឹកនាំម្តងៗតើប្រទេសជាតិជួបអ្វីខ្លះ? សង្គ្រាម បែកបាក់ កាប់សម្លាប់ សងសឹក….តែការផ្លាស់ប្តូរមេដឹកនាំលើកនេះ ជាការផ្លាស់ប្តូរជាប្រវត្តិសាស្ត្រ។
ទី២៖យុទ្ធសាស្ត្របញ្ចកោណ៖ក្នុងកិច្ចប្រជុំគណៈរដ្ឋមន្ត្រីលើកដំបូងកាលពីថ្ងៃទី២៤សីហាសម្តេចធិបតីប្រកាសគោលនយោបាយ«យុទ្ធសាស្ត្របញ្ចកោណដំណាក់កាលទី១» ដោយមានមុំ៥៖
១– គឺការអភិវឌ្ឍមូលធនមនុស្ស , ២– ការធ្វើពិពិធកម្មសេដ្ឋកិច្ច និងបង្កើនភាពប្រកួតប្រជែង, ៣– ការអភិវឌ្ឍវិស័យឯកជន និងការងារ, ៤– ការអភិវឌ្ឍប្រកបដោយភាពធន់ ចិរភាព និងបរិយាប័ន្ន, ៥– ការអិវឌ្ឍសេដ្ឋកិច្ច និងសង្គម ឌីជីថល
ឯកឧត្តម ប៉ែន បូណា បានគូសបញ្ជាក់បន្ថែមថា រាជរដ្ឋាភិបាលសម្តេចធិបតី ហ៊ុន ម៉ាណែត បានដាក់ចេញកម្មវិធីគោលនយោបាយអាទិភាព ៦យ៉ាងដែលត្រូវអនុវត្តជាបន្ទាន់ក្នុងឆ្នាំ ២០២៣៖ ( ផ្តល់ការថែទាំសុខភាពឆ្ពោះទៅការគ្របដណ្តប់ជាសាកល, ការបណ្តុះបណ្តាលជំនាញវិជ្ជាជីវៈបច្ចេកទេសជូនយុវជនមកពីគ្រួសារក្រីក្រ និងងាយរងហានិភ័យ, ពង្រឹងកម្មវិធីជាតិជំនួយសង្គមសម្រាប់គ្រួសារក្រីក្រ, យុទ្ធសាស្ត្រជាតិអភិវឌ្ឍន៍សេដ្ឋកិច្ចក្រៅប្រព័ន្ធ, លើកស្ទួយផលិតកម្មកសិកម្ម រកទីផ្សារ និងរក្សាលំនឹងតម្លៃ, ពង្រាយមន្ត្រីជំនាញបច្ចេកទេសកសិកម្ម)
១– សុខភាព៖ ការផ្តល់សេវាថែទាំសុខភាពជូនគ្រួសារងាយរងហានិភ័យ តាមរយៈកម្មវិធី២គឺ ទី១៖ ការពង្រីកមូលនិធិសមធម៌សុខាភិបាល និងទី២៖ ការពង្រីករបបសន្តិសុខសង្គមថែទាំសុខភាពតាមរបបភាគទានដោយស្ម័គ្រចិត្តសម្រាប់បុគ្គលស្វ័យនិយោជន៍ និងអ្នកក្នុងបន្ទុកនៃសមាជិក ប ស ស ( ទាំងសម្រាប់កម្មករ និយោជិត មន្ត្រីសាធារណៈ)។ កម្មវិធីទី១គឺ“ត្រូវបានប្រកាសដាក់ឱ្យអនុវត្តន៍កាលពីថ្ងៃទី២៤ តុលា ដែលនឹងផ្តល់ប្រយោជន៍ដល់គ្រួសារជនងាយរងហានិភ័យ”សរុបជាង ៤៩ ម៉ឺន គ្រួសារ ឬស្មើនឹងជាង ១.៨ លាន នាក់បន្ថែមទៀតដែលធ្វើឱ្យមូលនិធិសមធម៌គ្របដណ្តប់ប្រជាពលរដ្ឋជាង ៤លាននាក់ ។ ចំណែក កម្មវិធីទី២គឺ ការពង្រីករបបសន្តិសុខសង្គមថែទាំសុខភាពរបស់ ប.ស.ស តាមរបបភាគទានដោយស្ម័គ្រចិត្តត្រូវបានប្រកាសឱ្យប្រើកាលពីថ្ងៃទី១៣ វិច្ឆិកា ហើយកម្មវិធីនេះនឹងគ្របដណ្តប់ប្រជាពលរដ្ឋជាង ៥លាននាក់។ សរុបទៅ កម្មវិធីថែទាំសុខភាពទាំងពីរគ្របដណ្តប់ប្រជាពលរដ្ឋជាង ៩ លាននាក់។ ដូច្នេះ មានន័យថា សេវាថែទាំសុខភាពគ្របដណ្តប់ជាសាកលដែលជាគោលដៅរបស់សម្តេចធិបតីក្នុងកម្មវិធីគោលនយោបាយអាទិភាពទី១នេះនឹងឈានដល់គោលដៅក្នុងរយៈពេលមិនយូរខាងមុខនេះ។
