អាមេរិកនឹងដាក់ពង្រាយមីស៊ីលបាញ់ពីដីនៅឥណ្ឌូប៉ាស៊ីហ្វិកក្នុងឆ្នាំ២០២៤ ដើម្បីទប់ទល់ឥទ្ធិពលចិន
អ្នកនាំពាក្យកងទ័ពអាមេរិកប្រចាំតំបន់ប៉ាស៊ីហ្វិក បានប្រាប់កាសែតជប៉ុន Nikkei ថា យោធាអាមេរិកគ្រោងនឹងដាក់ពង្រាយមីស៊ីលរយៈចម្ងាយមធ្យមដែលបាញ់ពីលើដី នៅតំបន់ឥណ្ឌូប៉ាស៊ីហ្វិកក្នុងឆ្នាំ ២០២៤ ដើម្បីបង្កើតឃ្លាំងអាវុធរបស់ខ្លួនជាលើកដំបូងនៅតំបន់នេះចាប់តាំងពីចុងបញ្ចប់នៃសង្គ្រាមត្រជាក់មក ក្នុងបំណងបង្កើនការទប់ទល់ប្រឆាំងនឹងចិន។
អ្នកនាំពាក្យ លោក Rob Phillips បានបញ្ជាក់ពីផែនការនេះ ទៅកាន់ Nikkei ក្នុងអត្ថបទដែលចុះផ្សាយកាលពីថ្ងៃទី ៣ ខែធ្នូ ឆ្នាំ២០២៣។ ជម្រើសមីស៊ីលដែលអាមេរិកកំពុងពិចារណា រួមមានមីស៊ីល Standard Missile-6 (SM-6) និងមីស៊ីលគ្រូស Tomahawk។
គេមើលឃើញថា ការដាក់ពង្រាយនេះនឹងធ្វើឡើងជាលើកដំបូង រាប់ចាប់តាំងពីសន្ធិសញ្ញាកងកម្លាំងនុយក្លេអ៊ែរមធ្យម (INF) បានផុតកំណត់នៅឆ្នាំ ២០១៩។ កតិកាសញ្ញាដែលបានចុះហត្ថលេខាជាមួយសហភាពសូវៀតក្នុងឆ្នាំ ១៩៨៧ មួយនេះ បានហាមប្រាមប្រទេសនានាពីការអភិវឌ្ឍន៍ និងកាន់កាប់មីស៊ីលបាញ់ពីដី ដែលមានរយៈចម្ងាយ ៥០០ គីឡូម៉ែត្រ ទៅ ៥ ៥០០ គីឡូម៉ែត្រ។
ចិនបានបន្តផលិតមីស៊ីលរយៈចម្ងាយមធ្យម ខណៈអាមេរិកជាប់ក្នុងសន្ធិសញ្ញា INF។ បើតាមរបាយការណ៍ប្រចាំឆ្នាំរបស់មន្ទីរបញ្ចកោណស្តីពីកម្លាំងយោធារបស់ចិន បច្ចុប្បន្នចិនមានមីស៊ីលចំនួន ១ ៥០០ ដើម ដែលអាចបាញ់បានចម្ងាយពី ១ ០០០-៥ ៥០០ គីឡូម៉ែត្រ។
ជុំវិញការដាក់ពង្រាយថ្មីរបស់អាមេរិក លោក Phillips មិនបានផ្តល់ព័ត៌មានលម្អិតអំពីទីកន្លែង និងពេលណាដែលការដាក់ពង្រាយនឹងធ្វើឡើងនោះទេ។
យ៉ាងណាមិញ អ្នកវិភាគបាននិយាយថា កងទ័ពអាមេរិកនឹងបញ្ជូនអង្គភាពមីស៊ីលរយៈចម្ងាយមធ្យមជាចម្បងទៅកាន់កោះហ្គាំមរបស់ខ្លួន ដើម្បីបើកផ្លូវឆ្ពោះទៅរកការដាក់ពង្រាយបន្ថែមទៀតទៅកាន់សម្ព័ន្ធមិត្តអាស៊ីក្នុងគ្រាអាសន្ន។ ហើយដើម្បីឆ្លើយតបទៅនឹងវិបត្តិនៅច្រកសមុទ្រតៃវ៉ាន់ ឬសមុទ្រចិនខាងត្បូង អាមេរិកតម្រូវឱ្យមានមីស៊ីលដែលអាចបាញ់ឆ្ពោះទៅដល់គោលដៅនៅក្នុងផ្លូវទឹកសំខាន់ៗ ឬដីគោករបស់ចិន។ នេះមានន័យថា អាមេរិកត្រូវពង្រីកការដាក់ពង្រាយអាវុធលើខ្សែកោះយុទ្ធសាស្រ្ត ដែលលាតសន្ធឹងពីកោះអូគីណាវ៉ារបស់ជប៉ុន ទៅកាន់តៃវ៉ាន់ រហូតដល់ហ្វីលីពីន។
កោះហ្គាំម បានក្លាយជាទីតាំងយុទ្ធសាស្ត្រដ៏សំខាន់សម្រាប់ប្រតិបត្តិការយោធារបស់សហរដ្ឋអាមេរិកនៅតំបន់ប៉ាស៊ីហ្វិកខាងលិច និងមានចម្ងាយ ៤ ០០០ គីឡូម៉ែត្រពីចិនដីគោក។ អង្គភាពមីស៊ីលរយៈចម្ងាយមធ្យម អាចត្រូវបានដាក់ពង្រាយយ៉ាងឆាប់រហ័សពីកោះទៅកាន់សម្ព័ន្ធមិត្តនៅអាស៊ី ដើម្បីឆ្លើយតបទៅនឹងភាពអាសន្ន។
អ្នកវិភាគថា សម្រាប់ពេលនេះ ជប៉ុន និងហ្វីលីពីន មានការស្ទាក់ស្ទើរក្នុងការធ្វើជាម្ចាស់ផ្ទះដាក់មីស៊ីលរបស់អាមេរិក ដោយសារខ្លាចក្លាយជាគោលដៅវាយប្រហារភ្លាមៗរបស់យោធាចិនពេលមានវិបត្តិ។ ជាមួយគ្នានោះ លេខាធិការសារព័ត៌មានសេតវិមាន Karine Jean-Pierre បានបញ្ជាក់កាលពីខែមករាហើយថា មិនមានផែនការដាក់ពង្រាយមីស៊ីលបាញ់ពីដីថ្មីលើទឹកដីជប៉ុននោះទេ៕
ប្រែសម្រួល៖ហួន ឌីណា
ប្រភព៖ U.S. to deploy new ground-based missiles to Indo-Pacific in 2024
