ក្រសួងឧស្សាហកម្មពង្រឹងការត្រួតពិនិត្យក្រុមហ៊ុនផ្គត់ផ្គង់ទឹកស្អាត
ភ្នំពេញ៖ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ គ្រោងនឹងពង្រឹងក្របខ័ណ្ឌបទប្បញ្ញត្តិរបស់ខ្លួនលើក្រុមហ៊ុនវិនិយោគទឹកស្អាត ដើម្បីធានាបាននូវស្តង់ដារខ្ពស់នៃគុណភាពទឹក និងការផ្គត់ផ្គង់ទឹកស្អាត។ ចំណាត់ការនេះធ្វើឡើងដើម្បីឆ្លើយតបទៅនឹងក្តីបារម្ភដែលថាក្រុមហ៊ុនមួយចំនួនមានការខ្វះខាតក្នុងការផ្គត់ផ្គង់ទឹកស្អាតតាមគុណភាពដែលបានកំណត់ និងផ្តល់សេវាកម្មមិនបានគ្រប់គ្រាន់ដល់សាធារណជន។
ក្នុងវេទិកាពិភាក្សាលើប្រធានបទ«អាទិភាពការងាររបស់ក្រសួងឧស្សាហកម្ម វិទ្យាស្រ្ត បច្ចេកវិទ្យា និង នវានុវត្តន៍» កាលពីថ្ងៃទី ២៦ ខែមករា ឆ្នាំ ២០២៤ ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានសង្កត់ធ្ងន់លើតម្រូវការចាំបាច់ក្នុងការមានវិធានការដ៏តឹងរ៉ឹង។
ឯកឧត្តមបានបញ្ជាក់ថា៖ «យើងកំពុងដុតដៃដុតជើង ពិនិត្យឡើងវិញទាំងក្របខ័ណ្ឌអាជ្ញាបណ្ណ កំពុងត្រួតពិនិត្យតើក្រុមហ៊ុនណាមានសមត្ថភាពបន្តអាជ្ញាបណ្ណ។ ត្រូវឲ្យគាត់ពង្រីកក្រុមហ៊ុនណាត្រូវច្របាច់បញ្ជូលគ្នា ព្រោះក្រុមហ៊ុនខ្លះមានអាជ្ញាបណ្ណតែមួយឃុំ តូចៗពេក ពិបាកឲ្យវិនិយោគទៅជាធំក្នុងការផ្គត់ផ្គង់ទឹក»។
លើសពីនេះ ក្រសួងបានផ្តួចផ្តើមបង្កើតក្រុមការងារដែលមានភារកិច្ចវាយតម្លៃស្ថានភាពប្រតិបត្តិការរបស់អ្នកផ្តល់ទឹកឯកជននៅទូទាំងប្រទេសកម្ពុជា។ ក្រុមនេះនឹងផ្ទៀងផ្ទាត់សមត្ថភាព និងជំនាញបច្ចេកទេសរបស់ប្រតិបត្តិករទាំងនេះ ដើម្បីធានាថាពួកគេបំពេញតាមស្តង់ដារដែលត្រូវការ។
គិតត្រឹមឆ្នាំ ២០២៣ កម្ពុជាបានផ្គត់ផ្គង់ទឹកស្អាតចំនួន ៨០ភាគរយនៃតម្រូវការសរុប ក៏ប៉ុន្តែគុណភាពទឹកនៅចោទជាបញ្ហា។ ការផ្គត់ផ្គង់ទឹកស្អាត ធ្វើឡើងតាមរយៈរដ្ឋាករទឹករដ្ឋចំនួន ១៣ និងប្រតិបត្តិករឯកជនមានចំនួន ៤០៧។ ក្នុងនោះរដ្ឋាករទឹករដ្ឋ ផ្តល់ការផ្គត់ផ្គង់ទឹកស្អាតជូនប្រជាពលរដ្ឋបានជាង ៣០ លានម៉ែត្រគូប ដល់គ្រួសារជាង៦៧ ម៉ឺនគ្រួសារ។ ចំណែកប្រតិបត្តិករឯកជន ផ្តល់ការផ្គត់ផ្គង់ទឹកស្អាតជូនប្រជាពលរដ្ឋចំនួន១២ លានម៉ែត្រគូប ដល់គ្រួសារជាង១ ,៦លានគ្រួសារ។ នេះបើយោងតាមរបាយការណ៍របស់ក្រសួងដដែល។
រាជរដ្ឋាភិបាលកម្ពុជា ផ្តល់អាទិភាពដល់ទឹកស្អាត ជាធាតុផ្សំដ៏សំខាន់នៃសុខភាពសាធារណៈ និងសុខុមាលភាព ដោយស្របតាមយុទ្ធសាស្ត្របញ្ចកោណ ដែលកំណត់ “មនុស្ស ផ្លូវ ទឹក អគ្គិសនី និងបច្ចេកវិទ្យា” ជាគន្លឹះអាទិភាពនៃការអភិវឌ្ឍន៍សង្គម។ កម្ពុជាគ្រោងសម្រេចឲ្យបាននូវការផ្គត់ផ្គង់ទឹកស្អាត១០០ភាគរយនៅទូទាំងប្រទេសត្រឹមឆ្នាំ២០៣០៕
ដោយ៖សែន ដាវិត
