Nissan ត្រៀមបញ្ចេញរថយន្តស៊េរីថ្មីចំនួន ៣០ម៉ូឌែល ប្រជែងចិន
តូក្យូ ៖ ក្រុមហ៊ុន Nissan បានប្រកាសនៅថ្ងៃចន្ទថា ខ្លួនមានបំណងបញ្ចេញវត្តមានរថយន្តស៊េរីថ្មីចំនួន ៣០ម៉ូដែល ក្នុងរយៈពេល ៣ឆ្នាំខាងមុខ ដែលក្នុងនោះចំនួន ១៦ម៉ូដែល ជារថយន្តអគ្គិសនី។
ក្រុមហ៊ុន Nissan ប្រកាសថា ខ្លួននឹងកាត់បន្ថយថ្លៃដើមផលិតរថយន្តអគ្គិសនីជំនាន់ក្រោយចំនួន ៣០ភាគរយ ខណៈដែលក្រុមហ៊ុនរថយន្តយក្សរបស់ជប៉ុនមួយនេះ កំពុងប្រឹងប្រែងប្រកួតជាមួយគូប្រជែងចិន។ ក្រុមហ៊ុន Nissan បានបញ្ជាក់ថា ខ្លួននឹងព្យាយាមសម្រេចឱ្យបាននូវការកាត់បន្ថយការចំណាយយ៉ាងសំខាន់ នៅក្នុងការផលិតរថយន្តអគ្គិសនីម៉ូដែលទំនើបៗ តាមរយៈការអភិវឌ្ឍន៍ជាក្រុមតាមបែបលក្ខណៈគ្រួសារ ជាមួយនឹងការផលិតរថយន្តក្រោមវិធីសាស្រ្ត ដែលចាប់ផ្តើមក្នុងឆ្នាំសារពើពន្ធ ២០២៧។
![](https://asset.ams.com.kh/central/media/2024/03/photo_2024-03-26_14-59-41-1024x682.jpg)
ផែនការនេះ ធ្វើឡើងបន្ទាប់ពីក្រុមហ៊ុន Nissan និង Honda បានប្រកាសក្នុងខែមីនានេះថា ពួកគេកំពុងស្វែងរកភាពជាដៃគូយុទ្ធសាស្ត្រ នៅក្នុងខ្សែសង្វាក់ផលិតកម្មរថយន្តអគ្គិសនី ដើម្បីតាមឱ្យទាន់ដៃគូប្រកួតប្រជែងចិន។ ចិនបានវ៉ាដាច់ជប៉ុន ក្នុងនាមជាប្រទេសនាំចេញរថយន្តដ៏ធំបំផុត របស់ពិភពលោកកាលពីឆ្នាំមុន ដោយសារតែកំណើននៃការលក់រថយន្តអគ្គិសនី។
គួរបញ្ជាក់ថា កាលពីខែកុម្ភៈ Nissan បានទម្លាក់ការព្យាករណ៍បរិមាណលក់ឯកតារបស់ខ្លួន សម្រាប់ឆ្នាំសារពើពន្ធបច្ចុប្បន្នពី ៣.៧លានគ្រឿង មកត្រឹម ៣.៥៥លានគ្រឿង ដោយលើកឡើងពីការរំខានផ្នែកដឹកជញ្ជូនបណ្តោះអាសន្ន និងការប្រកួតប្រជែងកាន់តែខ្លាំង។ ទន្ទឹមគ្នា ក្រុមហ៊ុន Nissan ក៏បានអះអាងដែរថា នៅឆ្នាំ២០៣០ ខ្លួនមានបំណងផលិតរថយន្តអគ្គិសនីក្នុងតម្លៃដូចគ្នាទៅនឹងរថយន្តម៉ាស៊ីនសាំង។ ហើយក្រុមហ៊ុនផលិតរថយន្តយក្សរបស់ជប៉ុនមួយនេះ ក៏បានបង្ហាញពីគោលដៅលក់រថយន្តចំនួន ១លានគ្រឿងជារៀងរាល់ឆ្នាំនៅទូទាំងពិភពលោកក្នុងរយៈពេល៣ឆ្នាំផងដែរ៕
![](https://asset.ams.com.kh/central/media/2024/03/photo_2024-03-26_14-59-40-1024x682.jpg)
ប្រភព៖ AFP ប្រែសម្រួលដោយ៖ ឈឹម ទីណា