ភ្នំពេញ៖ បណ្ឌិត  យ៉ងសាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ​ ប្រាប់ឱ្យដឹងនៅព្រឹកថ្ងៃទី៣០ ខែធ្នូ ឆ្នាំ២០២៣នេះថា នៅក្នុងរយៈពេលប្រមាណ១១ខែមកនេះ ការអនុវត្តសាកល្បងកម្មវិធីមន្រ្តីកសិកម្មឃុំនៅទូទាំង១០ឃុំ ក្នុងស្រុកជើង​ព្រៃ ខេត្តកំពង់ចាម បានផ្តល់សេវាកម្មជូនកសិករបានចំនួន ៨,១៣០ គ្រួសារ ឬស្មើនឹងប្រមាណ ៣៥ ភាគរយនៃចំនួនគ្រួសារ​កសិកម្មសរុបក្នុងស្រុក។

ឯកឧត្តមរដ្ឋលេខាធិការបានមានប្រសាសន៍ទៀតថា កាលពីថ្ងៃទី២៨ ខែធ្នូ លោកបានបើកកិច្ចប្រជុំបូកសរុបលទ្ធផលនិងមេរៀន ទទួលបានពីការអនុវត្តសាកល្បងកម្មវិធីមន្រ្តីកសិកម្មឃុំនៅទូទាំង១០ឃុំក្នុងស្រុកជើងព្រៃខេត្តកំពង់ចាម ចាប់ពីខែកុម្ភ: ដល់ខែធ្នូ ២០២៣ ដោយមានការចូលរួមពីកសិករនិងអជ្ញាធរមូលដ្ឋាន ដែលបានវាយតម្លៃខ្ពស់លើវត្តមានរបស់មន្រ្តីកសិកម្មឃុំ និងគាំទ្រឱ្យមានមន្រ្តីកសិកម្មឃុំបន្តការងារយូរអង្វែងនៅមូលដ្ឋានរបស់គាត់។

ឯកឧត្តមបានបញ្ជាក់ដូច្នេះថា៖«តាមរយៈបទពិសោធន៍នៅស្រុកជើងព្រៃជាមូលដ្ឋានគ្រឹះដ៏សំខាន់សម្រាប់កម្មវិធីដាក់ពង្រាយមន្រ្តីកសិកម្មនៅគ្រប់ឃុំសង្កាត់ដែលមានសក្តានុពលកសិកម្មនៅទូទាំងប្រទេសដើម្បីធ្វើការបម្រើកសិករប្រកប​ដោយប្រសិទ្ធ​ភាពខ្ពស់»។ការប្រឡងជ្រើសរើសមន្ដ្រីកសិកម្មឃុំ បានបិទបញ្ចប់ និងបានប្រកាសលទ្ធផលជាផ្លូវការ ហើយ ក្រោយជាប់ជាស្ថាពរ មន្ដ្រីទាំង២៥០រូបនឹងត្រូវទទួលការបណ្ដុះបណ្ដាលបន្ថែម ពោលគឺត្រូវរៀនផងនិងធ្វើការផងក្នុងឆ្នាំដំបូង។

ឯកឧត្តមបានបញ្ជាក់ដូច្នេះថា៖«អំឡុងពេលមួយឆ្នាំនេះប្រសិនបើពួកគេអសមត្ថភាពធ្វើការមិនកើត នោះនឹងត្រូវបញ្ចប់កិច្ចសន្យាឬដកចេញវិញ ប៉ុន្ដែបើមានសមត្ថភាព មានសីលធម៌ការងារ មានអត្ដចរិតល្អ ក្រោយចប់មួយឆ្នាំអាចនឹងចូលក្របខ័ណ្ឌតែម្ដង»។

បើតាមបណ្ឌិត យ៉ងសាំង កុមារ មន្រ្តីកសិកម្មឃុំ ដែលទើបប្រឡងជាប់ ក្រោយរៀបចំបែបបទ ឯកសារជាមួយក្រសួងមុខងារសារធារណៈរួចហើយ មន្រ្តីទាំងអស់ នឹងទទួលបានការបណ្តុះនៅក្នុងខែកុម្ភៈ ពោលគឺនៅក្នុងរយៈពេលមួយខែពេញ មុននឹងចេញទៅតាមឃុំ ដើម្បីអនុវត្តការងាររៀងៗខ្លួន។

សូមជម្រាបថា រាជរដ្ឋាភិបាលបានប្រកាសដាក់ចេញនូវគោលនយោបាយដាក់ពង្រាយ​មន្ត្រី​កសិកម្ម​ឃុំ ចំនួន ១ ៦០០​ នាក់​ ក្នុង​បេស​ក​កម្ម​ធ្វើ​ការបម្រើ​កសិករ ១,៦ លាន​គ្រួសារ ឬ​ស្មើនឹង​ចំនួន​ប្រជាជន ៧,៥​ លាន​នាក់ នៅ​គ្រប់​ភូមិ ឃុំ​ទូទាំងប្រទេស ចាប់​ពី​ឆ្នាំ​ ២០២៣ ដល់​ឆ្នាំ ​២០២៨​។​

ក្រសួងកសិកម្ម​រំពឹង​ថា គោល​​នយោបាយ​ពង្រាយ​មន្ត្រី​កសិកម្ម​ឃុំ ១ ៦០០ នាក់ នៅ​ទូទាំងប្រទេស​នេះ​នឹងមាន​ប្រសិទ្ធភាព ហើយ​ឆ្លើយតប​នឹង​សេចក្តីត្រូវការ របស់​កសិករ​នៅ​ទូទាំងប្រទេស ជាពិសេស​ទាក់ទង​នឹង​បច្ចេក​ទេស​, ហិរញ្ញវត្ថុ​និង​ការប្រែប្រួល​អាកាសធាតុ៕

ដោយ៖ វណ្ណ សុជាតា

​