កម្ពុជាទាញសញ្ញាអាសន្នចំពោះក្មេងទំនើង
ភ្នំពេញ៖យុវជនប្រាំបីនាក់ត្រូវចាប់ឃាត់ខ្លួនក្នុងខណ្ឌទួលគោក រាជធានីភ្នំពេញ នៅវេលាថ្ងៃត្រង់ ថ្ងៃសុក្រទី២៤ ខែឧសភានេះ ដោយបានរកឃើញជាប់នឹងពួកគេនូវកាំបិត ដាវ និងគ្រឿងញៀន។ មួយថ្ងៃមុននេះក្រុមសមត្ថកិច្ចខណ្ឌមានជ័យ បានចុះល្បាតនិងអប់រំក្រុមយុវជនជាច្រើនដើម្បីទប់ស្កាត់សកម្មភាពក្មេងទំនើង។
វិធានការនេះធ្វើឡើង ក្រោយពីក្រុមក្មេងទំនើងបង្កអំពើហឹង្សា កាចសាហាវ ជាច្រើន ដោយប្រើដាវ និងកាំបិត ដេញកាប់គ្នាក្នុងរាជធានីភ្នំពេញ។
កាលពីថ្ងៃទី២៣ ខែឧសភា កន្លងទៅនេះ អគ្គស្នងការដ្ឋាននគរបាលជាតិបានប្រកាសថា «សកម្មភាពក្មេងទំនើងបានកើតមានឡើងជាញឹកញាប់ និង មានចរិតកាចសាហាវគួរឱ្យព្រួយបារម្ភ ធ្វើឱ្យបាត់បង់សណ្តាប់ធ្នាប់ បង្កឱ្យមានការភ័យខ្លាច និងជះឥទ្ធិពលដល់បរិយាកាសសន្តិសុខ និងសណ្តាប់ធ្នាប់សង្គម ព្រមទាំងរំខានដល់ការរស់នៅរបស់ ប្រជាពលរដ្ឋនៅមូលដ្ឋាន»។
អគ្គស្នងការដ្ឋាននគរបាលជាតិ ក៏បានប្រកាសឱ្យដឹងបន្ថែមថាខ្លួននឹងចាត់គ្រប់វិធានការ ដើម្បី«បង្ការ ទប់ស្កាត់ និងបង្ក្រាបនូវរាល់សកម្មភាពរក្មេងទំនើង ឱ្យបានម៉ឺងម៉ាត់ និងហ្មត់ចត់បំផុត»។
វិធានការរបស់ក្រុមប៉ូលិស ធ្វើឡើងភ្លាមៗក្រោយពីសម្តេចធិបតីនាយករដ្ឋមន្ត្រី ហ៊ុន ម៉ាណែត បានដាក់បញ្ជាយ៉ាងម៉ឺងម៉ាត់ក្រុមអាជ្ញាធរ និងសមត្ថកិច្ច«រឹតបន្តឹងការចាត់វិធានការឱ្យបានម៉ឺងម៉ាត់»ចំពោះក្រុមក្មេងទំនើង។ ក្រុមក្មេងទំនើងដែលសម្តេចសម្គាល់ឃើញថា បានបង្ក ដោយប្រើប្រាស់កាំបិត ដាវ ពូថៅ និងបង្កឲ្យ«ប៉ះពាល់ដល់សណ្តាប់សាធារណៈ សន្តិសុខសង្គម ពិសេស ភាពសុខសាន្តរបស់ប្រជាជន»។
លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា និងជាអ្នកជំនាញវិទ្យាសាស្ត្រនយោបាយ លើកឡើងថា ក្មេងទំនើងនៅកម្ពុជា កើតឡើងដោយសារមានការផ្សព្វផ្សាយពីអំពើហិង្សាសង្គម ដោយសារសីលធម៌សង្គមធ្លាក់ចុះ ដោយការប្រើប្រាស់គ្រឿងស្រវឹង និងគ្រឿងញៀន ដោយសារកង្វះការអប់រំ និងដោយសារការអនុវត្តនយោបាយភូមិឃុំសុវត្តិភាពមិនទាន់បានល្អ។
គោលនយោបាយភូមិឃុំសុវត្ថិភាពដែលផ្តោតលើការបង្ក្រាបអំពើចោរកម្ម ការប្រឆាំងគ្រឿងញៀន ការជួញដូរមនុស្ស ស្ត្រីនិងកុមារ ការប្រឆាំងអំពើហិង្សាក្នុងគ្រួសារ និងរក្សារសណ្តាប់ធ្នាប់សន្តិសុខ សុវត្ថិភាពប្រជាពលរដ្ឋតាមមូលដ្ឋាន ជាដើម៕
ដោយ៖ជិន ម៉ាដេប៉ូ-Apsara Tonight
