បន្ទាយមានជ័យ៖ខណៈដែលថ្ងៃចូលឆ្នាំថ្មីប្រពៃណី ជាតិ កាន់តែ ខិតជិតមកដល់ របាំប្រពៃណីនិងល្បែង ប្រជាប្រិយខ្មែរ មួយចំនួន ត្រូវបានយកមកសម្ដែង និងលេងកម្សាន្តនៅតាមមន្ទីរ អង្គភាពខ្លះ ឱ្យក្នុងខេត្តបន្ទាយមានជ័យ ។

ក្នុងពិធីសំណេះសំណាលជាមួយចាស់ជរា និងទស្សនាការ សម្ដែងនិង លេងល្បែងប្រជាប្រិយកាលពីថ្ងៃអង្គារ ឯកឧត្ដម កែ គឹមយ៉ានតំណាង រាស្រ្តមណ្ឌលខេត្តបន្ទាយមានជ័យ និងជាឧត្តម ក្រុមប្រឹក្សាផ្ទាល់ព្រះមហាក្សត្របានលើកឡើងពីរបាំត្រុដិ ក៏ដូចជា របាំប្រពៃណីផ្សេងទៀតនិងល្បែងប្រជាប្រិយខ្មែរជាច្រើន គឺជា អត្តសញ្ញាណជាតិ,ព្រលឹងវប្បធម៌ជាតិ,ជាមរតករូបីមានតម្លៃមហាសាលមិនអាចកាត់ថ្លៃបាន ដែលដូនតាខ្មែរបានបន្សល់ទុកឱ្យ។ឯកឧត្តម បន្តថាយើងទាំងអស់គ្នាចាំបាច់មានកាតព្វកិច្ច បន្តវេនចូលរួម លើក ស្ទួយ ថែរក្សាការពារសម្បត្តិបេតិកភណ្ឌជាតិឱ្យ ស្ថិតស្ថេរគង់វង់។

ងាកត្រឡប់ទៅរកជនចាស់ជរាឯណោះវិញ ឯកឧត្តម កែគឹមយ៉ាន បានរំលឹកថា ក្នុងនាមជាអ្នកបន្តវេនយើងក៏ត្រូវរួមគ្នាគិតគូរ ដល់ ជនវ័យចាស់ តាមរយៈនៃការជួយឧបត្ថម្ភ ជាគ្រឿងបរិភោគ សម្ភារៈ ប្រើប្រាស់ ថវិកាមួយចំនួនរួមទាំងជួយជួសជុល ផ្ទះសម្បែង របស់ ពួកគាត់។ពិសេសជនវ័យចាស់គ្មានទីពឹង។ពីព្រោះមនុស្សចាស់ ជាអ្នកបានផ្ដល់បទពិសោធន៍មានគុណតម្លៃលើជីវិតរស់នៅ និង ការងារ សម្រាប់យើងទាំងអស់គ្នា។

លោក យ៉ង់ តាំកួយ ប្រធានមន្ទីរវប្បធម៌និងវិចិត្រសិល្បៈ ខេត្ត បន្ទាយមានជ័យបានបញ្ជាក់ថា មុនពេលចូលឆ្នាំថ្មីរបាំត្រុដិ ជា របាំប្រពៃណីដ៏មានប្រជាប្រិយក្នុងឱកាសបុណ្យចូលឆ្នាំថ្មី ដោយ សារតែគេមានជំនឿថារបាំនេះបណ្ដេញនូវឧបទ្រព ចង្រៃនិងនាំ មកនូវសិរីសួស្តីជ័យជម្នះ។ចំណែកល្បែងប្រជាប្រិយខ្មែរក្នុង ឱកាស បុណ្យចូលឆ្នាំថ្មីនេះដែរ មានដូចជា ចោលឈូង ទាញព្រ័ត្រ ចាប់កូនខ្លែង លាក់កន្សែង បោះអង្គុញ វាយឆ្នាំងដី លោតបាវ ជាដើម។
សូមជម្រាបថា បុណ្យចូលឆ្នាំប្រពៃណីជាតិខ្មែរ ឆ្នាំរោង នឹងចូល មកដល់នៅរាត្រីថ្ងៃសៅរ៍ទី១៣ ខែមេសា ឆ្នាំ២០២៤។បុណ្យ
ចូលឆ្នាំថ្មីឆ្នាំនេះមានរយៈពេលបួនថ្ងៃ ចាប់ពីថ្ងៃទី១៣ ខែមេសា ដល់ថ្ងៃទី១៦ ខែមេសា៕

អត្ថបទនិងរូបភាព៖ គៀន ច័ន្ទហ៊ីន