ក្រុមហ៊ុន Chery របស់ចិន បើករោងចក្រផលិតរថយន្តដំបូងនៅអេស្ប៉ាញ
ប៉េកាំង៖ រដ្ឋាភិបាលអេស្ប៉ាញ ថ្មីៗនេះ បានបញ្ជាក់ថា ក្រុមហ៊ុន Chery Auto របស់ប្រទេសចិន បានចុះហត្ថលេខាលើកិច្ចព្រមព្រៀងបណ្តាក់ទុនរួមគ្នាជាមួយក្រុមហ៊ុន Ebro-EV Motors របស់ប្រទេសអេស្ប៉ាញ ដើម្បីផលិតរថយន្តនៅក្នុងរោងចក្រដំបូងរបស់ខ្លួននៅអឺរ៉ុប។
ក្រសួងឧស្សាហកម្មអេស្ប៉ាញ បានបញ្ជាក់នៅក្នុងសេចក្តីថ្លែងការណ៍មួយថា ក្រុមហ៊ុនទាំងពីរ គឺ Chery និង EV Motors បានឈានដល់កិច្ចព្រមព្រៀងមួយ ដើម្បីផលិតរថយន្តអគ្គិសនីនៅក្នុងអតីតរោងចក្ររបស់ Nissan នៅតំបន់ឧស្សាហកម្ម Zona Franca របស់ទីក្រុងបាសេឡូណា។
ក្រសួងបន្តថា រថយន្តដំបូងនឹងត្រូវផលិតនៅចុងឆ្នាំ ២០២៤នេះ នៅឯអតីតរោងចក្ររបស់ Nissan ដែលបានបិទទ្វារកាលពីឆ្នាំ ២០២១ ដោយវានឹងជួយបង្កើតការងារដល់បុគ្គលិក ដែលបានបាត់បង់ការងារពីមុនចំនួន ១,៦០០នាក់។
![](https://asset.ams.com.kh/central/media/2024/04/photo_2024-04-18_15-07-49-1024x768.jpg)
ក្រុមហ៊ុន EV Motors របស់អេស្ប៉ាញ បានបញ្ជាក់ថា តាមរយៈការបណ្តាក់ទុករួមគ្នានេះដែរ ក្រុមហ៊ុន Chery នឹងចាប់ផ្តើមផលិតរថយន្តអគ្គិសនីម៉ូដែល Omoda របស់ខ្លួននៅរោងចក្រនេះមុនគេ ខណៈដែលក្រុមហ៊ុន EV Motors នឹងចាប់ផ្តើមផលិតរថយន្តរបស់ខ្លួននៅក្នុងត្រីមាសទី៤ ឆ្នាំ២០២៤។
គួរបញ្ជាក់ថា អេស្ប៉ាញដែលជាប្រទេសផលិតរថយន្តធំជាងគេទីពីររបស់អឺរ៉ុប បន្ទាប់ពីប្រទេសអាល្លឺម៉ង់ បានចាប់ផ្តើមផែនការដ៏មានមហិច្ឆតាមួយកាលពីឆ្នាំ ២០២០ នោះគឺការទាក់ទាញក្រុមហ៊ុនផលិតរថយន្តអគ្គិសនី និងអាគុយមកបណ្តាក់ទុនរកស៊ីនៅក្នុងប្រទេសខ្លួន។ តួយ៉ាង ក្រុមហ៊ុន Volkswagen និង Renault ក៏ស្ថិតក្នុងចំណោមក្រុមហ៊ុនដែលបានប្រកាសការវិនិយោគចាប់តាំងពីពេលនោះមក៕
![](https://asset.ams.com.kh/central/media/2024/04/photo_2024-04-18_15-07-50-1024x663.jpg)
ប្រភព៖ AFP ប្រែសម្រួលដោយ៖ ឈឹម ទីណា