២–ការបណ្តុះបណ្តាលជំនាញវិជ្ជាជីវៈនិងបច្ចេកទេស៖ ជូនយុវជនមកពីគ្រួសារក្រីក្រនិងងាយរងហានិភ័យ សរុបប្រមាណជា ១,៥ លាននាក់ទូទាំងប្រទេស ដោយឥតគិតថ្លៃ ហើយទទួលបានប្រាក់ឧបត្ថម្ភ ២៨០ ០០០ រៀលក្នុងមួយខែ។ ប្រកាសដាក់ចេញឱ្យអនុវត្តកាលពីថ្ងៃទី ១៤ វិច្ឆិកា ។ គោលដៅនៃការបណ្តុះបណ្តាលជំនាញវិជ្ជាជីវៈ និងបច្ចេកទេស នឹងផ្តោតសំខាន់លើគោលការណ៍ “ឱ្យចប់ ឱ្យចេះ និងឱ្យមានការងារ” ហើយត្រូវនឹងជំនាញដើម្បីធានាដល់ការងារ, និងលើកស្ទួយជីវភាព ព្រមទាំងជួយជ្រោមជ្រែងដល់ក្រុមគ្រួសារ។ ចំណែក ក្រុមហ៊ុនក៏មានបុគ្គលិកប្រកបដោយសមត្ថភាព ហើយស្របតាមជំនាញ។ ការបណ្តុះបណ្តាលចំពោះមុខ គឺផ្តោតលើ ១០ វិស័យ និង ៣៨ មុខជំនាញ។
៣–លើកកម្ពស់កម្មវិធីជាតិជំនួយសង្គម៖ ដើម្បីជួយគ្រួសារក្រីក្រនិងងាយរងហានីភ័យឱ្យបានទូលំទូលាយនិងច្បាស់លាស់។ គោលដៅសំខាន់បំផុតរបស់សម្តេចធិបតីគឺ ពលរដ្ឋក្រីក្រនិងងាយរងហានីភ័យត្រូវតែទទួលបានជំនួយសង្គមនៅពេលដែលពួកគេរងគ្រោះ ឬជួបវិបត្តិដោយប្រការណាមួយ។ ដើម្បីធានាការងារនេះឱ្យបានច្បាស់លាស់ ចាំបាច់ត្រូវពង្រឹងយន្តការនេះរឹងមាំ និងប្រកបដោយប្រសិទ្ធភាពខ្ពស់។ កម្មវិធីនេះរៀបចំដោយក្រសួងសង្គមកិច្ចគ្រោងនឹងប្រកាសដាក់ឱ្យអនុវត្តនាដើមខែធ្នូខាងមុខនេះ។
៤–ការអភិវឌ្ឍសេដ្ឋកិច្ចក្រៅប្រព័ន្ធ៖ – យុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ ២០២៣-២០២៨ ត្រូវបានប្រកាសឱ្យអនុវត្តជាផ្លូវការ កាលពីថ្ងៃទី១០ តុលា។ យុទ្ធសាស្ត្រជាតិនេះមានគោលដៅជួយគាំពារ ជំរុញសេដ្ឋកិច្ចក្រៅប្រព័ន្ធឱ្យរីកលូតលាស់ហើយអាចចូលក្នុងប្រព័ន្ធដើម្បីទទួលបានអត្ថប្រយោជន៍ផ្សេងៗពីរាជរដ្ឋាភិបាល និងអាចទទួលបានផលប្រយោជន៍ពីប្រព័ន្ធគាំពារសង្គមផ្លូវការ តាមរយៈ (១)ការផ្តល់ការគាំពារ បង្កើតនូវបរិយាកាសអំណោយផលសឹម្រាប់អាជីវកម្ម, ការបណ្តុះបណ្តាលជំនាញបច្ចេកទេសនិងវិជ្ជាជីវៈដល់ក្រុមហ៊ុន សហគ្រាសធុនមីក្រូ តូច និងមធ្យម និង(២). ការផ្តល់ការគាំពារសង្គមដល់បុគ្គលស្វ័យនិយោជន៍ក្នុងសេដ្ឋកិច្ចក្រៅប្រព័ន្ធដោយផ្តោតការយកចិត្ត ទុកដាក់ជាបឋម លើការផ្តល់សេវាថែទាំសុខភាពនៅក្រោមមូលនិធិសមធម៌សុខាភិបាល។
