ក្រសួងដឹកជញ្ជូននៃប្រទេសម៉ាលី បានឲ្យដឹងថា មនុស្សចំនួន ៣១ នាក់បានស្លាប់ ហើយមនុស្ស ១០នាក់ផ្សេងទៀតរងរបួស ក្នុងហេតុការណ៍រថយន្តក្រុងមួយគ្រឿង បានបើកធ្លាក់ពីលើស្ពានមួយកន្លែង នៅឯតំបន់ភាគអាគ្នេយ៍ កាលពីល្ងាចថ្ងៃអង្គារ។

ក្រសួងបន្តថា រថយន្តមួយគ្រឿងនេះ ប៉ុនប៉ងធ្វើដំណើរឆ្ពោះ ទៅកាន់ប្រទេស Burkina Faso ក្បែរខាង ដែលស្ថិតក្នុងប្លុកអាហ្វ្រិកដូចគ្នាដោយឆ្លងកាត់ស្ពានឆ្លងទន្លេបាហ្គោ។

គេសន្និដ្ឋានជាជំហានដំបូងថា បណ្តាលមកពីអ្នកបើកបរបាត់បង់ម្ចាស់ការក្នុងការគ្រប់គ្រងរថយន្ត ពេលកំពុងធ្វើដំណើរ។

គ្រោះថ្នាក់ចរាចរណ៍បានកើតឡើងជាញឹកញាប់នៅប្រទេសម៉ាលី ខណៈដែលប្រទេសនេះ សម្បូរដោយផ្លូវថ្នល់ និងផ្លូវហាយវេ ស្ថិតក្នុងស្ថានភាពមិនល្អ ហើយយានយន្តវិញ ក៏មិនសូវមានគុណភាពដែរ។ កាលពីដើមខែនេះ មនុស្ស ១៥ នាក់បានស្លាប់ និង៤៦ នាក់បានរងរបួស ក្នុងគ្រោះថ្នាក់រថយន្តក្រុងបុកជាមួយរថយន្តដឹកទំនិញ៕ ប្រភពពី AFP ប្រែសម្រួល៖ សារ៉ាត