(ភ្នំពេញ)៖ ក្នុងរយៈពេល ១០ឆ្នាំមកហើយ ខេត្តកំពង់ស្ពឺ បានរៀបចំការប្រណាំង រទេះសាឡីគោលឿន ហើយក្នុងឆ្នាំនេះដែរ មានរទេះគោចំនួន ៥០ ដោយមានទាំងប្រភេទរទេះគោធំ និងគោតូច បានចូលរួមប្រកួតយ៉ាងដោយក្តីសប្បាយរីករាយ មុនពិធីបុណ្យចូលឆ្នាំប្រពៃណីខ្មែរឈានចូលមកដល់។

ក្នុងព្រឹត្តិការណ៍«ប្រណាំងរទេះសាឡីគោលឿន» កាលពីថ្ងៃទី៧ ខែមេសា ឆ្នាំ២០២៤ ក្នុងភូមិព្រៃរំដួល ឃុំត្រពាំងគង ស្រុកសំរោងទង ខេត្តកំពង់ស្ពឺ អ្នកស្រី នី កូល ជនជាតិបារាំង ដែលបានចូលរួមទស្សនាការប្រកួតប្រណាំងរទេះសាឡីគោលឿន បានលើកឡើងថា វាពិតជាអស្ចារ្យ ទំនៀមទំលាប់ នៃការប្រណាំងរទេះគោ ។ វាមិនត្រឹមតែមានភាពរីករាយក្នុងពេលពិធីបុណ្យចូលឆ្នាំមកដល់ទេ តែវាបានបង្កប់នូវវប្បធម៌ដ៏យូរលង់របស់ពលរដ្ឋខ្មែរថែមទៀត ។

ដោយឡែក លោក ជីល ប៊ែរ ជនជាតិបារាំងដូចគ្នា បានបញ្ជាក់ថា លោកមានក្តីរីករាយដែលបានមកចូលរួមមើលការប្រកួតរទេះសាឡីគោលឿន ។ វាជាព្រឹត្តិការណ៍មួយគួរស្ងើចសរសើរ និងវាជាទិដ្ឋភាពគួរជាទីទាក់ទាញ។លោកមានការពេញចិត្ត ហើយចង់មកទស្សនាទៀតបើមានឱកាសក្រោយៗទៀត។

លោក សុច លាភ ពលរដ្ឋខេត្តកំពស់ស្ពឺ បានប្រាប់ថា ការប្រកួតប្រណាំងរទេះសាឡីគោលឿន បានរំលឹកនូវចាស់បុរាណប្រើប្រាស់ប្រចាំថ្ងៃ និងជាប្រពៃណីខ្មែរបុរាណ។ ពលរដ្ឋខ្មែរសម័យដើមឡើយប្រើរទេះជាយាន្តសំខាន់ក្នុងការដឹកសម្ភារៈ និងប្រើគោប្រកបរបរកសិកម្មជាសំខាន់ ។
ប្រធានមន្ទីរវប្បធម៌ខេត្តកំពង់ស្ពឺ លោក ស៊ុន មានជ័យ បានឱ្យដឹងថា ការប្រណាំងរទះសាឡីគោលឿននេះគឺជាលើកទី១០ហើយ និងពិធីនេះប្រារព្ធធ្វើឡើងដើម្បីចូលរួមអភិរក្ស និង ផ្សព្វផ្សាយ កាន់តែទូលំទូលាយនូវប្រពៃណីប្រណាំងរទេះសាឡីគោលឿន ដើម្បីលើកស្ទួយនូវប្រពៃណីដូនតាខ្មែរយើងតាំងតែពីបុរាណកាលមក។

លោកបានប្រាប់ដែរថា សម្រាប់ការប្រកួតប្រជែងនេះគេបានធ្វើការបែងចែកជា២ផ្នែក គឺការប្រណាំរទេះសាឡីគោលឿនខ្នាតធំ និងរទេះសាឡីគោលឿនខ្នាតតូច។ សម្រាប់រទះសាឡីគោលឿនខ្នាតធំមានចំនួន ២១គូ ក្នុងនេះមកពីខេត្តកំពង់ស្ពឺ ១១គូ មកពីភ្នំពេញ ៥គូ កំពង់ចាម ១គូ កណ្តាល ៣គូ ។ ដោយឡែករទះសាឡីគោលឿនខ្នាតតូចមានចំនួន ២៩គូ ក្នុងនោះមកពីខេត្តកំពង់ស្ពឺ ១៥គូ ភ្នំពេញ ២គូ កំពង់ចាម ១គូ និងកណ្តាល ១១គូ ។

លោក សរ សុពុត្រា អភិបាលរង ខេត្តកំពង់ស្ពឺបានឱ្យដឹងថា ការប្រណាំងរទះសាឡីគោលឿននេះ គឺធ្វើឡើងចង់រំលឹកដល់ដូនតាខ្មែរ ដែលបានកសាងនូវព្រឹត្តិការណ៍មួយនេះនាកន្លងមក ។ ពិធីប្រណាំងរទះសាឡីគោលឿននេះ ជាទំនៀមទំលាប់ នៃវប្បធម៌ជាតិរបស់យើង ដែលមានតាំងតែពីយូយារណាស់មកហើយ។

សម្រាប់លទ្ធផលជ័យលាភីរទេះគោតូច ៖ លេខ ១ ស្ទួនបានទៅលើ លោក វង់ អ៊ុយ (គោឈ្មោះ អាទឹកចាន់) មកពីភូមិត្រពាំងល្ពាក់ ឃុំយុទ្ធសាមគ្គី ស្រុកសាមគ្គីមុនីជ័យ ខេត្តកំពង់ស្ពឺ, លោក មុត រិទ្ធ (គោឈ្មោះ គង្គាស្មោះស្នេហ៍) មកពីភូមិព្រៃក្រាយ ឃុំព្រៃពួច ស្រុកអង្គស្នួល ខេត្តកណ្តាល ។ លេខ ៣ ៖ លោក ផន គន្ធា (គោឈ្មោះ អាជោគជ័យ) មកពីភូមិទួលស្វាយ សង្កាត់បឹងធំ ខ័ណ្ឌកំបូល រាជធានីភ្នំពេញ។

ចំណែកគោធំលេខ ១បានទៅលើ លោក តាំង ស្រៀង (គោឈ្មោះ អាស្រីតូចស្អាតមែន) មកពីភូមិស្រះព្រីង ឃុំបាធាយ ស្រុកបាធាយ ខេត្តកំពង់ចាម ។ ជ័យលាភីលេខ២(គ្មាន) ។ លេខ ៣ ស្ទួនបានទៅលើលោក ឈុំ ចាន់ណារី (គោឈ្មោះ អាទាន់ចិត្ត) មកពីភូមិត្រពាំងទ្រព្យ សង្កាត់បឹងធំ ខ័ណ្ឌកំបូល រាជធានីភ្នំពេញ,លោក យី អៀច (គោឈ្មោះ អានី) មកពីភូមិត្រពាំងពោជ ឃុំពាំងល្វា ស្រុកសាមគ្គីមុនីជ័យ ខេត្តកំពង់ស្ពឺ,លោក ស៊ឹម ថេង (គោឈ្មោះ ថាវរិន) មកពីភូមិត្រពាំងបម្រុះ ឃុំព្រៃក្រសាំង ស្រុកសាមគ្គីមុនីជ័យ ខេត្តកំពង់ស្ពឺ ៕

អត្ថបទ៖ម៉ាដេប៉ូ
រូបភាព៖លោក គ្រីសម្បត្តិ និងពុធ សុខជា