៥–ជួយកសិករក្នុងវិស័យកសិកម្ម៖ យន្តការសម្របសម្រួលនិងកម្មវិធីហិរញ្ញប្បទានដើម្បីលើកស្ទួយផលិតកម្ម, រកទីផ្សារ និងរក្សាលំនឹងថ្លៃផលិតផលកសិកម្ម។ ប្រកាសដាក់ឱ្យអនុវត្តនៅថ្ងៃទី ២០ វិច្ឆិកា ។ គោលបំណងគឺដើម្បី ជួយកសិករក្នុងការបង្កើនផលិតកម្មរបស់ខ្លួន ពោលគឺឱ្យពួកគាត់ផលិតឱ្យបានច្រើនជាងមុន, មានទីផ្សារលក់ និងរក្សាស្ថិរភាពតម្លៃ។ ក្នុងផែនការនេះ រាជរដ្ឋាភិបាលត្រៀមកញ្ចប់ថវិកា ១០០ លានដុល្លារ ដើម្បីចាប់ផ្តើម។ អាចវិភាជថវិកាបន្ថែមប្រសិនបើចាំបាច់។
៦–ដាក់ពង្រាយមន្ត្រីបច្ចេកទេសកសិកម្មនៅគ្រប់ឃុំសង្កាត់ដែលមានសកម្មភាពកសិកម្ម៖ គឺជាការបង្ខិតសេវាបម្រើកសិករឱ្យទៅកៀកកសិករតែម្តង។ ក្រសួងកសិកម្មនឹងដាក់ពង្រាយមន្ត្រីជំនាញកសិកម្ម ១ ៦០០ នាក់ ទូទាំងប្រទេសពីពេលនេះដល់ ២០២៥។ ទន្ទឹមនឹងនោះ រាជរដ្ឋាភិបាលមានផែនការរៀបចំឱ្យមានសហគមន៍កសិកម្មទំនើប។ គោលដៅ៖ ប្រែក្លាយកសិកម្មកម្ពុជាពីកសិកម្មជាលក្ខណៈគ្រួសារទៅជាសហគ្រាសសេដ្ឋកិច្ចកសិកម្មដ៏រឹងមាំ។
ទី៣៖ ការបង្កើតអាជ្ញាធរជាតិដោះស្រាយវិវាទក្រៅប្រពន្ធតុលាការ៖ ថ្ងៃ ២៧ តុលាប្រជុំពេញអង្គគណៈរដ្ឋមន្ត្រី សម្រេចអនុម័តសេចក្តីព្រាងព្រះរាជ្យក្រឹត្យ។ ថ្ងៃទី ០២ វិច្ឆិកា ព្រះមហាក្សត្រឡាយព្រហស្ថលេខាលើព្រះរាជ្យក្រឹត្យ។ ក្រសួងយុត្តិធម៌កំពុងរៀបចំបែបបទនីតិវិធីក្រមប្រតិបត្តិ និងក្រមសីលធម៌ដើម្បីផ្សព្វផ្សាយនិងអនុវត្ត។ នេះគឺជាសមិទ្ធផលថ្មីមួយដែលរាជរដ្ឋាភិបាលនីតិកាលទី ៧ នៃរដ្ឋសភា ដឹកនាំដោយសម្តេចធិបតី ហ៊ុន ម៉ាណែត សម្រេចធ្វើដើម្បីផលប្រយោជន៍ប្រជាពលរដ្ឋ៖ ផ្តល់ជម្រើសងាយស្រួលនិងថ្មីឱ្យប្រជាពលរដ្ឋទទួលបានសេវាយុត្តិធម៌ដែលនៅកៀកខ្លួន។ កាត់បន្ថយសំណុំរឿងនៅឯតុលាការ និងកាត់បន្ថយទំនាស់នៅក្នុងសហគមន៍ដែលជាផ្នែកមួយនៃការបង្កើតសុខដុមរមនីយកម្មនៅក្នុងឃុំសង្កាត់។
ទី៤៖ ក្នុងរយៈពេល៣ខែ សម្តេចធិបតី នាយករដ្ឋមន្ត្រីបានចុះជួបសំណេះសំណាលជាមួយ កម្មករ-កម្មការីនី តាមរោងចក្រ សហគ្រាស ក្នុងរាជធានី/ខេត្ត ចំនួន ១០លើក សរុបអ្នកចូលរួមជិត ២០ ម៉ឺននាក់។ ហេតុអ្វីត្រូវចាត់ទុកជំនួបជាមួយកម្មករ កម្មការិនី ជាសមិទ្ធផល? ពីព្រោះក្នុងជំនួបទាំងនោះបានដោះស្រាយបញ្ហាច្រើនយ៉ាងជូនកម្មករ កម្មការិនី៖
