សាន់ត្យាហ្គោ៖ ព្រឹត្តិការណ៍មួយដឹកនាំដោយប្រធានាធិបតីឈីលី លោក ហ្គាព្រីអែល បូរីគ ព្រមទាំងរដ្ឋមន្ត្រីមហាផ្ទៃ និងសន្តិសុខសាធារណៈរដ្ឋឈីលី លោកស្រី ខារ៉ូលីណា ថូហា និងរដ្ឋមន្រ្តីការពារជាតិឈីលី លោកស្រី ម៉ាយ៉ា ហ្វឺណាន់ឌេស បានបំផ្លាញកាំភ្លើងវែង-ខ្លីប្រមាណ ២៥,០០០ដើម។

ដំណើរការរលាយកាំភ្លើងប្រមាណ ២៥,០០០ដើមនេះ គឺជាផ្នែកមួយនៃផែនការ “កាំភ្លើងតិច សន្តិសុខកាន់តែច្រើន” និងអនុលោមតាមច្បាប់គ្រប់គ្រងកាំភ្លើង ដែលពិធីនេះធ្វើឡើងនៅក្រុមហ៊ុន AZA មានឯកទេសកែច្នៃដែក។

ប្រធានាធិបតីឈីលី លោក ហ្គាព្រីអែល បូរីគ និយាយថា ឆ្នាំនេះ យើងបង្កើនចំនួនកាំភ្លើងដែលត្រូវបំផ្លាញ ២៨ភាគរយ ឬប្រហែល ៣,៧០០ដើម បើធៀបនឹងឆ្នាំ២០២១។ តួលេខនេះ តំណាងឱ្យចំនួនកាំភ្លើងច្រើនបំផុត ដែលត្រូវបានបំផ្លាញចោល ចាប់តាំងពីឆ្នាំ១៩៩០ និងច្រើនជាងឆ្នាំមុន ៣៩ភាគរយ។

ក្នុងចំណោមកាំភ្លើងដែលត្រូវបំផ្លាញ មាន ៨,០៥៩ដើម ជាកាំភ្លើងរឹបអូសដោយតុលាការ និង ១៣,៣២៣ដើមទៀត ប្រជាពលរដ្ឋប្រគល់ទៅឱ្យអាជ្ញាធរ។
គួរបញ្ជាក់ថា ផែនការ “កាំភ្លើងតិច សន្តិសុខកាន់តែច្រើន” របស់រដ្ឋាភិបាលឈីលី មានគោលបំណងស្វែងរកការកាត់បន្ថយការចរាចរកាំភ្លើងស្របច្បាប់ និងខុសច្បាប់, កាត់បន្ថយអំពើហិង្សា និងកែលម្អបរិយាកាសសន្តិសុខនៅក្នុងប្រទេសឈីលី៕

ប្រភព៖ AFP ប្រែសម្រួលដោយ៖ ឈឹម ទីណា