ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា តាមរយៈបណ្ដាញសង្គមតេលេក្រាម នៅព្រឹកថ្ងៃទី២៧ ខែវិច្ឆិកា ឆ្នាំ២០២៣ បានប្រកាសអបអរសាទរ កីឡាការិនីហែលទឹកជើងទាកម្ពុជា កាំង មុយនីន ដែលបានឈ្នះមេដាយមាស លើវិញ្ញាសាហែលចម្ងាយ 200m Bi-Fins ។

ជាមួយគ្នានេះ សម្ដេចធិបតី ហ៊ុន ម៉ាណែត ក៏បានអបអរសាទរ ដល់កីឡាការិនីហែលទឹកជើងទាកម្ពុជា ឃឺន ប៊ុនពេជ្រ មរកត ដែលបានឈ្នះមេដាយសំរឹទ្ធ ក្នុងព្រឹត្តិការណ៍ប្រកួត 18th ASIAN Finswimming Championships 2023 លើវិញ្ញាសាហែលចម្ងាយ 200m Bi-Fins នៅប្រទេសថៃ ផងដែរ ។

សូមជម្រាបថា សហព័ន្ធខ្មែរកីឡាហែលទឹកកម្ពុជា បានចាត់បញ្ជូនគ្រូបង្វឹក និងកីឡាករ កីឡាការិនី FIN Swimming ចំនួន ០៥នាក់ ទៅចូលរួមការប្រកួត 18th ASIAN Finswimming Championships 2023។ សម្រាប់សមាសភាពគ្រូបង្វឹក និងកីឡាករ កីឡាការិនីរួមមាន ៖ គ្រូបង្វឹក ហែមថុន វិទិនី, កីឡាការិនី កាំង មុយនីន, កីឡាការិនី ឃឺន ប៊ុនពេជ្រមរកត, កីឡាករ ទួន ទិត្យសត្យានិង កីឡាករ លឹម សុខវឌ្ឍន៍នន្ទ ។

ការចូលរួមប្រកួត 18th ASIAN Finswimming Championships 2023 តបតាមការអញ្ជើញរបស់សមាគមកីឡាក្រោមទឹក នៃព្រះរាជាណាចក្រថៃ (Association of Thailand Underwater Sports) ដែលប្រព្រឹត្តទៅចាប់ពីថ្ងៃទី២៤ ដល់ថ្ងៃទី២៨ ខែវិច្ឆិកា ឆ្នាំ២០២៣ នៅខេត្តភូកេត នៃព្រះរាជាណាចក្រថៃ ៕

ដោយ ៖ វណ្ណលុក