(ភ្នំពេញ)៖ សម្តេចធិបតី ហ៊ុន ម៉ាណែត បានថ្លែងនូវការសរសើរដល់ស្នាដៃកូនខ្មែរ ចំពោះការបង្កើតថ្នាលផ្ទៀងផ្ទាត់ឯកសារ verify.gov.kh ឈ្នះមេដាយមាស នៃពានរង្វាន់ឌីជីថលអាស៊ាន ឆ្នាំ២០២៤ បង្ហាញឱ្យឃើញនូវសមត្ថភាពរបស់កម្ពុជា ។ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី កម្ពុជា បានថ្លែងដូច្នេះក្នុងពិធីសម្ពោធអគារសាកលវិទ្យាល័យជាតិគ្រប់គ្រង សាខាវាលស្បូវ និងប្រគល់សញ្ញាបត្រជូននិស្សិតជាង ៥ពាន់នាក់ នាព្រឹកថ្ងៃទី១៥ ខែកុម្ភៈ ឆ្នាំ២០២៤ ។

សម្តេចធិបតី បានបញ្ជាក់ថា ថ្ងៃមុនឯកឧត្តម ជា វ៉ាន់ដេត បានប្រាប់មកខ្ញុំ នៅក្នុងក្រសួងយើងបានអភិវឌ្ឍកម្មវិធីមួយ (verify.gov.kh) ដែលយកទៅប្រកួងប្រជែងនៅអាស៊ានយើងបានលេខ១ ។ នេះគឺជាសាក្សីជាក់ស្តែង ជាឧទាហរណ៍ជាក់ស្តែង នៅក្នុងលទ្ធភាព និងសមត្ថភាពនៃកូនខ្មែរ ដែលបានផ្តល់ឱកាសហើយដាក់ទិសដៅត្រូវ គោលនយោបាយត្រូវ យើងនឹងមានសមត្ថភាពក្នុងការប្រកួងប្រជែងនេះបាន ។ ការទទួលបានពានរង្វាន់ពីកម្មវិធី verify.gov.kh របស់ក្រសួងប្រៃសណីយ៍ និងទូរគមនាគមន៍ គឺជាការបង្ហាញឱ្យឃើញនូវសមត្ថភាពរបស់កម្ពុជា ។

សម្តេចធិបតី ហ៊ុន ម៉ាណែត បានថ្លែងទៀតថា នេះហើយគឺជាមោទភាពជាតិរបស់យើង ហើយនេះ គឺជាអ្វីដែលយើងសម្រេចបានជោគជ័យក្នុងរយៈពេល ៤០ឆ្នាំមកនេះ ពីប្រទេសដែលដួលបាក់ដៃ បាក់ជើង ងើបមករត់ជិតទាន់គេនេះឯង ហើយបើសិនយើងកសាងមូលដ្ឋាននេះកាន់តែរឹងមាំតទៅទៀត យើងមិនមានភាពស្រពិចស្រពិលថាកម្ពុជានឹងបន្តឈានទៅមុខអាចរត់ឈ្នះគេ ដែលនេះគឺជាអ្វីដែលសំខាន់របស់យើង ។

សម្តេច បានបន្ថែមថា ការកសាងធនធានមនុស្សនេះ គឺបានជួយបង្កើនភាពប្រកួតប្រជែងរបស់កម្ពុជា ឱ្យយើងអាចបានបិទបាននូវគម្លាត និងជួយបង្កើតភាពម្ចាស់ការរបស់កម្ពុជាផងដែរ ។

សូមរំលឹកថា ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh ដែលអភិវឌ្ឍដោយក្រសួងប្រៃសណីយ៍និងទូរគមនាគមន៍ (ក.ប.ទ.) កាលពីថ្ងៃទី០១ ខែកុម្ភៈ ឆ្នាំ២០២៤ បានឈ្នះមេដាយមាសនៃពានរង្វាន់ឌីជីថលអាស៊ានឆ្នាំ២០២៤ ដែលរៀបចំនៅប្រទេសសិង្ហបុរី ក្រោមក្របខណ្ឌកិច្ចប្រជុំរដ្ឋមន្ត្រីឌីជីថលអាស៊ានលើកទី៤ (The 4th ASEAN Digital Ministers’ Meeting) ដោយមានការចូលរួមពីរដ្ឋមន្រ្តីឌីជីថលអាស៊ាន ប្រទេសទីម័រខាងកើត និងដៃគូអាស៊ាន ដែលរួមមានសាធារណរដ្ឋកូរ៉េ ចិន ជប៉ុន ឥណ្ឌាសហរដ្ឋអាម៉េរិក និងសហភាពទូរគមនាគមន៍អន្តជាតិ។

ក្នុងការប្រកួតប្រជែងពានរង្វាន់ឌីជីថលអាស៊ានឆ្នាំ២០២៤នេះ ប្រទេសសមាជិកអាស៊ានទាំង១០ បានសម្រិតសម្រាំងផលិតផលឌីជីថល សេវា និងកម្មវិធី (Digital Products, Services and Programs) ល្អៗចំនួន១២៥ មកដាក់ពាក្យប្រកួតប្រជែង។ ឆ្លងកាត់វគ្គជម្រុះជាច្រើនលើក ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh ជាបេក្ខភាពតំណាងរបស់កម្ពុជាដែលឈានដល់វគ្គផ្តាច់ព្រ័ត្រ។ បន្ទាប់ពីការប្រកួតប្រជែង ជាមួយបេក្ខភាពចុងក្រោយទាំងអស់ ថ្នាលផ្ទៀងផ្ទាត់ឯកសាររបស់រាជរដ្ឋាភិបាល verify.gov.kh បានឈ្នះមេដាយមាស លើផ្នែកដំណោះស្រាយឌីជីថលក្នុងការផ្តល់សេវាសាធារណៈល្អបំផុតរបស់អាស៊ាន ឆ្នាំ២០២៤៕

អត្ថបទ ៖ វណ្ណលុក
រូបភាព ៖ វ៉េង លិមហួត , សួង ពិសិដ្ឋ , ង៉ាន់ទិត្យ