សមាជិកក្រុមប្រឹក្សាឃុំជាប់ឆ្នោតក្នុងតំណែងរបស់គណបក្សភ្លើងទៀន ខេត្តកំពង់ធំ ចំនួន៣២រូប បានដាក់ពាក្យបណ្តឹងប្តឹងតវ៉ាទប់ស្កាត់ចំពោះការលុបឈ្មោះចេញពីគណបក្ស និងប៉ុនប៉ងដកតួនាទីរបស់ពួកគាត់ ដោយអយុត្តិធម៌របស់គណបក្សភ្លើងទៀន នៅខេត្តកំពង់ធំ ក្រោយការបោះឆ្នោតព្រឹទ្ធសភា។ ការប្តឹងនេះ គឺប្តឹងទៅអភិបាល នៃគណៈអភិបាលខេត្តកំពង់ធំ នៅថ្ងៃទី១៨ ខែមីនា ឆ្នាំ២០២៤។

នៅក្នុងពាក្យបណ្តឹងដែល AMS ទទួលបាន បានឱ្យដឹងថា គណបក្សភ្លើងទៀន បានលុបឈ្មោះចេញពីគណបក្ស និងប៉ុនប៉ងដកតួនាទីរបស់ខ្ញុំបាទ នាងខ្ញុំទាំងអស់គ្នា បន្ទាប់ពីការបោះឆ្នោតព្រឹទ្ធសភា កាលពីថ្ងៃទី២៥ ខែកុម្ភៈ ឆ្នាំ២០២៤ ដោយហេតុផលចោទប្រកាន់ថា ខ្ញុំបាទ នាងខ្ញុំពុំបានបោះឆ្នោតឱ្យគណបក្សឆន្ទៈខ្មែរ តាមការណែនាំរបស់គណបក្សភ្លើងទៀន។ ការសង្ស័យចោទប្រកាន់មកលើខ្ញុំបាទ នាងខ្ញុំបែបនេះ គឺជាការរំលោភលើគោលការណ៍សម្ងាត់នៃការបោះឆ្នោត និងជាទង្វើ ល្មើសច្បាប់បោះឆ្នោតយ៉ាងធ្ងន់ធ្ងរ រួមទាំងរំលោភបំពានលើសេចក្តីប្រកាសព័ត៌មាន លេខៈ ០០៤ សប្រក ចុះ ថ្ងៃទី១៥ ខែកុម្ភៈ ឆ្នាំ២០២៤ របស់ក្រសួងមហាផ្ទៃ។ បន្ថែមលើនេះទៀត គណបក្សភ្លើងទៀន បានលុបឈ្មោះចេញពីគណបក្ស និងប៉ុនប៉ងដកតួនាទីរបស់ខ្ញុំបាទ នាងទាំងអស់គ្នា គឺជាទង្វើប្រមាថមើលងាយយ៉ាងធ្ងន់ធ្ងរ ដល់ប្រជាពលរដ្ឋម្ចាស់ឆ្នោតនៅមូលដ្ឋានឃុំ និងជាទង្វើរំលោភសិទ្ធិនយោបាយ បង្កការឈឺចាប់យ៉ាងខ្លាំងមក លើខ្ញុំបាទ នាងខ្ញុំទាំងអស់គ្នា ខណៈដែលគណបក្សភ្លើងទៀនសព្វថ្ងៃ គ្មានឯកសារផ្លូវច្បាប់ត្រឹមត្រូវ និងមិនអាចចូលរួមគ្រប់ការបោះឆ្នោតជាបន្តបន្ទាប់ទៅមុខទៀតបានឡើយ។

សមាជិកក្រុមប្រឹក្សាឃុំជាប់ឆ្នោតក្នុងតំណែងរបស់គណបក្សភ្លើងទៀន ខេត្តកំពង់ធំ ចំនួន៣២រូប ដែលជាក្រុមប្រឹក្សាឃុំជាប់ឆ្នោតក្នុងតំណែង សូមធ្វើការតវ៉ាជំទាស់យ៉ាងដាច់អហង្ការចំពោះការលុបឈ្មោះចេញពីគណបក្ស និងប៉ុនប៉ងដកតួនាទី និងសូមស្នើ ឯកឧត្តមអភិបាលនៃគណៈអភិបាលខេត្តកំពង់ធំ មេត្តាជួយរកយុត្តិធម៌ ហើយសូមកុំធ្វើការផ្លាស់ ប្តូរតួនាទីរបស់ពួកគាត់ តាមការស្នើសុំរបស់គណបក្សភ្លើងទៀន ជាដាច់ខាត៕
ដោយ៖ពលជ័យ