ភ្នំពេញ៖ កញ្ញាបណ្ឌិត ស៊ូ វណ្ណា ហ្គោនឡែត នាយិកាប្រតិបត្តិ​អង្គការសម្ព័ន្ធមិត្តសត្វព្រៃ ហៅកាត់ WA (Wildlife Alliance) បានបញ្ជាក់ថា សត្វខ្លាធំមក​ពីប្រទេសឥណ្ឌា ដែលគ្រោងនាំ​មកកាន់កម្ពុជាក្នុងជំហានទី១ នេះ មានឈ្មោលចំនួនមួយ ក្បាល និងញីចំនួនបីក្បាល ។បើ​កម្ពុជាទទួលជោគជ័យ ក្នុង​ការថែទាំ និងអភិរក្សខ្លាធំ​ចំនួន​បួនក្បាល ដែល​នឹងមកដល់​នៅពេលឆាប់ៗខាងមុខ គឺរដ្ឋា​ភិបាលប្រទេសមួយនេះ នឹងបង្កើនការផ្ដល់ជូនដល់​១១​ក្បាល​បន្ថែមទៀត​។ សត្វខ្លាធំ​ទាំងបួន​ក្បាល នឹងលែងក្នុងតំបន់ស្នូល​នៃ​ជួរភ្នំក្រវាញ ដែលត្រូវបានការពារ និងចាត់ទុកថា មាន​សុវត្ថិភាពបំផុត ក្នុងការស្តារសត្វខ្លាធំនៅ​កម្ពុជាឡើងវិញ។

សត្វខ្លាធំដែលគ្រោងលែង ក្នុងតំបន់ស្នូលនៃជួរភ្នំក្រវាញ នឹងផ្តល់ការគាំទ្រការត្បាតរបស់ឧទ្យានុរក្ស ការផ្តល់ជំនួយ​បច្ចេកទេ ស​​ដូចជាការបំពាក់វិទ្យុទាក់ទង លើសត្វខ្លា ការ​តាមដានដំណើរសត្វខ្លា ពីផ្កាយរណប ហើយទិន្នន័យ​ដែល​ប្រមូលបាន ត្រូវ​គ្រប់គ្រងដោយក្រសួងបរិស្ថាន ខណៈ​អង្គការ​សម្ព័ន្ធមិត្តសត្វព្រៃ និងក្រសួងបរិស្ថាន បានរៀបចំដំឡើង​កាំមេរ៉ា​ស្វ័យប្រវត្តិ ចំនួន​៤១០គ្រឿង នៅឧទ្យានជាតិជួរ​ភ្នំក្រវាញ ដើម្បីសិក្សាឱ្យបានច្បាស់លាស់ នូវរបាយចំនួនសត្វ​ព្រៃ ដែលជាចំណីសត្វខ្លាឱ្យបាន​ជាក់លាក់។

សូមជម្រាបថា គម្រោងស្តារសត្វខ្លាធំ ឬ ខ្លាដំបងនេះ ជា​គម្រោង​រួមគ្នារវាងរាជរដ្ឋាភិបាលកម្ពុជា និងរដ្ឋាភិបាលឥណ្ឌា ដោយផ្អែក​លើការ​ចុះហត្ថលេខាលើអនុស្សរណៈ រវាងប្រទេស​ទាំងពីរកាលពីខែវិច្ឆិកាឆ្នាំ២០២២ ដើម្បីជាការបោះជំហាន​ទៅមុខជា​ប្រវត្តិសាស្ត្រ សម្រាប់ការអភិរក្សសត្វខ្លាធំ នៅ​កម្ពុជា។

នៅក្នុងសន្និសីទព័ត៌មានស្តីពីការគ្រប់គ្រងសត្វព្រៃ និង​យុទ្ធសាស្ត្រស្ដារសត្វខ្លាធំនៅកម្ពុជា នៅរសៀលថ្ងៃទី២៣ ខែឧសភា ឆ្នាំ២០២៤​លោកជំទាវបណ្ឌិត Devyani Khobragade ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា​បានឱ្យដឹងថា​ការ​ប្រគល់​សត្វខ្លាធំនេះអាចនឹងធ្វើឡើង​អំឡុង​ពេលខែវិច្ឆិកា ឬខែធ្នូខាងមុខ។ប៉ុន្តែការប្រគល់សត្វខ្លាមក​កម្ពុជាអាចពន្យា​ពេលយូរជាងនេះ​បន្ថែមទៀតក៏អាចថាបាន អាស្រ័យទៅលើអាកាសធាតុ និងកត្តារួមផ្សំមួយចំនួនទៀត។

បើតាមឯកអគ្គរដ្ឋទូតសាធារណរដ្ឋឥណ្ឌាបានបញ្ជាក់ថា ការ​ប្រគល់សត្វខ្លាធំនេះ ជំហានទី១ ដែលប្រទេស​អ្នកស្រីប្រគល់​ឱ្យ​កម្ពុជា ហើយបើគម្រោងនេះទទួលជោគជ័យប្រទេស​ឥណ្ឌា​នឹងបង្កើនការផ្ដល់ជូនដល់១១ក្បាលបន្ថែមទៀត។

ឯកឧត្តម ជា សំអាង រដ្ឋលេខាធិការក្រសួងបរិស្ថាន បាន​បញ្ជាក់​ថា ការនាំសត្វខ្លាធំមកកម្ពុជានឹងនាំមកនូវ​សារៈ​ប្រយោជន៍​ជាច្រើនដល់កម្ពុជា។ក្នុងនេះក្រៅពីស្តារសត្វព្រៃ​ដែលបាត់បង់ហើយ នៅអាចជាផ្នែកមួយសំខាន់សម្រាប់​បម្រើលើវិស័យ​ទេសចរណ៍,សម្រាប់បង្កើនជីវភាព​សហគមន៍​មូលដ្ឋានថែមទៀត។

គម្រោងស្តារសត្វខ្លាធំឡើងវិញនេះ បានកើតឡើង​បន្ទាប់ពី​បាត់​វត្តមានពីទឹកដីកម្ពុជា កាលពីអំឡុងឆ្នាំ២០០៧ ដោយ​ការបរបាញ់ ដើម្បីពាណិជ្ជកម្មឆ្អឹង និងស្បែក។ វត្តមានរបស់វា ធ្លាប់បាន​រកឃើញនៅតាមតំបន់មួយចំនួនដូចជាភូមិ​ភាគ​ឦសាន ភាគនិរតី និងភាគខាងជើងប្រទេសកម្ពុជា។

ក្រសួងបរិស្ថាន និងអង្គការសម្ព័ន្ធមិត្តសត្វព្រៃ WA បានរៀប​ចំដីព្រៃទំហំ៩០ហិកតា ស្ថិតក្នុងដែនជម្រកសត្វព្រៃតាតៃ​នៃតំបន់​ជួរភ្នំក្រវាញ ដោយមានរបងដែក ទ្រុងដែក អាងទឹក និងសត្វព្រៃសម្រាប់ជាចំណីសម្រាប់បន្ស៊ាំសត្វខ្លាធំ ដែល​គ្រោងទទួលពី​រដ្ឋាភិបាលប្រទេសឥណ្ឌា មុនលែងចូល​តំបន់​ស្នូលនៃតំបន់ការពារធម្មជាតិ៕
អត្ថបទ៖ង៉ានទិត្យ
រូបភាព៖រិន រចនា