(ភ្នំពេញ)៖ រយៈពេល ១១ខែ ពោលគឺក្នុងអំឡុងខែមករាដល់ខែវិច្ឆិកា ឆ្នាំ ២០២៣ កម្ពុជារកចំណូល ពីការនាំចេញជ័រកៅស៊ូ និងឈើកៅស៊ូ សរុបចំនួន ៤៤៦ ៩២៥ ៦៧៤ដុល្លារ ដែលក្នុងនោះចំណូលពីការនាំចេញជ័រកៅស៊ូរយៈពេល១១ខែ ឆ្នាំ២០២៣ មានចំនួន ៤៤៥ ៤២២ ២៣៥ដុល្លារ និង ចំណូលពីការនាំចេញឈើ កៅស៊ូរយៈពេល ១១ខែ ឆ្នាំ២០២៣ មានចំនួន ១ ៥០៣ ៤៣៩ដុល្លារ។

យោងតាមរបាយការណ៍ស្តីពីសភាពការណ៍កសិកម្មរុក្ខាប្រមាញ់ នេសាទប្រចាំឆ្នាំ ២០២៣បានឱ្យដឹងថា៖សម្រាប់ផ្ទៃដីដាំកៅស៊ូសរុបចំនួន ៤០៧ ១៧២ហិកតា ក្នុងនោះ ផ្ទៃដីចម្ការកៅស៊ូកសិ-ឧស្សាហកម្មចំនួន ៤៦ ៦៨២ហិកតា ផ្ទៃដីចម្ការកៅស៊ូសម្បទានដីសេដ្ឋកិច្ចចំនួន ១៨០ ១៥៨ហិកតា និងផ្ទៃដីចម្ការកៅស៊ូគ្រួសារចំនួន ១៨០ ៣៣២ហិកតា។ផ្ទៃដីចៀរជ័រចំនួន ៣២០ ១៨៤ហិកតាស្មើនឹង៧៩ភាគរយ និងផ្ទៃដីថែទាំចំនួន ៨៦ ៩៨៨ហិកតា ស្មើនឹង២១ភាគរយ។

ប្រភពខាងលើនេះបានបញ្ជាក់ឱ្យដឹងដែរថា៖ផលិតផលជ័រកៅស៊ូរយៈពេល១១ខែ ឆ្នាំ២០២៣ មានចំនួន ៣៣៤ ៨៨៣តោន កើនឡើងចំនួន ៥ ៥២៧តោន ស្មើនឹង ១,៧ ប្រៀបធៀបរយៈពេល១១ខែ ឆ្នាំ២០២២។ចំណែកបរិមាណ បញ្ចេញលក់ជ័រកៅស៊ូរយៈពេល ១១ខែ ឆ្នាំ២០២៣ មានចំនួន ៣៣៤ ១៧៦តោន បានកើនឡើងចំនួន ១១ ៥៩០តោន ស្មើនឹង៤ភាគរយ ប្រៀបធៀបរយៈពេល១១ខែ ឆ្នាំ២០២២។ បរិមាណបញ្ចេញលក់ឈើកៅស៊ូរយៈពេល១១ខែ ឆ្នាំ២០២៣ មានចំនួន ៨ ៩៨២ម៣។តម្លៃលក់ជ័រកៅស៊ូគិតជាមធ្យមក្នុងខែវិច្ឆិកា ឆ្នាំ២០២៣ គឺ១៣៦៥ដុល្លារក្នុងមួយតោន បានកើនឡើងចំនួន ១៣ដុល្លារក្នុងមួយតោន ស្មើនឹង ០,៩ភាគរយ ធៀបនឹងខែមុន និងបានកើនឡើងចំនួន ១៣៤ដុល្លារ ក្នុងមួយតោន ស្មើនឹង១១ភាគរយ ប្រៀបធៀបខែវិច្ឆិកា ឆ្នាំ២០២២។

ក្នុងរបាយការណ៍នេះបានបញ្ចាក់បន្ថែមថា៖សម្រាប់តម្លៃលក់ជ័រកៅស៊ូគិ តជាមធ្យម រយៈពេល ១១ខែ ឆ្នាំ២០២៣ គឺ១៣៣៣ដុល្លារក្នុងមួយតោន បានថយចុះចំនួន ១១១ដុល្លារក្នុងមួយតោន ស្មើនឹង៧,៧ភាគរយ ប្រៀបធៀប រយៈពេល១១ខែ ឆ្នាំ២០២២។តម្លៃលក់ឈើកៅស៊ូគិត ជាមធ្យមក្នុងខែវិច្ឆិកា ឆ្នាំ២០២៣ គឺ២៣១ដុល្លារ/ម៣។ តម្លៃប្រមូលទិញជ័រកៅស៊ូគ្រួសារ គឺទឹកជ័រ (DRC 100ភាគរយ) មានការប្រែប្រួលពី ៤ ៥០០រៀលក្នុងមួយគីឡូក្រាម ដល់ ៥ ០០០រៀលក្នុងមួយគីឡូក្រាម និងជ័រកក (DRC 50ភាគរយ) មានការប្រែប្រួលពី ២១០០រៀលក្នុងមួយគីឡូក្រាម ដល់ ២ ៨០០រៀលក្នុងមួយគីឡូក្រាម ៕

ដោយ៖ម៉ាដេប៉ូ