ស្វាយរៀង៖ប៉ុស្ដិ៍នគរបាលរដ្ឋបាលឃុំចំនួនប្រាំស្ថិតនៅស្រុក​ស្វាយជ្រំ ស្រុកកំពង់រោទិ៍ និងស្រុករំដួល​ ត្រូវបាន​​សម្ពោធ​ឱ្យប្រើប្រាស់​ដំណាលគ្នាក្នុងពេលតែមួយ ខណៈពិធីជានិមិត្តរូប​ប្រារព្ធនៅទីស្នាក់ការប៉ុស្តិ៍នគរបាលរដ្ឋបាលឃុំធ្លក ស្រុកស្វាយ​ជ្រំ កាលពីព្រឹក​ថ្ងៃទី២៣ ខែឧសភា ឆ្នាំ២០២៤ក្រោមវត្តមាន​ឧត្តមសេនីយ៍ឯក ឌី វិជ្ជា អគ្គស្នងការរងនគរបាលជាតិជា​តំណាង នាយឧត្តម​សេនីយ៍ ស ថេត អគ្គស្នងការនគរបាល​ជាតិ ឯកឧត្តម ប៉េង ពោធិ៍សា អភិបាលខេត្តស្វាយរៀង។

អគារប៉ុស្តិ៍នគរបាលរដ្ឋបាលទាំងប្រាំនេះជាអំណោយរបស់ឧត្តម​សេនីយ៍ឯក ឌី វិជ្ជា និងលោកជំទាវ ហ៊ុន ម៉ាណា ដែល​មាន​តម្លៃ ៧៥.០០០ដុល្លារអាមេរិក។ អគារទាំងប្រាំមាន៖ ប៉ុស្តិ៍រដ្ឋបាលធ្លក, ប៉ុស្តិ៍រដ្ឋបាលឈើទាល, ប៉ុស្តិ៍រដ្ឋបាលគ្រួស​នៅ​ស្រុកស្វាយជ្រំ , ប៉ុស្តិ៍​រដ្ឋបាល​​ព្រះពន្លា នៅស្រុកកំពង់រោទិ៍ និង​ប៉ុស្តិ៍រដ្ឋបាលថ្នាធ្នង់ ស្រុករំដួល។ជាមួយនឹងការសម្ពោធអគារថ្មីសន្លាង ក្នុងនាមនាយ​ឧត្តម​សេនីយ៍អគ្គស្នងការនគរបាលជាតិ, ឯកឧត្តម ឌី វិជ្ជា បាននាំ​យកអំណោយ​ជាសម្ភារៈកុំព្យូរទ័រលើតុមួយគ្រឿង និងម៉ាស៊ីន​ព្រីនធ័រ​​មួយគ្រឿងផ្តល់ជូនប៉ុស្តិ៍រដ្ឋបាល​នីមួយៗ​។

ឯកឧត្តមប៉េង ពោធិ៍សា អភិបាលខេត្តស្វាយរៀង បញ្ជាក់ថា អំណោយដ៏ថ្លៃថ្លានេះចំណែកយ៉ាង​ធំធេងក្នុងការលើកកម្ពស់​ប្រសិទ្ធ​ភាព និង គុណភាពនៃការផ្ដល់សេវាសាធារណៈ និង​សេវាសន្តិសុខ ដែលជាមុំដ៏សំខាន់មួយមានកំណត់ នៅក្នុង​កម្មវិធី​នយោបាយ និងយុទ្ធសាស្ត្របញ្ចកោណដំណាក់​កាល​ទី១ ក្រោមការដឹកនាំប្រកបដោយបញ្ញាញាណភ្លឺថ្លា និងត្រឹម​ត្រូវប្រកបដោយគតិ​បណ្ឌិត​របស់សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា។ឯកឧត្តមបន្តថា ប៉ុស្តិ៍នគរបាលរដ្ឋបាល មានតួអង្គសំខាន់មួយ ក្នុងចំណោម​តួអង្គសំខាន់ទាំងប្រាំនៅ​មូលដ្ឋានដែលមានទំនាក់ទំនងផ្ទាល់និងជិតស្និទ្ធបំផុតទៅនឹងជីវភាពរស់នៅរបស់ប្រជាពលរដ្ឋនិងជាតួអង្គដ៏ចម្បងផងដែរនៅក្នុងការអនុវត្តគោលនយោបាយភូមិ ឃុំ សង្កាត់មាន​សុវត្ថិភាព ។

ចំណែកឧត្តមសេនីយ៍ឯក ឌី វិជ្ជា អគ្គស្នងការរងនគរបាល​ជាតិ បានផ្តាំផ្ញើដល់អាជ្ញាធរពាក់ព័ន្ធ កងកម្លាំងគ្រប់លំដាប់​ថ្នាក់​នៅ​មូលដ្ឋានត្រូវបន្តបង្ក្រាបបញ្ហាបទល្មើសគ្រឿងញៀន ,ល្បែងស៊ីសងជាដើម។ក្នុងនោះត្រូវត្រៀមជាប់ជានិច្ច​នូវការ​អន្តរាគមន៍​ជួយ​សង្គ្រោះប្រជាពលរដ្ឋបានទាន់ពេលវេលា។ពិសេសការបម្រើសេវាសាធារណៈជូនប្រជាពលរដ្ឋ៕
ដោយ៖នុត នាង