បាងកក៖ សមាជិកក្រុមតន្រ្តីរ៉ុករួមគ្នា រវាងប្រទេសរុស្ស៊ី និងប្រទេសបេឡារុស្សត្រូវបានឃុំខ្លួន នៅក្នុងពន្ធនាគារនៃប្រទេសថៃ នៅថ្ងៃពុធនេះ បន្ទាប់ពីត្រូវបានឃាត់ខ្លួន ក្រោយពេលពួកគេសម្តែងនៅលើកោះលំហែដ៏ល្បីមួយរបស់ថៃ។ ការឃាត់ខ្លួននេះដោយសារពួកគេបានរិះគន់លោកប្រធានាធិបតី លោក វ្ល៉ាឌីមៀ ពូទីន និងការដឹកនាំធ្វើសង្រ្គាមនៅអ៊ុយក្រែន របស់លោក ពូទីន។

មន្ត្រីថៃបានបញ្ជាក់ថា ពួកគេបានចាប់ខ្លួនមនុស្ស “ប្រាំពីរ ឬប្រាំបីនាក់” កាលពីសប្តាហ៍មុន នៅភូកេត ពីបទសម្តែងដោយគ្មានលិខិតអនុញ្ញាតការងារត្រឹមត្រូវ ហើយបាននិយាយថា ពួកគេអាចប្រឈមមុខនឹងការនិរទេស ចេញពីប្រទេសថៃ។ ប្រភពប៉ូលិសមួយ បានប្រាប់ AFP កាលពីថ្ងៃពុធ ថា “៤ ឬ ៥នាក់” ឥឡូវនេះ ត្រូវបានឃុំខ្លួននៅមន្ទីរឃុំឃាំង ក្នុងទីក្រុងបាងកក។

អង្គការឃ្លាំមើលសិទ្ធិមនុស្ស អំពាវនាវកុំឱ្យពួកគេនិរទេស ទៅប្រទេសរុស្ស៊ី ដោយបារម្ភពីបញ្ហាសុវត្ថិភាព។ អង្គការឃ្លាំមើលសិទ្ធិមនុស្ស ហៅកាត់ HRW បាននិយាយថា ពួកគេនឹងប្រឈមមុខនឹង «ការធ្វើទុក្ខបុកម្នេញ» ប្រសិនបើបញ្ជូនពួកគេ ទៅប្រទេសរុស្ស៊ីវិញ។ HRW ថែមទាំងលើកឡើង ពីការអត្ថាធិប្បាយរបស់អ្នកនាំពាក្យក្រសួងការបរទេសរុស្ស៊ី ដែលចោទប្រកាន់ក្រុមនេះថា «ក្រុមគាំទ្រអំពើភេរវកម្ម» ទៀតផង។

តាមរយៈបណ្តាញសង្គម Telegram ផ្លូវការ របស់ក្រុម Bi-2 កាលពីថ្ងៃពុធ បានឲ្យដឹងថា តារាចម្រៀង Egor Bortnik ដែលមានឈ្មោះក្នុងសិល្បៈថា Lyova បានចាកចេញពីប្រទេសថៃហើយ។ ពួកគេបានបញ្ជាក់ថា «Lyova Bi-2 បានហោះហើរទៅកាន់ប្រទេសអ៊ីស្រាអែល ប៉ុន្តែ សមាជិកក្រុមដែលនៅសល់ នៅតែស្ថិតក្នុងពន្ធនាគារចំណាកស្រុក នៅក្នុងបន្ទប់ចង្អៀត នៅថៃ»៕ ប្រភពពី AFP ប្រែសម្រួល៖សារ៉ាត