តូក្យូ៖ នាយករដ្ឋមន្ត្រីជប៉ុន លោក Fumio Kishida បានជួបជាមួយនាយករដ្ឋមន្ត្រីវៀតណាម លោក Pham Minh Chinh នៅមុនពេលកិច្ចប្រជុំកំពូលជប៉ុន-អាស៊ាន នៅទីក្រុងតូក្យូ។ ជំនួបនេះ ត្រូវបានដឹងថា ផ្តោតលើការជំរុញទំនាក់ទំនងសេដ្ឋកិច្ច។

បើយោងតាមក្រសួងការបរទេសជប៉ុនបានឲ្យដឹងថា ជំនួបនេះ ត្រូវបានរៀបចំធ្វើឡើង កាលពីល្ងាចថ្ងៃទី ១៦ ខែធ្នូ។ ជាជំនួបក្នុងពេលនាយករដ្ឋមន្ត្រីវៀតណាមកំពុងបំពេញបេសកកម្ម នៅប្រទេសជប៉ុន ដើម្បីចូលរួមកិច្ចប្រជុំកំពូលរំលឹកខួបលើកទី ៥០ នៃមិត្តភាព និងសហប្រតិបត្តិការអាស៊ាន-ជប៉ុន។

ប្រភពបន្តថា ក្នុងជំនួបនាពេលនោះ នាយករដ្ឋមន្ត្រីជប៉ុន Kishida បានសម្តែងនូវបំណងចង់អភិវឌ្ឍបន្ថែមទៀតនូវទំនាក់ទំនងរវាងប្រទេសទាំងពីរក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ។ លោកបានសង្កត់ធ្ងន់លើសារៈសំខាន់នៃការពង្រឹងកិច្ចសហប្រតិបត្តិការជាមួយអាស៊ាន រួមទាំងវៀតណាមផងដែរ ដើម្បីរក្សា និងពង្រឹងសណ្តាប់ធ្នាប់អន្តរជាតិដោយសេរី និងបើកចំហ ដោយផ្អែកលើនីតិរដ្ឋ និងដើម្បីធានាដល់ពិភពលោក នូវសេចក្តីថ្លៃថ្នូររបស់មនុស្សជាតិ។

ផ្អែកតាមប្រភពដដែល នាយករដ្ឋមន្ត្រីវៀតណាម Chinh បានសម្តែងនូវការពេញចិត្តចំពោះការស្វាគមន៍យ៉ាងកក់ក្តៅដែលលោកបានទទួលក្នុងដំណើរបំពេញទស្សនកិច្ច នៅប្រទេសជប៉ុន។ លោកបានមានប្រសាសន៍ថា លោកមានសេចក្តីសោមនស្សរីករាយដែលឃើញទំនាក់ទំនងទ្វេភាគី មានការអភិវឌ្ឍន៍លើវិស័យជាច្រើន ក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ។ លោកសង្ឃឹមថា ការប្រារព្ធខួបលើកទី ៥០ នេះ ក៏ឱកាសដើម្បីពង្រឹងទំនាក់ទំនងទ្វេភាគី រវាងវៀតណាមនិងជប៉ុនដែរ៕ ប្រភពពី AFP ប្រែសម្រួល៖ សារ៉ាត