ភ្នំពេញ៖ រាជរដ្ឋាភិបាលបានយកចិត្តទុកដាក់លើការអប់រំ និងការបង្កើតធនធានមនុស្ស ដែលជាគោលនយោបាយអាទិភាពសម្រាប់អភិវឌ្ឍប្រទេសជាតិ ជាហេតុនាំអោយសាលាប៊ែលធី គិតគូរ ពីកត្តាមនុស្ស ដើម្បីរួមចំណែកជ្រំជ្រែងវិស័យអប់រំនៅកម្ពុជា។ មិនតែប៉ុណ្ណោះ បណ្តាប្រទេសអន្តរជាតិជាដៃគូជាច្រើន សុទ្ធតែបានទទួលស្គាល់ពីគុណភាពអប់រំរបស់​សាលាប៊ែលធី ដូចជាសឹង្ហបុរី ចិន សហរដ្ឋអាមេរិក  កាណាដា ថៃ ម៉ាឡេស៊ី កូរ៉េ ជាដើម។ល។  នេះជាការលើកឡើង របស់ ឯកឧត្ដមបណ្ឌិត លី ឆេង ស្ថាបនិកប៊ែលធីគ្រុប។ការធ្វើកំណែទម្រង់ជាបន្តបន្ទាប់  លើវិស័យអប់រំនេះ បានធ្វើអោយកម្ពុជា មានមុខមាត់លើឆាក​អន្តរជាតិ និងផលិតបានធនធានមនុស្ស មានកម្រិតស្តង់ដារ និងឆ្លើយតបតម្រូវការទីផ្សារបច្ចុប្បន្ន តួយ៉ាង ការប្រឡងសញ្ញាបត្រមធ្យមសិក្សាទុតិយភូមិ សិស្សនិទ្ទេស A មានចំនួនច្រើនឡើងៗ ។ ជាក់ស្តែងឆ្នាំនេះ សិស្សនិទ្ទេស A របស់សាលាប៊ែលធីអន្តរជាតិឆ្នាំនេះកើនឡើងដល់ ១១៩រូប ហើយលោកគ្រូ-អ្នកគ្រូថ្នាក់ទី១២ ដែលមានស្នាដៃបង្រៀនសិស្សអោយជាប់បាននិទ្ទេស A ត្រូវបានអាណាព្យាបាលសិស្សសរសើរ និងសាទរដល់គុណភាពអប់រំរបស់សាលា។ឯកឧត្ដមបណ្ឌិត លី ឆេង និង លោកជំទាវ មិនខ្លាចនឿយហត់ ឈរប្រគល់ សញ្ញាបត្រមធ្យមសិក្សាទុតិយភូមិប៊ែលធី ជូនដល់សិស្សប៊ែលធី ថ្នាក់ទី១២ ជំនាន់ទី១៨ ដែលបានប្រឡងជាប់ សញ្ញាបត្រមធ្យម សិក្សាទុតិយភូមិ (បាក់ឌុប) ក្នុងឆ្នាំសិក្សា ២០២២-២០២៣ ចំនួន ២,១១២នាក់ នៅសាលសន្និសីទនៃសាកលវិទ្យាល័យ ប៊ែលធី អន្តរជាតិទី២ (ស្ពានអាកាសចោមចៅ) ព្រឹកថ្ងៃទី២៧ ខែមករា ឆ្នាំ២០២៤ ដើម្បីលើកទឹកចិត្តយុវជនជំនាន់ក្រោយដើរដោយមោទនភាព ស្របពេលសន្តិភាព គ្របដណ្តប់ដោយម្លប់ទូទាំងប្រទេស។

