ខេត្តបន្ទាយមានជ័យ៖ ឯកឧត្តម ឌិត ទីណា ប្រធានក្រុមការងាររាជរដ្ឋាភិបាលចុះ មូលដ្ឋាន ខេត្តបន្ទាយមានជ័យ កាលពីថ្ងៃទី២២ ខែមីនា ឆ្នាំ២០២៤ បានអញ្ជើញដឹកនាំ កិច្ចប្រជុំជាមួយក្រុមការងាររាជរដ្ឋាភិបាលចុះមូលដ្ឋានស្រុកភ្នំស្រុក នៃខេត្តបន្ទាយ មាន ជ័យ ។

បន្ទាប់ពីបានស្ដាប់របាយការណ៍របស់សមត្ថកិច្ច និងអាជ្ញាធរមូលដ្ឋានប្រចាំឃុំទាំង៦ នៃស្រុកភ្នំស្រុករួចមក ឯកឧត្តម ប្រធានក្រុមការងារ បានវាយតម្លៃជាបឋមថា ស្ថានភាព ទូទៅ នៃស្រុកភ្នំស្រុកទាំងមូល ដំណើរការជាប្រក្រតី បើទោះបីជាមានបញ្ហាប្រឈមខ្លះ ក៏ដោយ ។

ឯកឧត្តម ឌិត ទីណា បានលើកទឹកចិត្តដល់មន្ដ្រីរាជការនិងអាជ្ញាធរនៅឃុំទាំង ៦ នៃស្រុកភ្នំស្រុក បន្តយកចិត្តទុកដាក់បម្រើប្រជាជនឱ្យអស់ពីសមត្ថភាព និងលទ្ធភាព ដែលខ្លួនមាន សំដៅលើកកម្ពស់ជីវភាព និងសុខមាលភាពរបស់ប្រជាជនឱ្យកាន់ តែល្អ ប្រសើរឡើង ។ ចំពោះសំណើផ្សេងៗដែលឃុំនីមួយៗនៃស្រុក ភ្នំស្រុក បាន លើកឡើង ឯកឧត្តមប្រធាន ក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ នឹងទទួល យកទៅពិចារណា ដោយពិនិត្យទៅលើភាពចាំបាច់ និងលទ្ធភាពដែលមាន ដោយ តម្កល់ផលប្រយោជន៍ ប្រជា ជនជាធំ ៕

ប្រភព ៖ ក្រសួងកសិកម្ម