១៖ សម្រេចបានការដំឡើងប្រាក់ឈ្នួលអប្បបរមា ឆ្នាំ២០២៤ ឡើងដល់ ២០៤ដុល្លារក្នុងមួយខែ។
២-ជំរុញឱ្យរៀបចំលិខិតបទដ្ឋានគតិយុត្តិជាបន្ទាន់ដើម្បីត្រៀមដាក់ឱ្យដំណើរ ការរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្ត សម្រាប់អ្នកក្នុង បន្ទុកសមាជិក ប.ស.ស. ឱ្យបានលឿនដើម្បីពួកគេឆាប់ទទួលបានផលប្រយោជន៍។
៣៖សម្របសម្រួលឱ្យកម្មករនិយោជិតអាចចូលរៀនជំនាញវិជ្ជាជីវៈដែរក្នុងក្របខណ្ឌនៃកម្មវិធីបណ្ដុះបណ្តាលជំនាញបច្ចេកទេសវិជ្ជាជីវៈដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសចំនួនប្រមាណ ១.៥លាននាក់។
៤៖ ជំរុញការអនុវត្តកាតព្វកិច្ចហ្វឹកហ្វឺនកូនជាង ការបណ្តុះបណ្តាលកម្មករ និយោជិត ដើម្បីលើកកម្ពស់សមត្ថភាពជំនាញ បង្កើនផលិតភាព និងលទ្ធភាពនៃការបង្កើនប្រាក់ឈ្នួល។
៥៖ យកចិត្តទុកដាក់ការអនុវត្តកម្មវិធីឧបត្ថម្ភសាច់ប្រាក់ដល់ស្រ្តីមានផ្ទៃពោះ ទាំងមុនពេលសម្រាលកូន ពេលសម្រាលកូន និងក្រោយពេលសម្រាលកូនឱ្យបានល្អ និងធានាថា ស្ត្រីមានផ្ទៃពោះ និងជនមានពិការភាពបានចេញធ្វើការមុន ១៥នាទី។
៦៖ បង្កើតឱ្យមានកម្មវិធីប្រកួតប្រជែងលើប្រធានបទ ភាពសុខដុមរមនានៅកន្លែងធ្វើការ ដើម្បីប្រែក្លាយសហគ្រាសមួយជាសហគមន៍សុខសាន្ដមួយ ចាប់ពីឆ្នាំ២០២៤នេះតទៅ។
ទន្ទឹមនឹងនេះ សម្តេចធិបតីនាយករដ្ឋមន្ត្រី ក៏បានណែនាំ ក្រសួងការងារឱ្យយកចិត្តទុកដាក់សម្រេចការងារអាទិភាពចំនួន៤ទៀតគឺ៖
១៖ ការបង្កើតទារកដ្ឋាន និងមត្តេយ្យសហគមន៍ នៅតាមតំបន់ដែលមានរោងចក្រ។ ២៖ ការកែលម្អកន្លែងហូបបាយ ឬអាហារដ្ឋាននៅតាមរោងចក្រឱ្យបានសមរម្យ។ ៣៖ មធ្យោបាយដឹកជញ្ជូនកម្មករនិយោជិតឱ្យស្របតាមបទដ្ឋានបច្ចេកទេស និង ផាសុកភាពជាងមុនត្រឹមឆ្នាំ២០២៧។ ៤៖ ជំរុញកម្មវិធីធ្វើតេស្តទទួលស្គាល់ជំនាញ សម្រាប់កម្មករនិយោជិតទាំងក្នុង និងក្រៅប្រទេសអាចមានវិញ្ញាបនបត្រទទួលស្គាល់ជំនាញមួយដើម្បីបង្ហាញពីសមត្ថភាព និងកម្រិតជំនាញរបស់ខ្លួន។
