ភ្នំពេញ៖ កម្ពុជាតាមរយៈក្រសួងសាធារណការ និងដឹកជញ្ជូនបានធ្វើការស្នើទៅកាន់គណៈប្រតិភូស្ថាប័នហេដ្ឋារចនាសម្ព័ន្ធអាស៊ី (Infrastructure Asia) របស់ប្រទេសសិង្ហបុរី ឱ្យជួយពិនិត្យលទ្ធភាពក្នុងការបញ្ជូនអ្នកជំនាញលើវិស័យទឹកកខ្វក់មកបណ្តុះបណ្តាលមន្រ្តី-សិស្សនិស្សិត នៅវិទ្យាស្ថានតេជោសែន សាធារណការ និងដឹកជញ្ជូន។

ការស្នើរបស់ភាគីកម្ពុជា បានធ្វើឡើងនៅក្នុងជំនួបពិភាក្សាការងាររវាងឯកឧត្តម រស់ វណ្ណា រដ្ឋលេខាធិការ ក្រសួងសាធារណការ និងដឹកជញ្ជូន និង លោក Lavan Thiru នាយកប្រតិបត្តិស្ថាប័នហេដ្ឋារចនាសម្ព័ន្ធអាស៊ីប្រទេសសិង្ហបុរី ព្រមទាំងមានការចូលរួមពីមន្រ្តីជំនាញពាក់ព័ន្ធមកពីអគ្គនាយកដ្ឋានប្រព័ន្ធចម្រោះទឹកកខ្វក់ កាលពីដើមសប្ដាហ៍នេះ។ កិច្ចប្រជុំពិភាក្សានេះ រៀបចំឡើងក្នុងគោលបំណង ដើម្បីស្វែងរកធាតុចូល និងកិច្ចសហប្រតិបត្តិការរវាងវិស័យឯកជន ពាក់ព័ន្ធទៅនឹងការគ្រប់គ្រងទឹកកខ្វក់ និងសំណល់រឹងជាមួយនឹងវិស័យសាធារណៈនៅកម្ពុជា។ នេះបើតាមក្រសួងសាធារណការ និងដឹកជញ្ជូន។

នាឱកាសនោះដែរឯកឧត្តម រស់ វណ្ណា បានគូសបញ្ជាក់អំពីវិស័យទឹកកខ្វក់ និងចំណុចខ្លាំង-ខ្សោយក្នុងការអនុវត្ត និងប្រមូល-គ្រប់គ្រងទឹកកខ្វក់នៅកម្ពុជា។ ជាមួយគ្នានេះ លោកបានស្នើឱ្យភាគីសិង្ហបុរី ពិនិត្យលទ្ធភាពក្នុងការបញ្ជូនអ្នកជំនាញលើវិស័យនេះ មកបណ្តុះបណ្តាលមន្រ្តី-សិស្សនិស្សិត នៅវិទ្យាស្ថានតេជោសែន សាធារណៈការ និងដឹកជញ្ជូនផងដែរ។

ជាការឆ្លើយតបវិញ លោក Lavan Thiru នាយកប្រតិបត្តិស្ថាប័នហេដ្ឋារចនាសម្ព័ន្ធអាស៊ីប្រទេសសិង្ហបុរី បានទទួលយកសំណើខាងលើទៅធ្វើការពិនិត្យលទ្ធភាព និងបានជម្រាបអំពីវគ្គបណ្តុះបណ្តាលខ្លី នៅប្រទេសសិង្ហបុរី ក្នុងឆ្នាំ២០២៤ ខាងមុខនេះ ដោយនឹងមានរៀបចំលិខិតដាក់មកក្រសួងសាធារណការ និងដឹកជញ្ជូន ដើម្បីអញ្ជើញមន្រ្តីជំនាញចូលរួមនាឱកាសនោះថែមទៀត។

គួរបញ្ជាក់ផងដែរថា វិទ្យាស្ថានតេជោសែន សាធារណការ និងដឹកជញ្ជូន គឺជាគ្រឹះស្ថានឧត្តមសិក្សាសាធារណៈដែលកំពុងបណ្តុះបណ្តាលនិស្សិតលើជំនាញជាច្រើនរួមមាន ជំនាញសំណង់ផ្លូវថ្នល់ ផ្លូវល្បឿនលឿន ស្ពាន ផ្លូវដែក និងសំណង់កំពង់ផែ ជំនាញប្រព័ន្ធចម្រោះទឹកកខ្វក់ ជំនាញសេដ្ឋកិច្ច និងគ្រប់គ្រងការដឹកជញ្ជូនផ្លូវគោក ជំនាញគ្រប់គ្រងភស្តុភារកម្ម និងខ្សែច្រវ៉ាក់ផ្គត់ផ្គង់ និងជំនាញបើកបរនាវា និងជំនាញម៉ាស៊ីននាវា។

ឯកឧត្តម សំរង់ឌី ណាម៉ូ អគ្គនាយក នៃអគ្គនាយកដ្ឋានប្រព័ន្ធចម្រោះទឹកកខ្វក់ នៃវិទ្យាស្ថានតេជោសែន សាធារណការ និងដឹកជញ្ជូន ធ្លាប់បានលើកឡើងថា ការគ្របគ្រង់ទឹកកខ្វក់នៅកម្ពុជានៅជួបបញ្ហាប្រឈមជាច្រើនដូចជា នៅខ្វះច្បាប់ទំលាប់ ផែនការមេ យុទ្ធសាស្រ្តក្នុងការគ្រប់ទឹកកខ្វក់ បទដ្ឋានបច្ចេកទេស ការវិនិយោគ និងធនធានមនុស្សលើវិស័យនេះជាដើម។
លោកបញ្ជាក់ផងដែរថា កម្ពុជាពិតជាត្រូវការការសហការ និងការគាំទ្រពីដៃគូរអន្តរជាតិ តាមយៈការវិនិយោគ ការបណ្តុះបណ្តាលជំនាញបច្ចេកទេសបន្ថែមទៀត ដើម្បីជំរុញវិស័យប្រព័ន្ធចម្រោះទឹកកខ្វក់នៅកម្ពុជាកាន់តែមានស្តង់ដា និងធានានិរន្តរភាពបរិស្ថាននៅកម្ពុជា៕ អត្ថបទ៖ បូរពេជ្រហ្សាលីន