នាព្រឹកថ្ងៃអង្គារ ទី១៤ ខែឧសភា ឆ្នាំ២០២៤ ក្រុមហ៊ុន ហនុមាន ប៊ែវើរីជីស ដឹកនាំដោយ លោកជំទាវ ខៀវ សស៊ីលៀប បានធ្វើទស្សនកិច្ចទៅកាន់មជ្ឈមណ្ឌលព្យាបាលកុមារ បេះដូងជប៉ុន និងបាននាំយកថវិកា 60,105 ដុល្លារអាមេរិក ដែលបាន មកពីក្រុមគ្រួសារក្រុមហ៊ុនហនុមានផ្ទាល់ និងក្រុមវប្បធម៌រថយន្តកម្ពុជា-Cambodia Car Culture ដឹកនាំដោយ ឯកឧត្តម ទៀ ស្យាម ព្រមទាំងការកៀរគរថវិកាពីសប្បុរសជន ដែលពួកគាត់បាន ចូលរួមចំណែក ចេញពីបេះដូងក្នុងការចែករំលែក ក្តីស្រលាញ់ មេត្តាធម៌ តាមរយៈការចូលរួមបរិច្ចាគ ថវិកាផ្ទាល់ខ្លួន ក្នុងយុទ្ធនាការសប្បុរសធម៌ ដំណើរពីបេះដូង-Journey from the Heart ដែលបានរៀបចំព្រឹត្តិការណ៍ ប្រគំតន្រ្តីសប្បុរសធម៌ កាលពីថ្ងៃទី​ ២៣ខែ មីនា ឆ្នាំ២០២៤ នៅកោះពេជ្រ រាជធានីភ្នំពេញកន្លងទៅនេះ។ ការស្វែងរកថវិកានេះគឺ ដើម្បីគាំទ្រដល់ប្រតិបត្តិការ របស់មជ្ឈមណ្ឌលក្នុងការផ្តល់ការថែទាំ និងការព្យាបាលកុមារ ដែលមានជំងឺមហារីក ដោយឥតគិតថ្លៃ ប្រកបដោយគុណភាពដល់កុមារកម្ពុជា។​

កម្មវិធីបរិច្ចាគនេះធ្វើឡើងនៅមជ្ឈមណ្ឌលព្យាបាលកុមារ បេះដូងជប៉ុន ក្រោមអធិបតីភាពរបស់ លោកជំទាវ ខៀវ សស៊ីលៀប ស្ថាបនិកា និងជាប្រធានក្រុមប្រឹក្សាភិបាល នៃក្រុមហ៊ុន ហនុមាន ប៊ែវើរីជីស និង ឯកឧត្តម ទៀ ស្យាម ស្ថាបនិក នៃក្រុមវប្បធម៌រថយន្តកម្ពុជា (Cambodia Car Culture) និងភ្ញៀវកិត្តិយសជាច្រើនរូបទៀត។

ក្នុងឱកាសដ៏វិសេសវិសាលនេះ លោកជំទាវ ខៀវ​ សស៊ីលៀប បានមានប្រសាសន៍ថា៖ “ យុទ្ធនាការ ដំណើរពីបេះដូង Journey from Heart គឺត្រូវបានផ្តួចផ្តើមឡើង ក្នុងការចូលរួមសកម្មភាពទំនួលខុសត្រូវក្នុងសង្គមរបស់ក្រុមហ៊ុន ជាពិសេស​ការជួយសម្រាលនូវទុក្ខលំបាកនានា ដែលមានជាក់ស្តែង និងជាតម្រូវការចាំបាច់ក្នុងការជួយឧបត្ថម្ភដល់អ្នកដែលពិតជា ត្រូវការជំនួយពីក្រុមហ៊ុនហនុមាន។ បេសកកម្មដំណើរពីបេះដូង Journey from the heart គឺជាយុទ្ធនាការដែលក្រុមហ៊ុន នឹងនៅតែបន្តដើម្បីបុព្វហេតុក្នុងការចូលរួមជួយដល់សង្គម ដែលផ្តោតសំខាន់លើកុមារ បរិស្ថាន សិល្បៈ វប្បធម៌ និងបុព្វហេតុ ជួយដល់សកម្មភាពផ្សេងៗក្នុងការជំរុញវិសាលភាពជួយសង្គមឲ្យកាន់តែប្រសើរប្រកបដោយលក្ខណៈវិជ្ជមាន។”