រីឯសមិទ្ធផលទី៥៖ កិច្ចប្រជុំគណៈរដ្ឋមន្ត្រីចំនួន ៣លើក បានសម្រេចអនុម័តសេចក្តីព្រាងច្បាប់សំខាន់ៗចំនួនជាង ១០ក្នុងនោះមាន ការពិនិត្យនិងសម្រេចសេចក្តីព្រាងច្បាប់ស្តីពីការបង្កើត “រដ្ឋលេខាធិការដ្ឋានកិច្ចការព្រំដែន។ សេចក្តីព្រាងច្បាប់ស្តីពីការបង្កើតរដ្ឋលេខាធិការដ្ឋានអាកាសចរណ៍ស៊ីវិល។ សេចក្តីព្រាងព្រះរាជក្រឹត្យស្តីពីការរៀបចំ និងការប្រព្រឹត្តទៅនៃគណៈកម្មាធិការកែទម្រង់រដ្ឋបាលសាធារណៈ។ ចក្តីព្រាងអនុក្រឹត្យស្តីពីការរៀបចំ និងការប្រព្រឹត្តទៅនៃក្រសួងមុខងារសាធារណៈ។ សេចក្តីព្រាងព្រះរាជក្រឹត្យស្តីពី “ការបង្កើត ការរៀបចំ និងកិច្ចដំណើរការរបស់អាជ្ញាធរជាតិដោះស្រាយ វិវាទក្រៅប្រព័ន្ធតុលាការ”។ល។ និង។ល។
និងសមិទ្ធផលទី៦៖ វេទិការាជរដ្ឋាភិបាល ផ្នែកឯកជន កាលពីថ្ងៃទី ១៣ វិច្ឆិកា សម្តេចធិបតីបានសម្រេចដាក់ចេញគោលនយោបាយជាច្រើនដើម្បីជួយដល់ផ្នែកឯកជន មានដូចជាវិស័យទេសចរណ៍, អចលនទ្រព្យ។
ឯកឧត្តម រដ្ឋមន្ត្រីប្រតិភូអមនាយករដ្ឋមន្ត្រី បានសន្និដ្ឋានថា៖ត្រឹមតែ៣ខែ រាជរដ្ឋាភិបាលអាណត្តិទី ៧ សម្រេចបានលទ្ធផលធំធេងជូនជាតិនិងប្រជាពលរដ្ឋ។ គ្រាន់តែឃើញលទ្ធផលបីខែនេះ យើងប្រាកដជាមានសុទិដ្ឋនិយមយ៉ាងប្រាកដប្រជាថា រាជរដ្ឋាភិបាលដឹកនាំដោយសម្តេចធិបតី ហ៊ុន ម៉ាណែត នឹងសម្រេចបានគោលដៅរបស់ខ្លួនយ៉ាងពិតប្រាកដពោលគឺ ចក្ខុវិស័យកម្ពុជាឆ្នាំ ២០៥០ ដើម្បីប្រែក្លាយកម្ពុជាទៅជាប្រទេសដែលមានចំណូលខ្ពស់។
ឯកឧត្តម រដ្ឋមន្រ្តីប្រតិភូអមនាយករដ្ឋមន្រ្តី បានកត់ចំណាំចំណុចគន្លឹះរបស់សម្តេចធិបតី៖
១ កុំនិយាយតែមាត់ កុំសរសេរតែលើក្រដាស់ តែត្រូវអនុវត្តឱ្យចេញជាលទ្ធផលជាក់ស្តែង
២ បង្អង់ការពង្រីក តែយកចិត្តទុកដាល់លើការពង្រឹង (ពង្រឹងគុណភាព និងប្រសិទ្ធភាព)
៣ កសាងមូលធនមនុស្ស (ចំណេះដឹង សមត្ថភាព សុខភាព និងសីលធម៌)
៤ សម្តេចធិបតីជាមេដឹកនាំប្រាកដនិយម មានចក្ខុវិស័យវែងឆ្ងាយ និងចង់ឃើញលទ្ធផល។
ទាំងនេះគឺជាចំណុចខ្លាំងដែលជាចលករជំរុញឱ្យគោលនយោបាយទាំងឡាយសម្រេចគោលដៅ៕
ដោយ លោកស្រី ឈុន លីដា លោក ង៉ាន់ ទិត្យ
![](https://asset.ams.com.kh/central/media/2023/11/photo_2023-11-23_09-35-51-1024x576.jpg)
![](https://asset.ams.com.kh/central/media/2023/11/photo_2023-11-23_07-53-44-1024x576.jpg)
![](https://asset.ams.com.kh/central/media/2023/11/photo_2023-11-23_07-53-59-1024x576.jpg)
![](https://asset.ams.com.kh/central/media/2023/11/photo_2023-11-23_07-53-54-1024x576.jpg)