ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធាន ព្រឹទ្ធសភា និងជាប្រធានកិត្តិយសសមាគមឧកញ៉ាកម្ពុជា កាល ពី រសៀលថ្ងៃទី២៦ ខែមេសា ឆ្នាំ២០២៤ បានអញ្ជើញចូលរួមជា អធិបតីក្នុងពិធី “ពិសាអាហារសាមគ្គីមហាគ្រួសារ ឧកញ៉ា កម្ពុជា” ដើម្បីអបអរសាទរសន្និបាតលើកទី១ ឆ្នាំ២០២៣ និងទិសដៅផែនការឆ្នាំ២០២៤ របស់សមាគមឧកញ៉ាកម្ពុជា ដែលមានអ្នក ចូល រួមជាង៦០០រូប ។

អ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា បាន ឱ្យដឹងថា សមាគមឧកញ៉ាកម្ពុជា ត្រូវបានបង្កើតឡើងស្រប តាម អនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន អតីតនាយករដ្ឋមន្ត្រី កាលពីឆ្នាំ២០២២ និងបានចុះបញ្ជី ត្រឹមត្រូវនៅ ក្រសួងមហាផ្ទៃ និងត្រូវបានទទួលស្គាល់ជាផ្លូវការ ដោយព្រះរាជក្រឹត្យលេខ នស/រកត/១០២៣/២២៥០ ចុះ ថ្ងៃទី១១ ខែតុលា ឆ្នាំ២០២៣។ សមាគមឧកញ៉ាកម្ពុជា គឺស្ថាប័ន តែមួយគត់ តំណាងឱ្យគោរមវន្តទាំងអស់នៅកម្ពុជា និងជាដៃគូរាជរដ្ឋាភិបាលកម្ពុជា ក្នុងសកម្មភាពជំរុញសេដ្ឋកិច្ច ពាណិជ្ជកម្ម និងវិនិយោគ ជាពិសេស សកម្មភាពសង្គម និងមនុស្សធម៌ ក្នុងមហាគ្រួសារឧកញ៉ាកម្ពុជា ។

សមាគមឧកញ៉ាកម្ពុជា បានបន្តរីកលូតលាស់ជាលំដាប់ ដោយ ផ្តើមពីសមាជិកត្រឹម ៣២រូប នៅចុងឆ្នាំ២០២២ មកដល់ ៣៦៥ រូប ត្រឹមថ្ងៃទី២០ ខែមេសា ឆ្នាំ២០២៤ និងជា ពិសេស បានសម្រេចនូវសមិទ្ធផលជាច្រើនជូនសង្គមជាតិ តាមរយៈ ការសហការជាមួយ រាជរដ្ឋាភិបាល ក្នុងការលើកកម្ពស់ កិត្យា នុភាពសង្គម-សេដ្ឋកិច្ចកម្ពុជា និងការចូលរួមក្នុងការងារ សង្គមនានា ។

ថ្នាក់ដឹកនាំ ក្រុមប្រឹក្សាភិបាល និងសមាជិកទាំងអស់ នៃ សមាគមឧកញ៉ាកម្ពុជា សូមវាយតម្លៃខ្ពស់ និងអបអរសាទរ ចំពោះលទ្ធផល ដ៏ធំធេង ដែលសមាគមសម្រេចបាន ក្នុងរយៈពេល១ឆ្នាំមកនេះ ជាមួយនឹងការកំណត់ចក្ខុវិស័យ វែងឆ្ងាយ ការកំណត់ទិសដៅ និងផែនការអាទិភាព ឆ្នាំ២០២៤ យ៉ាងច្បាស់លាស់ ក្នុងនោះគឺការបន្ត ភាពជាដៃគូជាមួយ រាជរដ្ឋាភិបាល, ការបន្តសកម្មភាព សប្បុរសធម៌, ការបន្ត បោះពុម្ព សៀវភៅឧកញ៉ា, ការបន្តគ្រប់គ្រង និងចាត់ចែង ឯកសណ្ឋានឧកញ៉ា, ការបន្តចូលរួមអមដំណើរ សម្តេចធិបតី នាយករដ្ឋមន្ត្រី ក្នុងបេសកកម្មនានា, ការធ្វើបច្ចុប្បន្នកម្ម គោរមវន្ត ជាពិសេសការបង្កើតមូលនិធិសមាគមឧកញ៉ា ដើម្បីមន្ទីរពេទ្យគន្ធបុប្ផា ដែលជាអនុសាសន៍ណែនាំដ៏ ខ្ពង់ខ្ពស់របស់សម្តេចតេជោ ហ៊ុន សែន ដែលជាមូលនិធិ មួយដ៏សំខាន់ ក្នុង ការធានាពីស្ថេរភាព របស់មន្ទីរពេទ្យជាដើម។

តាមរយៈរបាយការណ៍បានបង្ហាញថា សមាគមឧកញ៉ាកម្ពុជា បាននិងកំពុងបំពេញការងារ យ៉ាងមានប្រសិទ្ធភាព និងបាន បោះ ជំហាន ទៅមុខយ៉ាងស្វាហាប់ក្នុងសកម្មភាពសង្គម-សេដ្ឋកិច្ច និងបានចូលរួមក្នុងភាពជាដៃគូរបស់រាជរដ្ឋា ភិបាល យ៉ាងសកម្ម ដើម្បីការរីកចម្រើន ផ្នែកសេដ្ឋកិច្ច និងកម្រិត ជីវភាពរស់នៅរបស់ពលរដ្ឋកម្ពុជា ទាំងពេលបច្ចុប្បន្ន និងពេល អនាគត ។

ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រី ទទួលបន្ទុកទីស្តីការគណៈរដ្ឋមន្ត្រី តំណាងរាជរដ្ឋាភិបាល បានថ្លែងក្នុង កម្មវិធីបិទសន្និបាត លើកទី១ ឆ្នាំ២០២៣ និងទិសដៅផែនការ ឆ្នាំ២០២៤ ថា វិស័យឯកជន ក៏ដូចជា អ្នកឧកញ៉ា ឧកញ៉ា លោក លោកស្រីទាំងអស់ គឺជាខែល សំខាន់មួយក្នុងការការពារសេដ្ឋកិច្ចកម្ពុជាពីវិបត្តិខាងក្រៅផង ហើយក៏ជាកាតាលីករសម្រាប់បន្ត អភិវឌ្ឍ សេដ្ឋកិច្ចផង។ រាជរដ្ឋាភិបាល សូមបញ្ជាក់នូវការត្រៀមខ្លួនរួចរាល់ក្នុងការ សហការជាមួយវិស័យឯកជន ដើម្បីគាំទ្រដល់សកម្មភាព សេដ្ឋកិច្ចនានាក្នុងព្រះរាជាណាចក្រកម្ពុជា។ រាជរដ្ឋាភិបាល និងកិច្ចសហការរបស់វិស័យឯកជន នឹងអាចប្រែក្លាយកាលៈ ទេសៈ លំបាកនេះ ទៅជាឱកាសសម្រាប់ការបន្តលូតលាស់ រីកចម្រើនជូនប្រជាជន សេដ្ឋកិច្ច និងជាតិទាំងមូល ហើយ សមាគមឧកញ៉ា កម្ពុជា ក៏មានសក្តានុពលខ្ពស់ក្នុងការ ចូល រួមក្នុងកិច្ចខិតខំប្រឹងប្រែងនេះផងដែរ ៕
ដោយ៖វណ្ណលុក