តូក្យូ៖ ចំនួនអ្នកស្លាប់បានកើនឡើងដល់៤៨នាក់ ស្របពេលដែលអាជ្ញាធរក្នុងតំបន់រំពឹងថា តួលេខនេះនឹងបន្តកើនឡើងបន្ថែមទៀត ពីព្រោះក្រុមសង្គ្រោះកំពុងដុតដៃដុតជើងជួយជនរងគ្រោះចេញពីគំនរបាក់បែក បន្ទាប់ពីគ្រោះរញ្ជួយដីកម្រិត ៧.៦រ៉ិចទ័រ វាយប្រហារចំតំបន់ភាគកណ្តាលប្រទេសជប៉ុន នៅថ្ងៃចន្ទសប្តាហ៍នេះ។

ក្រុមអ្នកជួយសង្គ្រោះជប៉ុនកំពុងប្រយុទ្ធនឹងពេលវេលា នៅថ្ងៃអង្គារសប្តាហ៍នេះ ដើម្បីព្យាយាមស្វែងរកអ្នកនៅរស់រានមានជីវិត ពីគ្រោះរញ្ជួយដីនៅថ្ងៃចូលឆ្នាំថ្មី ថ្ងៃទី០១ ខែមករា ឆ្នាំ២០២៤ ដែលបានសម្លាប់មនុស្សយ៉ាងហោចណាស់ ៤៨នាក់ និងបង្កការបំផ្លិចបំផ្លាញផ្ទះសម្បែង ព្រមទាំងហេដ្ឋារចនាសម្ព័ន្ធយ៉ាងធំសម្បើម។

នាយករដ្ឋមន្រ្តីជប៉ុន លោក ហ្វូមីអូ គីស៊ីដា បាននិយាយបន្ទាប់ពីកិច្ចប្រជុំឆ្លើយតបគ្រោះមហន្តរាយថា ការខូចខាតដ៏ធំសម្បើមត្រូវបានរាយការណ៍ ក្នុងនោះរួមមានអ្នកស្លាប់ និងរបួសជាច្រើននាក់ រួមទាំងការដួលរលំអគារ និងភ្លើងឆេះ។ លោកបន្តថា ពួកយើងត្រូវរត់ប្រណាំងប្រឆាំងនឹងពេលវេលា ក្នុងការស្វែងរក និងសង្គ្រោះអ្នកនៅរស់រានមានជីវិតពីគ្រោះមហន្តរាយ។

ក្រុមហ៊ុនចែកចាយថាមពលក្នុងតំបន់បានបញ្ជាក់ថា ប្រជាជនក្នុងតំបន់ជាង ៣៣,០០០គ្រួសារ ដាច់ចរន្តអគ្គិសនីប្រើប្រាស់ ចំពេលសីតុណ្ហភាពចុះត្រជាក់ខ្លាំងពេញមួយយប់ ខណៈទីក្រុងជាច្រើនផ្សេងទៀតគ្មានទឹកប្រើប្រាស់។

គ្រោះរញ្ជួយដ៏ដីនេះដែរ ក៏បណ្តាលឱ្យមានរលកយក្សស៊ូណាមិកម្ពស់យ៉ាងហោចណាស់ ១.២ម៉ែត្រ វាយប្រហារទីក្រុងវ៉ាជីម៉ា និងរលកយក្សស៊ូណាមិតូចៗជាច្រើនទៀតក៏ត្រូវបានរាយការណ៍ផងដែរ។ ប៉ុន្តែនៅព្រឹកថ្ងៃអង្គារសប្តាហ៍នេះ អាជ្ញាធរជប៉ុនបានសម្រេចដកការប្រកាសអាសន្នពីរលកយក្សស៊ូណាមិចេញវិញ៕ ប្រភព៖ AFP ប្រែសម្រួលដោយ៖ ឈឹម ទីណា