(ភ្នំពេញ)៖ សម្ដេចធិបតី ហ៊ុន ម៉ាណែត បានបង្ហើបគោលដៅរបស់រាជរដ្ឋាភិបាល ក្នុងការកសាងបុរីជនបទ ដែលជាគម្រោងរៀបចំភូមិឋាន របស់ប្រជាពលរដ្ឋនៅតាមទីជនបទ ឱ្យបានល្អប្រសើរ ។ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ដូច្នេះ ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៣ និងលើកទិសដៅការងារឆ្នាំ២០២៤ របស់ក្រសួងអភិវឌ្ឍន៍ជនបទ នារសៀលថ្ងៃទី២០ ខែមីនា ឆ្នាំ២០២៤ ។

សម្តេចធិបតី ហ៊ុន ម៉ាណែត បានមាប្រសាសន៍ថា រាជរដ្ឋាភិបាល នីតិកាលថ្មីនេះ មានគោលដៅកសាងបុរីជនបទ ជាគម្រោងរៀបចំភូមិឋានរបស់ប្រជាពលរដ្ឋនៅតាមទីជនបទ ឲ្យបានល្អប្រសើរ ។

សម្ដេចធិបតី បានបញ្ជាក់ដូច្នេះថា៖ «មិញសួរទៅ ឯកឧត្តម សាយ សំអាល់ ក៏មានផែនការមួយ គេហៅថា បុរីជនបទ ធ្លាប់ឮបុរី ១០០ខ្នង ធ្លាប់ឮបុរីទន្លេបាសាក បន្ដិចទៀត មានបុរីជន ដែលសហការគ្នាជាមួយក្រសួងពាក់ព័ន្ធ ព្រោះបុរីជនបទ សំដៅរៀបចំ ភូមិ ឃុំ របស់ប្រជាពលរដ្ឋ ឲ្យសមរម្យ សម្រាប់ប្រជាពលរដ្ឋរបស់យើងរស់នៅ ទាំងជីវភាព , នេះជាគោលការណ៍ដែលយើងត្រូវធ្វើ ។

ជាមួយគ្នានេះដែរ សម្ដេចនាយករដ្ឋមន្ដ្រី បាន លើកឡើងថា រាជរដ្ឋាភិបាល អាណត្តិថ្មីនេះ ក៏បានដាក់ចេញគោលនយោបាយជាច្រើន ក្នុងនោះ កំពុងកាត់បន្ថយបញ្ហាគម្លាតរវាងទីក្រុង និងជនបទ ផងដែរ ។ រាល់គោលនយោបាយរបស់ រាជរដ្ឋាភិបាល ដែលបានដាក់ចេញ គឺដើម្បីផលប្រយោជន៍របស់ប្រជាពលរដ្ឋទាំងអស់ ខណៈរាជ រដ្ឋាភិបាល អាណត្តិទី៧នេះ នឹងខិតខំកាត់បន្ថយភាពក្រីក្រ និងបង្កើនការងារជូន ដល់ពលរដ្ឋឲ្យកាន់តែច្រើនបន្ថែមទៀត ។

សូមរំលឹកថា កាលពីថ្ងៃទី១៦ ខែមករា ឆ្នាំ២០២៤ ឯកឧត្តម ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានផ្ដល់នូវវិញ្ញាបនបត្រសម្គាល់ម្ចាស់អចលនវត្ថុជូនសម្បទានិកនៃដីសម្បទានសង្គមកិច្ចចំនួន ២០០គ្រួសារនៅភូមិជីកដី ឃុំអណ្ដូងត្របែក ស្រុករមាសហែក ខេត្តស្វាយរៀង ។

ក្នុងឱកាសនោះ ឯកឧត្តម ឧបនាយករដ្ឋមន្ត្រី សាយ សំអាល់ បានគូសបញ្ជាក់ថា លើសពីការទទួលបានវិញ្ញាបនបត្រសម្គាល់ម្ចាស់អចលនវត្ថុនាពេលនេះ ប្រជាពលរដ្ឋនឹងទទួលបានការពង្រីកភូមិថ្មី ដែលផ្សារភ្ជាប់ជាមួយនឹងភូមិចាស់ និងមានការរៀបចំទៅតាមលក្ខខណ្ឌ និងតាមគំនិតនគរូបនីយកម្ម ក្នុងនោះមានការកសាងផ្លូវខ្វាត់ខ្វែងស្របតាមបច្ចេកទេសដែលខុសគ្នាពីភូមិចាស់។ ជាមួយនឹងការរៀបចំពង្រីកភូមិថ្មីនេះ ក៏នឹងមានការគិតគូរអំពីសេដ្ឋកិច្ចស្របតាមអ្វីដែលយើងហៅថា បុរីជនបទ ក្នុងនោះ ត្រូវរៀបចំពង្រីកទីប្រជុំជន ត្រូវមានផ្លូវសម្រាប់ធ្វើដំណើរ មានផ្សារ សាលារៀន មន្ទីរពេទ្យ ត្រូវវាស់វែងដីឡូត៍ឱ្យបានច្បាស់លាស់ និងចេញបណ្ណកម្មសិទ្ធិជូនប្រជាពលរដ្ឋដើម្បីទប់ស្កាត់កុំឱ្យមានវិវាទដីធ្លី ហើយដីឡូត៍នីមួយៗគប្បីត្រូវបែងចែកជាផ្នែកដើម្បីបង្កើនជីវភាពគ្រួសារ ក្នុងនោះ ១/៤ នៃដីឡូត៍នេះគឺជាផ្ទះ ១/៤គឺជាស្រះទឹកសម្រាប់ចិញ្ចឹមត្រី ឬដើម្បីមានទឹកទុកប្រើប្រាស់ស្រោចស្រពដំណាំកសិផលផ្សេងៗ ១/៤ទៀតនៃដីឡូត៍នេះទុកសម្រាប់ដាំដំណាំ និង១/៤ ទៀតទុកសម្រាប់ចិញ្ចឹមសត្វ។

ឯកឧត្តម ឧបនាយករដ្ឋមន្រ្តី បានរំលេចថា រាជរដ្ឋាភិបាល នីតិកាលទី៧ ដឹកនាំដោយសម្ដេចមហាបវរធិបតី ហ៊ុន ម៉ាណែត បានដាក់ចេញនូវគោលនយោបាយច្បាស់លាស់ ក្នុងការទាញប្រជាពលរដ្ឋក្រីក្រ ឱ្យចាកចេញពីភាពខ្វះខាត និងធានាជីវភាពរស់នៅសមរម្យ ដូចប្រជាពលរដ្ឋទូទៅ ៕

អត្ថបទ ៖ វណ្ណលុក
រូបភាព ៖ វ៉េង លិមហួត , សួង ពិសិដ្ឋ