ហ្វីលីពីន និងសហរដ្ឋអាមេរិកត្រៀមធ្វើសមយុទ្ធយោធារួមគ្នាលើកដំបូង
ម៉ានីល៖ ឆ្មាំសមុទ្រហ្វីលីពីន នៅថ្ងៃព្រហស្បតិ៍នេះ ប្រកាសថា នឹងចូលរួមធ្វើសមយុទ្ធយោធារួមគ្នាប្រចាំឆ្នាំជាមួយសហរដ្ឋអាមេរិក ដែលនេះជាសមយុទ្ធលើកដំបូងធ្វើឡើងដោយទីក្រុងម៉ានីល និងទីក្រុងវ៉ាស៊ីនតោន។
កងទ័ពហ្វីលីពីន និងអាមេរិកជាង ១៦,៧០០នាក់គ្រោងចូលរួមធ្វើសមយុទ្ធយោធាឆ្នាំ២០២៤ ដែលនឹងចាប់ផ្ដើមនៅថ្ងៃចន្ទសប្ដាហ៍នេះក្រោយ ហើយសមយុទ្ធនេះដែរ នឹងផ្ដោតសំខាន់លើតំបន់ភាគខាងជើង និងខាងលិចនៃប្រទេសហ្វីលីពីន ស្ថិតនៅក្បែរតំបន់សមុទ្រចិនខាងត្បូង និងតៃវ៉ាន់។
អ្នកនាំពាក្យឆ្មាំសមុទ្រហ្វីលីពីននិយាយ នាវារបស់ខ្លួនចំនួន ៦គ្រឿងនឹងចូលរួមធ្វើសមយុទ្ធយោធាជាមួយសហរដ្ឋអាមេរិក ដែលមានឈ្មោះ Balikatan ឬមានន័យថា «ប្រកៀកស្មាគ្នា» ហើយកងកម្លាំងប្រតិបត្តិការពិសេសរបស់ឆ្មាំសមុទ្រហ្វីលីពីន ក៏នឹងចូលរួមធ្វើសមយុទ្ធជាមួយឆ្មាំសមុទ្រមកពីអូស្ត្រាលី បារាំង និងសហរដ្ឋអាមេរិកផងដែរ។
![](https://asset.ams.com.kh/central/media/2024/04/photo_2024-04-18_15-12-42-2-1024x682.jpg)
គួរបញ្ជាក់ថា ប្រទេសចិនបានទាមទារសិទ្ធិគ្រប់គ្រងស្ទើរតែទាំងស្រុង លើដែនទឹកកំពុងមានវិវាទនៅសមុទ្រចិនខាងត្បូង និងចាត់ទុកតៃវ៉ាន់ជាខេត្តមួយរបស់ខ្លួន។ តែប្រទេសដទៃទៀត ក្នុងនោះរួមមានទាំងហ្វីលីពីនក៏កំពុងទាមទារចំណែកគ្រប់គ្រងក្នុងតំបន់សមុទ្រខាងត្បូងផងដែរ។
ចំណែកសហរដ្ឋអាមេរិកវិញមិនមែនជាភាគីជម្លោះនោះតែ ប៉ុន្តែតែដឹកនាំប្រតិបត្តិការល្បាតជាញឹកញាប់នៅក្បែរតំបន់ជម្លោះ។ ហេតុដូច្នេះហើយ ជាផ្នែកមួយនៃការទប់ទល់នឹងឥទ្ធិពលចិន សហរដ្ឋអាមេរិកបានពង្រឹងទំនាក់ទំនងយោធាកាន់តែស៊ីជម្រៅជាមួយបណ្ដាប្រទេស ដែលកំពុងមានជម្លោះទឹកដីជាមួយចិន ក្នុងនោះរួមមានទាំងហ្វីលីពីន៕
![](https://asset.ams.com.kh/central/media/2024/04/photo_2024-04-18_15-12-43-1024x682.jpg)
ប្រភព៖ AFP ប្រែសម្រួលដោយ៖ ឈឹម ទីណា