ឯកឧត្ដមបណ្ឌិត លី ឆេង បានបន្តថា ចាប់តាំងពីឆ្នាំ២០១៤ រហូតដល់ពេលនេះ ទូទាំងប្រទេសចំនួនសិស្សប្រឡង​ជាប់និទ្ទេស A មានការកើនឡើងជាលំដាប់ ក្រោមទិសស្លោក “អ្នកចេះ គឺជាប់”  ដោយឡែកសាលា ប៊ែលធី អន្តរជាតិ មានសិស្សថ្នាក់ទី១២ ដែលបានប្រឡងជាប់សញ្ញាបត្រមធ្យមសិក្សាទុតិយភូមិ  ចំនួន  ១៦,៥១២នាក់  ស្មើនឹង ៨៧.២០% និងមានសិស្សនិទ្ទេសA ចំនួន ៣៩៧នាក់ សិស្សពូកែទូទាំងរាជធានី ចំនួន ១១៦នាក់ និងទូទាំងប្រទេស ចំនួន ៣១នាក់។  លទ្ធផលពេលនេះ ជានិមិត្តរូបនៃភាពជោគជ័យ កើតចេញពីការខិតខំប្រឹងប្រែង​រៀនសូត្ររបស់ក្មួយ​ៗ​ផ្ទាល់ ការយកចិត្តទុកដាក់ពីប្រមុខរាជរដ្ឋាភិបាលដែល​បានធ្វើឱ្យប្រទេសជាតិ​ មានសុខសន្តិភាព​ការអភិវឌ្ឍ​លើគ្រប់​វិស័យ​ និងបានបង្កលក្ខណៈងាយស្រួលគ្រប់បែបយ៉ាងដល់ការសិក្សារបស់ក្មួយៗ និងក៏ស្នាដៃមិនអាចកាត់ថ្លៃបានរបស់ លោកគ្រូអ្នកគ្រូ ដែលបង្រៀនក្នុងប្រព័ន្ធអប់រំរបស់យើងផងដែរ ជាពិសេសការជួយគាំទ្រយ៉ាងពេញទំហឹង​របស់ឪពុកម្តាយ និងអាណាព្យាបាល។  

រាជរដ្ឋាភិបាលនីតិកាលទី៧បានដាក់ចេញនៅក្នុងយុទ្ធសាស្ត្របញ្ចកោណ ដំណាក់កាលទី១ បានចាត់ទុក “ ការអភិវឌ្ឍមូលធនមនុស្ស” គឺជាបញ្ចកោណទី១ ដ៏មានសារៈសំខាន់ ដោយក្នុងនោះ”ការពង្រឹងគុណភាពវិស័យអប់រំ កីឡា វិទ្យាសាស្ត្រ និងបច្ចេកវិទ្យា”គឺជាកិច្ចការអាទិភាពទី១ ក្នុងចំណោម​កិច្ចការអាទិភាព​ទាំង៥ នៃបញ្ចកោណទី១ ដែលមានគោលដៅផ្តោតលើការបង្កើតបរិយាកាសល្អ សម្រាប់ការអប់រំ និងបណ្តុះ​បណ្តាល ប្រកបដោយគុណភាព និងជំនាញខ្ពស់ ដើម្បីជាកាតាលីករក្នុងសេដ្ឋកិច្ចជាតិ និងសម្រេច​មហិច្ឆិតាក្លាយជា​ប្រទេសមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និងមានចំណូលកម្រិតខ្ពស់​នៅឆ្នាំ​២០៥០។ ឯកឧត្ដម បណ្ឌិត លី ឆេង បានផ្តាំផ្ញើ ដល់ក្មួយៗ បន្តការសិក្សារៀនសូត្របន្ថែមទៀត ដើម្បីអាជីពខ្លួនឯងទៅថ្ងៃអនាគត និងប្រកួតប្រជែងដណ្តើមទីផ្សារ ការងារជាមួយ បណ្តាយុវជនទាំងអស់ ទាំងក្នុងតំបន់អាស៊ាន និងពិភពលោក ។ ចំពោះសិស្សដែលបានប្រឡងជាប់ សញ្ញាបត្រមធ្យមសិក្សាទុតិយភូមិ នឹងទទួលបានសញ្ញាបត្រចំនួនពីរ ៖ ១-ចេញដោយ សាលា ប៊ែលធី អន្តរជាតិ និង ២-ចេញ ដោយក្រសួងអប់រំ យុវជន និងកីឡា ៕