លោក ពូទីន នឹងឈរឈ្មោះជាបេក្ខជនប្រធានាធិបតីឯករាជ្យ មិនស្ថិតក្រោមគណបក្សនយោបាយ
មូស្គូ៖ កាលពីថ្ងៃទី១៦ ខែធ្នូ ឆ្នាំ២០២៣ ទីភ្នាក់ងារព័ត៌មានរុស្ស៊ីបានរាយការណ៍ដោយដកស្រង់សម្តីរបស់អ្នកគាំទ្រលោក វ្ល៉ាឌីមៀ ពូទីន (Vladimir Putin) ថា លោក ពូទីន នឹងឈរឈ្មោះជាប្រធានាធិបតីដោយឯករាជ្យ ហើយលោកបានទទួលការគាំទ្រយ៉ាងខ្លាំង ពោលគឺលោកមិនបានឈរឈ្មោះក្រោមគណបក្សនយោបាយជាក់លាក់ណាមួយនោះទេ។
យោងតាមទីភ្នាក់ងារសារព័ត៌មានរុស្ស៊ីដដែលបានឱ្យដឹងថា ក្រុមអ្នកនយោបាយ និងបុគ្គលល្បីៗមកពីវិស័យកីឡា និងវប្បធម៌ ចំនួន ៧០០ នាក់ បានជួបប្រជុំគ្នានៅទីក្រុងមូស្គូ ហើយបានព្រមព្រៀងគ្នាគាំទ្រការតែងតាំងរបស់លោក ពូទីន ជាបេក្ខជនប្រធានាធិបតីឯករាជ្យតែម្នាក់គត់។
លោក ពូទីន បានធ្វើការដឹកនាំប្រទេសរុស្ស៊ី ក្នុងនាមជាប្រធានាធិបតីផង និងជានាយករដ្ឋមន្ត្រីផង អស់រយៈពេលជាង ២០ ឆ្នាំមកហើយ។ លោកនឹងឈរឈ្មោះសម្រាប់អាណត្តិ ៦ ឆ្នាំទៀតនៅក្នុងការបោះឆ្នោតនៅខែមីនាឆ្នាំ២០២៤ ខាងមុខនេះ ដែលគេរំពឹងថា លោកនឹងឈ្នះការបោះឆ្នោតយ៉ាងងាយស្រួលបំផុត។
ជាក់ស្ដែង លោក ពូទីន មានការគាំទ្រយ៉ាងពេញទំហឹងពីគណបក្សរបស់លោក ឈ្មោះថាគណបក្សសហព័ន្ធរុស្ស៊ី (United Russia Party) ដែលជាគណបក្សកាន់អំណាច ប៉ុន្តែលោកសម្រេចមិនឈរឈ្មោះជាបេក្ខជនមកពីគណបក្សនេះឡើយ។ ផ្ទុយទៅវិញ លោកនឹងឈរឈ្មោះជាបេក្ខជនឯករាជ្យ នេះបើយោងតាមការលើកឡើងរបស់មន្ត្រីជាន់ខ្ពស់មកពីគណបក្សកាន់អំណាច លោក អាន់ដ្រី ធូឆាក (Andrei Turchak)។
ទីភ្នាក់ងារសារព័ត៌មានក្នុងស្រុករបស់រដ្ឋរុស្ស៊ី RIA បានដកស្រង់សម្ដីរបស់លោក ធូឆាក ថា សមាជិកនិងអ្នកគាំទ្រគណបក្សជាង ៣,៥ លាននាក់នឹងចូលរួមយ៉ាងសកម្មក្នុងយុទ្ធនាការបោះឆ្នោត។ លោកក៏បានគូសបញ្ជាក់ដែរថា លោក ពូទីន គឺជាសហស្ថាបនិកម្នាក់របស់គណបក្សសហព័ន្ធរុស្ស៊ី។
លោក ស៊ែហ្គៃ មីរ៉ូណូវ (Sergei Mironov) អ្នកនយោបាយជាន់ខ្ពស់មួយរូបនៅក្នុងគណបក្សយុត្តិធម៌រុស្ស៊ី (Just Russia) ដែលគាំទ្រលោក ពូទីន ផងដែរនោះ បាននិយាយទៅកាន់សារព័ត៌មាន RIA ថា លោក ពូទីន នឹងឈរឈ្មោះជាបេក្ខជនប្រធានាធិបតីដោយឯករាជ្យ ហើយពួកគេនឹងប្រមូលហត្ថលេខាដើម្បីគាំទ្ររូបលោក។
បច្ចុប្បន្ន លោក ពូទីន មានអាយុ ៧១ ឆ្នាំ ហើយការបោះឆ្នោតខាងមុខនេះគឺហាក់បីដូចជាការធ្វើឡើងដើម្បីបង្គ្រប់កិច្ចតែប៉ុណ្ណោះ ពោលគឺជាការចង់បង្ហាញឱ្យឃើញថាលោកមានការគាំទ្រទាំងប្រជាពលរដ្ឋ និងប្រព័ន្ធផ្សព្វផ្សាយដែលគ្រប់គ្រងដោយរដ្ឋ ។រីឯសំឡេងប្រឆាំងវិញ គឺមានតិចតួចបំផុត។
ក្រុមអ្នកគាំទ្ររបស់លោក ពូទីន បានអះអាងថា លោកបាននាំមកនូវស្ថិរភាព និងមោទនភាពជាតិជូនដល់រុស្ស៊ីវិញ ជាពិសេសគឺរុស្ស៊ីអាចទទួលបានមកវិញនូវឥទ្ធិពលមួយចំនួនដែលបានបាត់បង់អំឡុងពេលចលាចលក្រោយសហភាពសូវៀតដួលរលំ។ ពួកគេថែមទាំងជឿថា ការសម្រេចចិត្តរបស់លោក ពូទីន ដែលហៅថា ៖ «ប្រតិបត្តិការយោធាពិសេស»នៅប្រទេសអ៊ុយក្រែន គឺជារឿងត្រឹមត្រូវទៀតផង។
អស់រយៈពេលជាច្រើនឆ្នាំមកនេះ ការបង្រ្កាបអ្នករិះគន់ និងក្រុមប្រឆាំងនៅរុស្ស៊ី បានកើតមានឡើងជាហូរហែ តាមរយៈការបង្កើតច្បាប់ថ្មីប្រឆាំងនឹងព័ត៌មានក្លែងក្លាយ និងការបង្ខូចកេរ្តិ៍ឈ្មោះរបស់កងទ័ពជាដើម។ ក្រោមការអនុវត្តច្បាប់ទាំងនេះ ក្រុមប្រឆាំងជាច្រើនត្រូវបានចាប់ខ្លួន ហើយអ្នកខ្លះត្រូវបានកាត់ទោសឱ្យជាប់ពន្ធនាគារជាច្រើនឆ្នាំ ហើយអ្នកខ្លះទៀតត្រូវបង្ខំចិត្តចាកចេញពីប្រទេស៕
ប្រែសម្រួល៖ធា សុណា
ប្រភពព័ត៌មាន៖ Reuters
Putin to run as independent candidate for new presidential term – senior politicians
