បាងកក៖ ស្ថាប័នព្យាករណ៍អាកាសធាតុថៃបានព្រមានថា សីតុណ្ហភាពខ្ពស់អាចឡើងដល់ ចន្លោះពី ៤៣ ដល់ ៤៤.៥ អង្សាសេ ក្នុងខែមេសានេះ។

ទីភ្នាក់ងារសារព័ត៌មានបាងកកប៉ុស្តិ៍ របស់ថៃ បានចេញផ្សាយ នាពេលថ្មីៗនេះ ដោយបានដកស្រង់ប្រភពពីនាយកដ្ឋានឧតុនិយម ឲ្យដឹងថា ក្នុងសប្តាហ៍ដំបូង នៃខែមេសា អាកាសធាតុក្តៅខ្លាំង និងក្តៅខ្លាំង ទំនងជាមាន នៅតំបន់ភាគឦសាន និងភាគខាងកើត ក្នុងនោះ គេបញ្ជាក់ថា សីតុណ្ហភាពខ្ពស់នៅក្នុងតំបន់ទាំងពីរនេះ អាចឡើងដល់ ៤១ ទៅ៤៣ អង្សាសេ ក្នុងអំឡុងពេលនេះ។ ចាប់ពីថ្ងៃទី ៨ ដល់ថ្ងៃទី ១០ ខែមេសា អាចនឹងមានព្យុះនារដូវក្តៅ ថែមទៀតផង។

នាយកដ្ឋានឧតុនិយមបាននិយាយទៀតថា សីតុណ្ហភាពខ្ពស់បំផុត អាចកើនឡើង ចន្លោះពី ៤៣ ទៅ ៤៤.៥អង្សាសេ ជាពិសេស នៅភាគខាងជើង ឦសាន និងផ្នែកខាងលើ នៃតំបន់ទំនាបកណ្តាល និងខាងកើត។

ប្រភពក៏បានព្យាករណ៍ដែរថា ពេញមួយខែមេសានេះ សីតុណ្ហភាពនឹងខ្ពស់ជាងកម្រិតអប្បរមា ប្រហែល ៣០%៕ ប្រភពពី BangkokPost ប្រែសម្រួល៖ សារ៉ាត