សំរាប់ចក្ខុវិស័យ និងបេសកកម្មវែងឆ្ងាយរបស់ក្រុមហ៊ុនហនុមាន​ ប៊ែវវើរីជីស គឺក្រុមហ៊ុននៅតែបន្ត សកម្មភាពនៃដំណើរ ចេញបេះដូង-Journey from the heart ក្នុងការចូលរួមចែករំលែកក្តីស្រលាញ់ និងជួយដល់សង្គម គាំទ្រដល់ ការអភិវឌ្ឍប្រទេសជាតិ តាមរយៈសកម្មភាព និងមធ្យោបាយដែលអាចធ្វើទៅបាន។

លោកជំទាវបានថ្លែងអំណរគុណដល់មជ្ឈមណ្ឌលព្យាបាលកុមារ បេះដូងជប៉ុន គ្រូពេទ្យស្ម័គ្រចិត្តជប៉ុន និងគ្រូពេទ្យខ្មែរ ទាំងអស់ដែលបានលះបង់ និងបានជួយសង្រ្គោះជីវិតកុមារកម្ពុជាយើង ដោយពុំគិតប្រាក់កំរៃ ដែលសកម្មភាពទាំងអស់នេះ គឺពិតជាឆ្លុះបញ្ចាំងពីគុណធម៌ មនុស្សធម៌ និង មេត្តាធម៌ ចេញពីបេះដូងរបស់លោក លោកស្រីយ៉ាងពិតប្រាកដ។ ​​លោកជំទាវស្ថាបនិកាមានប្រសាសន៍ថា “ខ្ញុំសូមអរគុណដល់លោកគ្រូ អ្នកគ្រូពេទ្យ នឹងអ្នកស្ម័គ្រចិត្តទាំងអស់​ដែលបាន លះបង់កម្លាំងកាយចិត្ត យកចិត្តទុកដាក់ ផ្តល់ក្តីស្រលាញ់ ដល់ក្មួយៗដែលបាននឹងកំពុងទទួលការព្យាបាលនិងកុមារ ដែលស្វែងរកសេវាព្យាបាល ទទួលបាននូវក្តីសង្ឃឹមឡើងវិញ និងស្នាមញញឹមសាជាថ្មី។”

លោកជំទាវក៏បានថ្លែងអំណរគុណដល់ឯកឧត្តម ទៀ ស្យាម ស្ថាបនិក វប្បធម៌រថយន្តកម្ពុជា-Cambodia Car Culture និងសប្បុរសជនទាំងអស់ ដែលបានលះបង់កម្លាំងកាយចិត្ត ចូលរួមយ៉ាងសកម្មក្នុងការស្វែងរក ថវិកាដើម្បីជួយ សង្រ្គោះដល់កុមារនៅមជ្ឈមណ្ឌលព្យាបាលកុមារបេះដូងជប៉ុន ដែលបាននិងកំពុងត្រូវការជំនួយពីសប្បុរសជនក្នុងការ បន្តដំណើរដ៏វែងឆ្ងាយរបស់ពួកគេ។​ 

នាពេលថ្មីៗនេះ ក្រុមហ៊ុន ហនុមាន​ ប៊ែវើរីជីស បានផ្តើមយុទ្ធនាការដំណើរបេះដូង Journey from the Heart ដែលមានគោលបំណងលើកស្ទួយសកម្មភាពទំនួលខុសត្រូវក្នុងសង្គម និងជាគំរូល្អមួយក្នុងសង្គម។ សកម្មភាពមនុស្សធម៌ទាំងនេះ គឺពិតជាមានគុណតម្លៃខ្លាំងណាស់ ក្នុងការចែករំលែកក្តីស្រលាញ់ ផ្តល់ក្តីសង្ឃឹម ស្នាមញញឹមសាជាថ្មីដល់កុមារ និងចូលរួមជំរុញ ផ្សព្វផ្សាយវិសាលភាព នៃសិល្បៈ វប្បធម៌ ​ តំបន់ទេសចរណ៍​ ការការពារបរិស្ថាន ដើម្បីរួមចំណែកជាមួយរាជរដ្ឋាភិបាលក្នុងការអភិវឌ្ឈន៍ប្រទេសជាតិប្រកបដោយចីរភាព។

សម្រាប់ព័ត៌មានបន្ថែមសូមតាមដានទំព័រហ្វេសប៊ុកផ្លូវការរបស់ក្រុមហ៊ុន ហនុមាន ប៊ែវើរីជីស តាមរយៈ www.facebook.com/hanumanbeverageskh  ឬចូលទៅកាន់គេហទំព័រ www.hanumanbeverages.com.kh។